Godfrey Dilunga is no more

Aliyekuwa Mhariri wa Gazeti la Jamhuri, Godfrey Dilunga, amefariki dunia usiku wa kuamkia Jumanne Septemba 17, 2019, katika Hospitali ya Taifa ya Muhimbili (MNH), Dar es Salaam, alikokuwa akipatiwa matibabu. 

Mwili wake unasafirishwa kwenda Morogoro leo Septemba 18, 2019, na msiba uko Kimara Stop-Over jijini Dar es Salaam kwa dada yake. Kwa mujibu wa Kampuni ya Jamhuri Media Limited ambako alikuwa akifanyia kazi, kifo cha mfanyakazi wake, Godfrey Dilunga kimetokana na maradhi ya tumbo. 

Dilunga alilazwa katika hospitali hiyo ya Taifa Muhimbili (MNH) Septemba 9, mwaka huu akitokea katika Hospitali ya Mwananyamala kwa rufaa. 

Katika taarifa iliyotolewa na Jamhuri Media, kwa sasa maandalizi ya kuuaga mwili wa marehemu Dilunga jijini Dar es Salaam yanafanyika na kisha utasafirishwa kesho Septemba 18 kwenda mkoani Morogoro kwaajili ya mazishi. 

Dilunga aliajiriwa JML tangu Februari 1, 2019 kama Mhariri wa Gazeti la JAMHURI ambako amefanya kazi hadi mauti yalipomfika. Kabla ya kujiunga JAMHURI, Dilunga amepata kufanya kazi na Gazeti la Raia Mwema na Mtanzania. 

Viongozi mbalimbali na wanasiasa wametuma salama zao za rambirambi kwa ndugu, jamaa na wanatasnia ya habari kwa msiba huo.