Changamoto za uhalifu zarudisha ulinzi shiriki Rombo

Mkuu wa Wilaya ya Rombo Kanali Hamisi Maigwa akizungumza katika uzinduzi wa Kampeni ya Ulinzi Shiriki katika tarafa za Useri na Tarakea katika Ukumbi wa Chuo cha Maendeleo Mamtukuna Juni 29, 2022.

Mkuu wa Wilaya ya Rombo Kanali Hamisi Maigwa amezindua upya mkakati wa ulinzi shiriki wilayani humo ili kuondoa mazingira ya uhalifu katika makazi ya watu ambao unazidi kutishia maisha ya watu na mali zao.

Akizungumza wakati wa uzinduzi wa zoezi hilo kwa vikundi maalum katika tarafa za Useri na Tarakea Kanali Maigwa alisema hatua hiyo inajiri kutokana na matukio ya uhalifu yanayozidi kujitokeza wilayani humo.

“Msiseme suala hili (ulinzi shirikishi) ni la polisi…watu wengi waliofanikiwa hapa duniani, wanaofanya kazi za kujitolea;…nia ya kweli ndiyo ninayoitaka, nataka tushikamane katika hili,tuwe kitu kimoja…acheni kusemanasema, mnakaa mnatuhumianatuhumiana kwanini?” alisema Kanali Maigwa.

Kwa upande wao washiriki wa kampeni kabambe ya ulinzi shirikishi walisema kumekuwa na kundi kubwa la vijana wa Kitanzania waliokimbilia nchini Kenya kurudi wilayani humo huku wakiwa na tabia za wizi na unyang’anyi.

Aidha sungusungu hao walisema siku za soko kumekuwa na raia wengi wa Kenya wanaobaki au kuchelewa kurudi kulingana na sheria za mpakani zinavyotaka hali ambayo imekuwa ikileta usumbufu.

Suala la wanyamapori kuibuka nyakati za usiku kwa baadhi ya vijiji wilayani humo limekuwa kikwazo kikubwa kwa ulinzi shiriki.

Hata hivyo sungusungu wamemwomba mkuu wa wilaya huyo kupata zana zenye kiwango cha juu ili kukabiliana na wahalifu pindi wanapojitokeza katika maeneo yao.

“Wafugaji wa Kimasai wamekuwa wakivamia vijiji vya wakulima wakiwa na zana kama upinde, mishale, mkuki, visu na mapanga hali ambayo imekuwa ikizidisha wasiwasi,” alisema .

Hata hivyo Mrakibu Msaidizi wa Polisi wilaya ya Rombo OCD Geofrey Gulenga alisema kuna watu wamekuwa wakishughulisha na uuzaji wa mirungi, unywaji wa pombe uliopitiliza ambao umekuwa chanzo cha ukatili kwa wanawake na watoto.

“Katika ngazi zetu kuanzia mtaa, kitongoji; serikali ya kitongoji ikisimamia vizuri kitongoji kitakuwa salama; kijiji kikisimamia kuhakikisha eneo lao linakuwa salama litakuwa salama; mifumo hii ya serikali inatakiwa ifanye kazi kwelikweli ikitegemea jeshi la polisi kwa kila kinachotokea tutagundua kuwa tumekwama…kutokana na polisi kuwa wachache na vitendea kazi haviko vya kutosha,” alisema OCD Gulenga.

Akijibu baadhi ya changamoto za uhalifu wilayani humo Mkuu wa Wilaya alisema kuna upungufu wa Jeshi la Akiba wilayani humo na kwamba wanaendelea kulifanyia kazi suala hilo ikiwamo kuongeza wanafunzi wa mafunzo hayo.

Kanali Maigwa alisema uaminifu miongoni mwa sungusungu na jamii kwa ujumla itapunguza uhalifu na kukuza maendeleo huku akisisitiza umoja miongoni mwao ndiyo suluhisho la kuondoa uhalifu huo.

Aidha Kanali Maigwa alihitimisha kwa kusema, “Sisi kama serikali tukizubaa au tukalemaa tusiweke nguvu ya kutosha kwa walipa kodi halali wa serikali itafika sehemu serikali hata mapato yake yatashuka kwasababu vibaka na wezi wamelenga kuwaibia walipakodi hao…suala la ulinzi shiriki ni la kila mtu,” alisema mkuu wa wilaya.