Veta yahimizwa kuzingatia Tehama

Vyuo vya Ufundi Stadi nchini (VETA) vimetakiwa kuendelea kuhakikisha vijana wanaoingia katika mafunzo hayo wanapata ujuzi na maarifa katika Teknolojia ya Habari na Mawasiliano (Tehama).

Akizungumza katika Mahafali ya Pili ya kuanzishwa kwa Programu hiyo ya “Make A Difference Now” Mdhibiti wa Ubora wa Shule Kanda ya Kaskazini Exaud Mtei alisema kujiajiri ndio mpango mzima kwa vijana wakishahitimu masomo yao lakini hawawezi kujiajiri kama hawana ujuzi wa Tehama katika zama za utandawazi.

“Tunasisitiza sana katika elimu wanayopewa vijana waweze kuangalia zaidi katika masuala ya ujuzi , Veta inatakiwa kuhakikisha kwamba inajikita zaidi katika kuboresha vyuo vya Ufundi na vile ambavyo vinatoa ujuzi hasa katika masuala mazima ya Tehama ili vijana waweze kupata elimu ya Tehama,” alisema Mtei.

Mtei aliongeza kuwa katika taasisi mbalimbali haiwezekani kufanya kazi bila kuwa na ujuzi wa kompyuta na Tehama kwa ujumla.

Kwa upande wake Afisa Mtendaji wa Kata ya Njoro kwa niaba ya Mkurugenzi Mtendaji wa Halmashauri ya Manispaa ya Moshi Rashid Gembe, Florian Mutashobya aliipongeza Taasisi ya Make kwa kuwafadhili wasichana 26 ili kuweza kupata mafunzo ya komyuta pamoja na ujasiriamali kwa muda wa miezi minne.

“Elimu waliyoipata itawawezesha katika maisha yao ya kujitegemea  na imesaidia kuwapunguzia mzigo wazazi wao kuwategemea,” alisema Mutashobya.

Hata hivyo Mutashobya aliwasihi wahitimu hao kwenda kuangalia fursa zilizoko vijijini na kuweza kuzichangamkia kwani maeneo mengi ya yanakabiliwa na changamoto kubwa ya wataalamu wa masuala ya Tehama.

Aidha Mkurugenzi wa Taasisi ya Affordable Computers And Technology For Tanzania (Actt) Robert Mafie alisema taasisi yake imejikita zaidi kuwasaidia kusaidia vijana wa kike ili waweze kufikia malengo,  kuwasaidia katika masomo ya ujasiariamali ili kuepukana na changamoto za mimba za utotoni.

“Tangu kuanzishwa kwa (Actt) mwaka 2011 hadi sasa tumeshazifikia shule zaidi ya 400 Kwa ajili ya kuzisaidia kuwapatia kompyuta na vifaa vyake , kutoa mafunzo ya kompyuta na teknolojia katika kuboresha elimu,” alisema Mafie.

Baadhi ya wahitimu Mwanaidi Athuman na Hiyari Hemedi wameishukuru kwa Make Kwa ufadhili wao, ambao wameweza kupata elimu ya ujasiariamali na ujuzi wa kusoma masoko ya kompyuta ambapo wazazi wao hawakuwa na uwezo wa kuwasomeaha kutokana na changamoto ya kifedha.