Watembea kwa Miguu changamoto udhibiti wa Corona mpaka wa Kenya

Mkuu wa Mkoa wa Kilimanjaro Dkt. Anna Mghwira amesema watembea kwa miguu katika mpaka wa Tanzania na Kenya ni changamoto kubwa katika makabiliano ya kusambaa kwa virusi vya Corona licha ya juhudi zinazoendelea katika kudhibiti janga hilo linalotikisa dunia kwa sasa.

Hayo yanajiri ikiwa ni siku chache baada ya Jeshi la Polisi mkoani hapo kuwakamata waendesha bodaboda watano kwa tuhuma za kuwasaidia watu kutoka nchini Kenya na kuwaingiza nchini kinyemela.

Akizungumza katika mahojiano maalumu na Radio Fountain ya mjini Moshi Aprili 13 mwaka huu, Dkt. Mghwira alisema watembea kwa miguu kutoka Kenya wamekuwa wakiingia kwa njia za panya hali ambayo inakuwa ngumu kudhibiti kusambaa kwa virusi vya Covid-19.

“Iko wazi katika mpaka wa Tanzania na Kenya kwa upande wa Kilimanjaro kuna njia zaidi ya 400 za panya ambazo ni ngumu kudhibiti kwa kutumia jeshi la Polisi pekee,” alisema Dkt. Mghwira.

Dkt. Mghwira aliongeza kuwa ili kudhibiti watembea kwa miguu ni lazima jamii iliyopo katika mpaka huo ishirikiane na vyombo vya ulinzi na usalama kuwakamata watu wanaovuka kutoka Kenya kuingia Tanzania.

“Ushirikiano na wananchi waliopo katika mpaka ni muhimu katika kudhibiti wanaoingia kinyemela, wananchi wanaokaa hapo wanawajua watu wanaotoka huko,” alisema Dkt. Mghwira.

Kwa upande mwingine katika tukiola kukamatwa kwa vijana watano waendesha bodaboda Mkuu wa Wilaya Rombo Agness Hokororo alisema kuna vijana wa bodaboda ambao wanafanya biashara ya kuingiza watu kutoka nchi jirani ya Kenya kwa kutumia njia za panya huku kukiwa na malipo fulani wakipatia aliwaonya kuacha kufanya hivyo kwani wakibainika hatua kali za kisheria zitachukuliwa dhidi yao.

“Kwa sasa kuna madereva wa bodaboda watano walikamatwa wakiwa wamebeba watu kutoka Kenya ambao walikuwa wakiwavusha  kwa kutumia njia za panya, tuliwakamata na kwa sasa wako kwenye karantini  kwenye maeneo maalumu yaliyotengwa kwa kwa siku kumi na nne, na mara baada ya kutoka huku  watafunguliwa mashtaka,” alisema.

Hokororo alisema serikali imekuwa ikitoa elimu kwa waendesha bodaboda juu ya kuacha kuwabeba watu wanaotoka Kenya na kuwaleta huku Tanzania lakini kuna watu wachache  bado wanaendelea kukaidi na kwamba wale ambao wanaoshindwa kutekeleza amri ya serikali wamekuwa wakikamatwa.

Hata hivyo Mkuu huyo wa Wilaya ya Rombo aliwataka wananchi kuacha tabia ya kupokea wageni hasa katika kipindi hiki ambacho ni hatari kwa nchi.