TRC yalia na uharibifu wa miundombinu ya reli

Shirika la Reli Tanzania (TRC), limewataka wakazi wa Klimanjaro na viunga vyake kuacha tabia ya kuharibu miundombinu ya reli, ikiwemo kufyatua matofali, kuchunga mifugo, kulima, kujenga na kuchoma mkaa karibu na miundombinu hiyo.

Akizungumza na JAIZMELA Meneja mradi wa ufufuaji wa reli Kanda ya Kaskazini Shadrack Massawe alisema TRC inaendelea kutoa elimu kuhusu mambo ya kuzingatia katika maeneo ya miundombinu ya reli kwa wananchi waishio karibu na miundombinu hiyo.

Alisema kuwa wapo baadhi ya wananchi wamekuwa na tabia ya kufanya shughuli zao mbalimbali kwenye hifadhi ya reli ikiwemo ujenzi na kilimo hivyo kuathiri miundombinu ya reli hiyo.

“Ni marufuku  kwa mwananchi yeyote kufanya shughuli zozote katika eneo la hifadhi ya reli ikiwa ni pamoja na kuchunga mifugo, kulima, kujenga kufyatua matofali na kuchoma mkaa hairuhusiwi,”alisema Massawe.

Katika hatua nyingine kutokana na maoni ya wakazi wengi mkoani hapo kutaka vivuko, meneja mradi huo wa ufufuaji wa reli aliwataka wananchi kutambua kwamba sio kila eneo linafaa kuwekwa kivuko cha barabara kwani vivuko vingi huathiri uendeshaji wa treni.

“Tumepokea maombi mengi kutoka kwa wananchi wakiomba wawekewe vivuko, lakini ukweli ni kwamba huwa hatuweki vivuko kila mahali, vivuko havitakiwa kuwa vingi sana kwenye njia ya reli kwa sababu itaathiri uendeshaji wa treni hivyo tunapenda kuwajulisha kwamba wale wote walioomba kuna timu inapita kwenda kukagua pale walipoomba na kama wataona panakidhi vigezo vya kuwekwa kivuko vile ambavyo vitakuwa vinakidhi tutawapatia taarifa,”alisema.

Pia Massawe aliwaasa wananchi kuwa makini wawapo karibu na miundombinu ya reli kwa kuepuka kukaa, kufanya biashara katika maeneo ya reli na kuacha kutumia spika za masikioni wanapokuwa karibu na reli kwa kuwa zinahatarisha usalama wa maisha eneo la kivuko kwa watu kushindwa kusikia honi ya treni pindi inapopita.

“Ukifika kwenye eneo la makutano ya barabara na reli inapaswa kutulia na kuangalia pande zote kwa umakini kabla ya kuvuka ,na kwa wanao tumia vyombo vya moto wawe makini pindi wanaposikia treni inakuja”, alisema.