Watu 2,000 wafariki dunia kwa Ebola

Imeelezwa kuwa watu 2,000 wamefariki dunia kutokana na maradhi ya ebola kwa zaidi ya mwaka mmoja mashariki mwa Jamhuri ya Kidemokrasi ya Kongo.

Maradhi hayo yanayoendelea kulitesa taifa hilo yamekuwa ni mabaya zaidi ikilingwanishwa na yale ya Afrika Magharibi ya mwaka 2014-2016. 

Licha ya kuwapo kwa kila juhudi za kupambana na maradhi hayo lakini idadi ya watu wanapewa chanjo ya kuzuia maradhi hayo imekuwa ndogo.  Shirika la kujitolea la MSF linasema mwendo umekuwa wa kusuasua kwa watu wa taifa hilo kupata chanjo dhidi ya Ebola. 

Hata hivyo MSF imetoa mapendekezo yake kuwa Shirika la Afya Duniani (WHO) kupunguza mipaka ya utoaji wa chanjo ili kwenda kwa kasi zaidi na kulitaka shirika hilo liunde kamati ya kusimamia programu za chanjo ya Ebola.   

Mratibu wa huduma za dharura wa MSF Dkt. Natalie Roberts anasema kinachofanywa na WHO ni sawa na kuwapa ndoo ya maji kwa ajili ya kuzima moto kisha kuwataka kutumia kimoja kwa ajili ya kuzima moto. 

Aidha Dkt. Natalie ameipongeza wizara ya Afya na WHO licha ya kuweka mpaka wa chanjo takribani watu 220,000 wamepata chanjo ya Ebola ya rVSV-ZEBOV na utafiti wa chanjo uliofanywa na Merck umeonyesha uwezo mkubwa wa kufanya kazi. 

Mratibu wa Kampeni za MSF Dkt. Isabelle Defourny anasema wapo mbioni kuongeza kasi ya utoaji wa chanjo pale inapobidi; kwani matarajio ni watu 2,000-2,500 kwa siku  ikilinganishwa na idadi ya sasa ya watu 500-1,000.

Read More

Jamhuri ya Kidemokrasi ya Kongo ni nchi ya namna gani?

Taifa hili limekuwa likifahamika kama Congo Kinshasa baada ya kubadilishwa kutoka Zaire jina ambalo lilitumika kuanzia mwaka 1971 hadi mwaka 1997; wakati wa utawala wa Mobutu Sese Seko. 

Ni miongoni mwa nchi kubwa katika bara la Afrika ikiwa ya kwanza iliyopo china ya Jangwa la Sahara. Ina idadi ya watu takribani milioni 80 na kuwa nchi ya kwanza yenye watu wengi katika ukanda wa nchi zinazongumza Kifaransa na nchi ya nne kwa kuwa na idadi kubwa ya watu barani Afrika. 

Kwa kiwango hicho Jamhuri ya Kidemokrasi ya Kongo inashika nafasi ya 16 duniani. Katika eneo la mashariki mwa taifa hilo limekuwa na matukio yasiyoisha ya migogoro ya kijeshi katika Kivu tangu mwaka 2015. Lugha zinazotumika katika taifa hilo ni Kifaransa, Kikongo, Kiswahili na Tshiluba. 

Nchi imepakana na Jamhuri ya Kongo, Jamhuri ya Afrika ya Kati, Sudan Kusini, Uganda, Rwanda, Burundi, Tanzania, Zambia na Angola. Ina sehemu ndogo ya pwani kwenye Bahari ya Atlantiki. 

Sehemu hiyo inatenganisha eneo la Cabinda kutoka maeneo mengine ya Jamhuri ya Angola. Eneo lote ni la kilometa mraba 2,345,409 na linafanya Kongo iwe nchi ya 11 duniani kwa ukubwa wa eneo. 

Taifa hilo lina mikoa 26 na wananchi wengi (zaidi ya 80%) wanajihesabu Wakristo wa madhehebu mbalimbali; kati yao asilimia 36.8 ni Wakatoliki. Waislamu ni asilimia 10-12. Wafuasi wa dini asilia za Kiafrika ni 3%. 

Januari mwaka huu taifa hilo liliingia katika zama mpya baada ya kumpata rais katika sanduku la kura ambapo Felix Tshisekedi alipokea kijiti kutoka kwa Joseph Kabila. Uchaguzi wa kumpata Tshisekedi ulifanyika Desemba 30, 2018. 

Tume ya taifa ya uchaguzi katika Jamhuri ya Kidemokrasi ya Congo, CENI, ilitangaza ushindi wa Tshisekedi  Alhamisi, alfajiri ya Januari 10 mwaka huu. 

Ushindi huo uliwashtua wengi ambao walishuku huenda matokeo yangebadilishwa ili mgombea wa muungano wa vyama tawala, Emmanuel Ramazani Shadary awe ndiye mshindi. Baada ya kutangazwa mshindi, Felix Tshisekedi alisema anatoa heshima zake kwa Rais Joseph Kabila, ambaye amesema anamchukulia kama mshirika muhimu kisiasa. 

Mpaka sasa licha ya changamoto za taifa hilo lakini Tshisekedi ameendelea kuwa mtulivu katika kusuluhisha na kuweka sawa mambo mbalimbali hali inayoashiria zama mpya.

Imetayarishwa na Jabir Johnson…….Septemba 30, 2019.

Read More

Ufahamu mwezi Septemba

Septemba ni mwezi wa tisa wa mwaka katika kalenda ya Julian na kalenda ya Gregori. Septemba ni mwezi wa tatu kati miezi minne ambayo ina siku 30. 

Pia ni mwezi wan ne kati ya mitano ya mwaka yenye siku chini ya 31. September ni neno ambalo limechukuliwa kutoka katika lugha ya Kilatini ‘Septem’ ikiwa na maana ya ‘Saba’. Sasa ilikuwaji mpaka ikawa ni tisa katika mtiririko wa miezi? 

Hii ilitokana na Kalenda ya zamani ya Kirumi ambayo ilikuwa na miezi 10, ile kalenda ya Romulus mwaka 750 K.K ambayo mwezi wa kwanza ulikuwa ni Machi (kilatini ikifahamika kama Martius. 

Wanahistoria wanasema kalenda hiyo ilidumu hadi mwishoni mwa mwa 451 K.K Kuanzi hapo kulifanyika mabadiliko makubwa ya kalenda ambapo iliongezwa miezi miwili Januari na Februari ambayo waliiweka mwanzoni, hivyo Septemba ukaanza kuonekana kuwa ni mwezi wa tisa katika mtiririko huo. 

Hakukuwa na haja ya waliokuwepo kubadili jina la 'Septem' kutoka katika maana ya asili  wakaamua kuliacha kama lilivyo hadi leo. Pia kabla ya kubadilishwa mwezi Septemba ulikuwa na siku 29 hadi wakati ambapo kalenda ya Julian ilipofanya maboresho hayo na kuongeza siku moja na kuwa na 30 kama ambavyo unafanya sasa.  

Aidha Septemba umekuwa ni mwezi ambayo kila jamii imekuwa ikiuchukulia kulingana na mila na desturi zao. Kwa mfano makanisa ya Eastern Orthdox yamekuwa yakiuchukuliwa kuwa ni mwezi wa kikanisa ambapo hutakiwa kuingia katika mfungo na kuhitimishwa kwa sherehe. 

Nchi nyingi za upande wa kaskazini mwa dunia nikimaanisha Ulaya na maeneo mengine ya upande huo huuchukulia mwezi Septemba kama mwanzo wa mwaka wa masomo ambapo wanafunzi huwa wanarudi mashuleni na vyuoni baada ya mapumziko.   

Kama haitoshi mwezi Septemba huchukuliwa kuwa ni mwezi wa mavuno katika Kalenda ya Charlemagne. Hii ni kutokana na kumbukumbu ya utawala wa Mfalme wa Warumi maarufu Charles, The Great I aliyezaliwa Aprili 2, 742 na kufariki dunia Januari 28, 814.

Charlemagne aliitawala Dola la Rumi kuanzia mwaka 800 hadi 814. Katika kujiimarisha kiuchumi na kisiasa Charlemagne aliamua kuwa na kalenda hiyo. Huo ni kwa ufupi kuhusu mwezi Septemba.

CHANZO: KILIFM HABARI

Read More

Njaa iliyojificha inavyoitesa Jamii

Kuanza kumpa mtoto chakula kabla ya kufikisha miezi sita ni hatari kiafya

Wataalamu wa masuala ya lishe wanaeleza njaa iliojificha kuwa ni kula chakula na kushiba huku mwili ukiwa haujavuna vya kutosha madini, protini na hata vitamin, hali inayopelekea mwili kuzongwa na maradhi mbalimbali.

Mataifa yanayoendelea yamekuwa yakikabiliwa kwa kiasi kikubwa na matatizo ya lishe kutokana na wananchi wengi kutokuwa na elimu ya kutosha na sahihi juu ya lishe bora katika familia zao, hali inayoathiri kasi ya juhudi za kupambana na njaa iliojificha.

Tanzania  ni miongoni mwa mataifa yanayokabiliwa na tatizo hilo kwa watu wake hasa watoto walio chini ya umri wa miaka mitano na wanawake walio katika rika la kuzaa.

Utafiti wa wa afya na viashiria vya malaria wa mwaka 2015/16 unaonesha kuwa upungufu wa damu kwa watoto walio na umri wa miezi 6 hadi 59 ni asilimia 58 huku asilimia 2 wakiwa na upungufu wa juu wa damu, asilimia 30 wakiwa na upungufu wa kati na asilimia 26 wakikabiliwa na upungufu wa damu wa kawaida.

Utafiti huo unaonyesha kuwa mkoa wa Shinyanga ndiyo umeathirika zaidi ambapo wastani wa asilimia 71 ya watoto wana tatizo la upungufu wa damu.

Taasisi ya Chakula na Lishe nchini Tanzania (TFNC) anasema mapambano dhidi ya udumavu laazima yaanze katika siku 1000 za kwanza za binadamu.

Shirika la Afya Duniani (WHO) linasema utapiamlo ambao matokeo yake ni udumavu hutokana na kutokuwa na usawa katika kiwango cha chakula kinachompa mtu virutubisho mwilini.

Hali hii hutokea kwenye makundi mawili; kwanza kutokuwa na lishe ya kutosha ambako kunajumuisha kudumaa, kuwa  na uzito mdogo usioendana na umri pamoja na kukosa virutubisho vya kutosha.

Pili ni kula vyakula vinavyoleta  unene uliopitiliza na magonjwa yanayotokana na mtindo wa maisha. Na hali hii huwapata zaidi watoto na watu wenye kipato kizuri waishio mjini.

Katika familia nyingi linalotazamwa ni kula na kila mwanafamilia ashibe kwa kiwango chake pamoja na urahisi wa upatikanaji wa chakula katika jamii husika, ndani ya familia nyingi wanawake walio katika umri wa kuzaa na watoto walio chini ya miaka mitano ndio wanaathirika zaidi na tatizo hili linalotajwa na wataalamu njaa ilio jificha.

Bado utafiti huo unaonyesha kuwa miongoni mwa wanawake walio katika rika la kuzaa la umri wa kuanzia miaka 15-49 asilimia 45 wana tatizo la upungufu wa damu ambapo asilimia 1 wana upungufu wa damu wa juu, asilimia 11 wana upungufu wa damu wa kati na asilimia 33 wakiwa na upungufu wa damu kawaida.

Kwa nchini Tanzania  utafiti uliofanywa na taasisi ya lishe (TFNC) kwa kushirikiana na ofisi ya taifa ya takwimu (NBS) kuhusu afya na viashiria vya malaria wa mwaka 2015-2016  unaonesha kuwa tatizo la udumavu linakabili zaidi wanawake walio katika umri wa kuzaa na watoto chini ya miaka mitano.

Utafiti huo unaonesha kuwa mkoa wa Rukwa unaongoza kuwa na watoto wengi wenye udumavu kwa kiwango cha asilimia 56 ukifuatiwa na mkoa wa Njombe kwa asilimia 49, Ruvuma asilimia 41, Iringa asilimia 42 na Kagera 42.

Kiuhalisia mikoa hii kwa nchini humo ndio inayoongoza kwa uzalisaji wa chakula hata hivyo ndio inayoonoza kuwa na kiwango cha juu kuwa na hali ya udumavu.

Matokeo ya utafiti huo yanadhihirisha bado kuna kazi kubwa ya kupambana na  changamoto ya lishe duni inayosababisha  udumavu, uzito pungufu, upungufu wa damu na ukondefu.

Katika gazeti la mtandao la wizara ya afya maendeleo ya jamii jinsia, wazee na watoto naibu waziri Dkt. Faustine Ndugulile alisema, "Zaidi ya asilimia 35 ya vifo vya watoto chini ya umri wa miaka mitano nchini vinachangiwa na matatizo ya lishe duni na katika kipindi cha mwaka 1992 hadi 2015/16 vimepungua kutoka 149 hadi 67 kwa kila vizazi hai 1000.

Shabaha ya shirika la afya duniani WHO ifikapo mwaka 2025 ni kwa kupunuguza kwa idadi ya watoto wenye umri chini ya miaka mitano waliodumaa kwa nchini Tanzania kwa asilimia 40. Hivyo ni muhimu kwa jamii ya Watanzania kuzingatia lishe bora kwa watoto, wajawazito na  wanawake walio katika rika la kuzaa.

CHANZO: DW

Read More

Rwanda ni taifa la namna gani?

Rwanda ni miongoni mwa mataifa madogo kabisa katika bara la Afrika. Lipo nyuzi chache kusini mwa mstari wa Ikweta. 

Rwanda imepakana na Uganda, Tanzania, Burundi na Jamhuri ya Kidemokrasi ya Kongo (DRC). Pia taifa hilo ambalo sasa linaongozwa na Paul Kagame lipo katika ukanda wa maziwa makuu barani Afrika. 

Katika suala la hali ya hewa, mvua hunyesha mara mbili kwa mwaka na vipindi viwili vya kiangazi. Rwanda ina makabila matatu Wahutu, Watusi na Wa Twa; ambapo makabila haya yote yapo katika kabila moja kubwa la Banyarwanda. 

Wa Twa huwa wanachukuliwa kuwa ndio wenyeji wa taifa hiyo kutokana na aina ya maisha yao katika ardhi hiyo. Hata hivyo kuna wasomi wengine wanapingana na hilo kwa sababu mbalimbali. 

Pia Rwanda ni taifa ambalo limejichotea sifa kutokana na kuwa na kiwango kidogo cha rushwa ikilinganishwa na mataifa mengine barani Afrika. 

Kagame ambaye ameshika wadhifa wa kuliongoza taifa hilo tangu mwaka 2000 kwa tiketi ya Chama cha Rwanda  Patriotic Front (RPF) amekuwa mstari wa mbele katika mapambano dhidi ya rushwa katika hilo. 

Katika utawala wake taasisi za kimataifa za haki za binadamu zimekuwa zikimnyoshea kidole cha lawama kiongozi huyo kwa kukandamiza makundi yanayompinga na pia uhuru wa kujieleza umekuwa finyu katika taifa hilo. Rwanda ina majimbo matano yaliyoanzishwa mwaka 2006. 

Hata hivyo katika suala la kuwapa kipaumbele wanawake Kagame amefanikiwa kwa kiasi kikubwa kwani ni miongoni mwa nchi mbili barani Afrika zenye idadi kubwa ya uwakilishi wa wananwake katika bunge la taifa hilo. 

Taifa hilo lilipata uhuru wake Julai Mosi, 1962 na katiba mpya liliipata mwaka 2003 baada ya kuifanyia marekebisho ile ya mwaka 1962. 

Kwa makadirio ya sensa ya watu na makazi ya mwaka 2015 Rwanda ina takribani watu milioni 11.2 kwa takimu hizo inashikilia nafasi ya 76 kwa kuwa na idadi kubwa ya watu ulimwenguni. 

Mauaji ya kimbari ya mwaka 1994 ni habari isiyotoka katika historia ya taifa hilo. Mauaji ya Kimbari ya Rwanda yalikuwa mauaji ya halaiki nchini Rwanda ambapo wananchi wa kundi la Watutsi pamoja na Wahutu waliotazamwa kuwa wapinzani wa serikali au mauaji waliuliwa na wanamgambo, polisi na wanajeshi wa serikali iliyosimamiwa na viongozi Wahutu. 

Katika kipindi cha takriban siku 100, kuanzia kuuliwa kwa marais Juvenal Habyarimana wa Rwanda na Cyprien Ntaryamira wa Burundi Aprili 6 hadi katikati mwa mwezi Julai, takribani watu 800,000 hadi milioni 1 waliuawa, au karibu asilimia 20 ya idadi ya watu nchini Rwanda wakati huo.

Imetayarishwa na Jabir Johnson…….Septemba 27, 2019.

Read More

Rwanda yapokea kundi la kwanza la wakimbizi kutoka Libya

Kundi la kwanza la wakimbizi wa Libya limewasili jijini Kigali. Taarifa ya Umoja wa Mataifa imesema raia 66 wa Libya wanaotafuta makazi limewasili nchini Rwanda na litawekwa kaskazini mwa taifa hilo katika mpango mpya wa kuwahifadhi wakimbizi. 

Programu hiyo mpya inakuja baada ya Rais Kagame mnamo mwaka 2017 kutoa ruhusa kwa wakimbizi wa Afrika wanaotafuta makazi kuja nchini mwake badala ya kukimbilia barani Ulaya. 

Mwanzoni mwa mwezi huu Rwanda ilisaini mkataba mpya na Umoja wa Afrika (AU) na Shirika la Wakimbizi la Kimataifa (UNHCR) wa kupokea wakimbizi wa Afrika kutoka nchini Libya. Serikali ya Rwanda imejiandaa kupokea wakimbizi 30,000 japokuwa mpango huo utakwenda kwa awamu 500 ili kuondoa taswira ya raia wake kuonekana kama wanaonewa. Katika akaunti ya twitter ya UNHCR imeandikwa kundi la kwanza wanawake wenye watoto na baadhi ya familia zimewasili katika jiji la Kigali. 

Aidha katika taarifa hilo iliwekwa bayana kuhusu mkimbizi mmoja ambaye ametua Kigali akiwa na mtoto wa miezi miwili aliyezaliwa kwa wazazi wenye asili ya Somalia waliokuwa wakiishi Libya. 

Hata hivyo kuna taaifa nyingine kuwa kutakuwa na ndege nyingine ambaye itabeba watu 125 itakayotua kati ya Oktoba 10-12 mwaka huu. 

Pia wakimbizi hao watawekwa katika makazi maalumu kabla ya kuwaachia huru mpaka wakubali kurudi katika mataifa yao. Katibu Mkuu wa Wizara ya Usimamizi wa Dharura Olivier Kayumba Rugina amesema wakimbizi hao watapewa malazi, chakula, elimu na huduma za kifya na UNHCR. 

Rugina ameongeza baada ya taratibu kukamilika za kuwapokea watapewa vitambulisho kama wakimbizi wengine wanavyofanyiwa. Wakimbizi hao watakaa katika Kambi ya Gashora iliyopo Wilaya Bugesera ikiwa ni kilometa 60 kutoka jijini Kigali. 

Kambi hiyo ilianzishwa mwaka 2015 kwa madhumuni ya kuwahifadhi wakimbizi kutoka Burundi waliokimbia vurugu na machafuko nchini mwao. 

Akali ya wakimbizi 30,000 walihifadhi katika kambi hiyo ya Gashora. Wakimbizi waliopokelewa nchini Rwanda kutoka Libya wamefika hapo kutokana na machafuko yaliyojitokeza baada ya kuondolewa kwa Muammar Gaddafi katika mapinduzi yaliyofanyika mwaka 2011. Hadi sasa Umoja wa Mataifa umesema wakimbizi 42,000 wapo nchini Libya.

Rais Kagame amechukua majukumu hayo baada ya kituo cha televisheni cha CNN kuripoti kuwa wakimbizi walioko Libya ni kama watumwa katika ardhi yao. 

Itakumbukwa Julai mwaka huu zaidi ya watu 40 waliuawa kutokana na shambulio la anga lililofanywa katika kituo cha wahamiaji kwenye mji wa Tajoura nchini Libya. Mnamo 2017 Umoja wa mataifa ulipinga mpango wa wakimbizi kuwaweka upande nchini Niger. Aidha Maofisa nchini Rwanda wamesema wamejifunza kutoka Niger. 

Jumuiya ya Afrika Mashariki imepongezwa kwa kuwa na uwazi katika suala la wakimbizi. Uganda inawahifadhi wakimbizi 800,000 kutoka Sudan Kusini na nchini nyingine katika ukanda huo zimekuwa zikiwahifadhi kutoka Burundi, Somalia na kwingineko. 

Hadi mwishoni mwa mwaka 2018 nchi za ukanda wa Afrika Mashariki zilikuwa zikiwahifadhi wakimbizi akali ya milioni nne.

Read More

MAKTABA YA JAIZMELA: Bishop David Oyedepo ni nani?

Septemba 27, 1954 alizaliwa Mhubiri wa Neno la Mungu, Mwandishi wa vitabu vya Kikristo, Mfanyabiashara, Mhandisi wa ujenzi na mwanzilishi wa Kanisa la Faith Tabernacle lililopo Ota katika jimbo la Ogun nchini Nigeria na mwanzilishi wa Huduma ya Living Faith Worldwide maarufu Winners Chapel International Bishop David Oyedepo.  

Alizaliwa mjini Osogbo nchini Nigeria. Jina lake halisi ni David Olaniyi Oyedepo. Oyedepo alikulia katika familia ya kidini. Baba yake alikuwa mwislamu, mama yake aliyefahamika Dorcas alikuwa muumini wa kanisa la Holy Order of Cherubim and Seraphim Movement tawi la Aladura huko nchini Nigeria. Oyedepo alikulia kwa bibi yake mjini Osogbo ambaye alimfundisha mambo mengi kuhusu Mungu. Oyedepo aliokoka mwaka 1969 wakati huo akiwa na miaka 15 kutokana na msukumo alioupata kutoka kwa mwalimu wake aliyefahamika kwa jina la Betty Lasher. Alisomea masomo ya Usanifu wa Majengo katika Chuo cha Kwara State Polytechnic. Pia aliwahi kufanya kazi katika Wizara ya Nyumba mjini Ilorin kabla ya kuacha na kuendelea na wito wake wa kimisheni. Alipata shahada ya uzamivu nchini Marekani katika Chuo Kikuu cha Honolulu, Hawaii. Oyedepo aliwahi kusema alipokea upako na maono kutoka kwa Mungu ambaye alizungumza naye kwa saa 18 mnamo Mei 1981. Maono hayo yalikuwa kwa ajili ya watu wanaokandamizwa na Ibilisi. Maono hayo ndiyo yaliyosababisha kuanzishwa kwa huduma ya Winners Chapels International. Mnamo mwaka 2011 Jarida la Forbes lilimtaja Oyedepo kuwa ni Mchungaji mwenye Utajiri mkubwa nchini Nigeria. Oyedepo amekuwa akitoa huduma kupitia Winners Chapel zaidi ya miji 300 duniani kote ambapo barani Afrika yupo katika nchi 45. Pia ameenda hadi Dubai, Uingereza na Marekani. Mbali ya kuwa ni mtumishi wa Bwana kwa sasa ni Kansela katika Chuo Kikuu cha Covenant na Landmark vilivyopo nchini Nigeria.

Read More

Mgogoro wa ardhi Nyabiraba wazua hofu Burundi

Familia mbili zimesema zipo kwenye hofu ya kuuawa baada ya kundi la watu kukata migomba yao juzi jumatatu (Septemba 23, 2019) na kuwatishia kuwaua endapo watarudi katika ardhi hiyo. 

Familia hizo zinazoishi katika kitongoji cha Raro, Nyabiraba jijini Bujumbura zimetishiwa na watu kutoka Mutambu. 

Gazeti la Iwacu limesema ulinzi kuhusu maisha yao haujatolewa mpaka sasa  baada ya mashamba yao ya migomba na ndizi kufyekwa na hadi sasa hawalali katika nyumba zao. 

Aidha familia hizo zimesema licha ya kitisho cha uhai wao lakini pia kitisho cha njaa kinawakabili kwa sasa na baadhi ya wanafamilia wameshakimbia makazi hayo kwa kuhofia kupoteza maisha. 

Kikongwe aliyefahamika kwa jina la Angeline Bandyambona amesema siku ya tukio majira ya saa moja asubuhi watu ambao hawafahamu walikwenda katika shamba lake wakiwa na mapanga na kuanza kukata migomba yake na baada ya kufanya hivyo walisema watarudi kuwaua. 

Hata hivyo kikongwe huyo amedai kuwa watu hao wanatoka katika jamii ya Mutambu iliyopo katika kitongoji cha Raro. Aidha Bandyambona amesema awali kulikuwa na ugomvi wa ardhi na familia moja ya Mutambu. 

Alex Nahimana mwenye umri wa miaka 52 ni mtoto wa kiume wa kikongwe na baba wa watoto saba amesema wanachosubiri kwa sasa ni sheria ifuate mkondo wake. 

Mwanafamilia mwingine aliyejitambulisha kwa jina la Rosalie Nahabandi ambaye ni mama wa watoto 8 amesema watu hao kutoka Mutambu walifika na kukata migomba na mbogamboga hali ambayo inawawia vigumu kupata chakula hadi sasa pia wana hofu ya kuuawa na watu hao. 

“Hatulali ndani ya nyumba zetu, tunashinda usiku mzima msituni,” amesema Rosalie. 

Uongozi wa Kitongoji cha Raro umesema utawala unalifahamu sakata hilo na kwamba taarifa walipata kuhusu familia kutoka Mutambu kufanya kitendo hicho na kwamba familia iliyokwenda kukata migomba katika ardhi ya familia nyingine ina nyaraka kutoka wizarani ambazo mamlaka za chini hazina uwezo wa kuingilia suala hilo. 

Imeelezwa mgogoro wa ardhi katika jamii hizo mbili ulianza mwaka 1984 na jalada la kesi hiyo lipo katika Wizara ya Sheria.

CHANZO: IWACU

Read More