Wakazi wa Dampo la Kaloleni watishia kuandamana Manispaa Moshi

Wakazi wanaoishi kuzunguka Dampo la Takataka la Kaloleni mjini Moshi wametishia kufanya maandamano kwa kile wanachodai kuzibiwa riziki zao wakati ambao manispaa hiyo inajiandaa kulifunga jalala hilo kutokana na sababu za kiusalama.

Hayo yanajiri wakati ambao Manispaa ya Moshi ipo katika hatua za mwisho za kuanza kutumia dampo jipya lililopo umbali wa kilometa 15 kutoka mjini hapo, ikiwa ni sehemu ya kuboresha afya na mazingira ya mji ambao umekuwa ukisifika kwa usafi na utunzaji wa mazingira nchini.

Wakizungumza mbele ya Mstahiki Meya wa Manispaa ya Moshi Raymond Mboya alipofanya ziara ya kushtukiza katika dampo hilo walisema wamekuwa na ajira binafsi kwa muda mrefu kupitia dampo hilo kwani wamekuwa wakijipatia kipato kwa kuokota mabaki ya vifaa mbalimbali ambavyo wanapokwenda kuviuza huwapatia fedha za kujikimu.

“Kwa muda mrefu tumekuwa tukijipatia kipato kupitia dampo hili sasa Meya unapotaka kulihamisha sisi tunakuwa kwenye mazingira gani, tumesomeshea watoto wetu na kuwalisha kupitia dampo hili. Kwa hili hatutakubali,” alisema mwanamke mmoja (jina tunalihifadhi).

Aidha wakazi hao walidai mbele ya Mstahiki Meya kuwa kuliweka mbali na mji ni kuwafanya kuanza upya maisha yao ambayo walizoea hapo.

“Ni kweli tunaonekana kama hatuna thamani kwani tunashinda kwenye dampo hili lakini mwanamke anayefanya hapa dampo na yule wa Mbuyuni na Manyema ni tofauti hata katika maisha, kwa mfano mimi kwa wiki napata sio chini ya laki moja na pia nimeajiri vijana ambao kwa siku nawalipa sio chini ya 4,000 kunisaidia wakati wa kule hawezi kufanya hivyo,” aliongeza mwanamke huyo.

Pia walipoulizwa kuhusu usalama wa afya zao licha ya maisha waliyoyazoea katika dampo hilo walisema uhai wa mtu hauko mikononi mwa mtu upo mikononi mwa Mungu na ndio sababu wamezaa watoto wakiwa hapo na watoto hao wamekulia hapo kwa kazi ya dampo.

Kwa upande wake Mstahiki Meya Mboya alisema hakuna namna ya kufanya zaidi ya kulifunga kwani wananchi ndio walisogea kwenye eneo la dampo kwa miaka mingi lakini kwa sasa limejaa na linatishia usalama.

Mboya alisema uongozi wa Halmashauri ya Manispaa ya Moshi mkoani Kilimanjaro, umeridhishwa na ujenzi wa  jalala la kisasa (Dampo), ambalo  linatarajiwa kuanza kutumika mwishoni mwa mwezi Aprili mwaka huu.

“Manispaa hiyo inatekeleza mradi wa ujenzi wa dampo la kisasa ili kuwezesha wananchi kupata eneo la kutupia taka ngumu ambazo zimekuwa zikizalishwa majumbani na masokoni, dampo la Kaloleni limejaa hali ambayo inahatarishaafya kwa wakazi wa maeneo yanayozunguka dampo lilo,”alisema.

Mchakato wa ujenzi wa dampo jipya la Mtakuja ulianza tangu mwaka 2019, hadi kukamilika kwake umegharimu kiasi cha zaidi ya Sh bilioni 2 chini ya usimamizi wa kampuni ya ukandarasi ya Rocktrotinic Ltd. ya mjini Moshi.

Gazeti la Tanzania Daima Aprili 4, 2020 uk. 18....Wakazi wa Kaloleni watishia kuandamana.