Ziara ya Mstahiki Meya wa Manispaa ya Moshi Raymond Mboya katika Dampo la Mtakuja (PICHA)

Uongozi wa Halmashauri ya Manispaa ya Moshi mkoani Kilimanjaro, umeridhishwa na ujenzi wa  jalala la kisasa (Dampo), ambao  unatajwa  kukamilika kwa  asilimia 100.

Meya wa Halmashauri  hiyo Raymond Mboya, aliyasema hayo baada ya ziara yake na  waandishi wa habari  kutembelea eneo linapojengwa dampo  hilo na kuridhishwa na ujenzi huo  ambapo alisema kwa sasa wanasubiriwa kukabidhiwa  rasmi ili kuanza matumizi ya dampo hilo.

Mboya alisema Manispaa hiyo inatekeleza mradi wa ujenzi wa dampo la kisasa ili kuwezesha wananchi kupata eneo la kutupia taka ngumu ambazo zimekuwa zikizalishwa majumbani na masokoni.

Katika ziara hiyo pia Mstahiki Meya alitrembelea ujenzi wa miradi mbalimbali inayotekelezwa kwenye Halmashauri ya hiyo, ikiwemo ujenzi wa mradi wa kituo cha mabasi makubwa ya abiria unaojengwa eneo la Ngangamfumuni ambacho hadi kukamilika kwake kitagharimu kiasi cha Sh bilioni 29 huku akionyeshwa kuridhishwa na ujenzi wa miradi hiyo.

“Kumamilika kwa dampo hili litakuwa na msaada mkubwa wa kuondosha changamoto ya taka ngumu ambazo zinazalishwa kwenye maeneo mbalimbali na kukosa eneo la kuhifadhi,”alisema Mstahiki Meya.

Aidha aliongeza kusema kuwa “Manispaa tulikuwa na dampo katika eneo la Karoleni, dampo lile limejaa hali ambayo ilikuwa ikihatarisha usalama wa afya kwa wakazi wa maeneo yanayozunguka dampo lilo,”alisema.

Alisema mchakato wa ujenzi wa dampo hilo  ulianza tangu mwaka 2019, hadi kukamilika kwake umegharimu kiasi cha zaidi ya Sh bilioni 2 na kwamba ujenzi wa dampo hilo unasimamiwa na kampuni ya ukandarasi ya Rocktrotinic Ltd. ya mjini Moshi.

Awali akizungumza msimamizi wa Jalala la Kisasa (Dampo) Musa Mapunda alisema ujendi wa dampo hilo umeshakamili na muda mfupi baada ya kupata mitambo ambayo ni sahihi kwa ajili ya matumizi ya dampo hilo utaanza.

 “Tunategemea kuanza matumizi ya jalala letu muda mfupi baada ya kupata mitambo ambayo ni sahihi kwa ajili ya matumizi ya dampo letu la kisasa,”alisema Mapunda.

STORY BY: Kija Elias

ALL PHOTOS BY: Jabir Johnson

EMAIL: jabirjohnson2020@gmail.com
DATE: Aprili 1, 2020