Dkt. Malisa achukua fomu kuwania M/kiti CCM Mkoa Kilimanjaro

Mwanasiasa mkongwe mkoani Kilimanjaro Dkt. Malisa Godfrey, amesema mwamko wa watu kujitokeza kuwania nafasi mbalimbali ndani ya Chama cha Mapinduzi (CCM) kunatokana na nia zao za kutaka kukitumikia chama hicho tawala.

Dkt. Malisa ambaye amechukua fomu ya kuwania nafasi ya Mwenyekiti wa CCM Mkoa wa Kilimanjaro alisema kuwa taratibu njema za kisiasa ndani ya CCM pia ni sababu nyingine inayopelekea hali hiyo.

“Kama ilivyo maeneo mengine duniani kwenye nchi ambazo zinazingitaia demokrasia, kinapokuja kipindi cha uchaguzi ndani ya vyama vya kisiasa homa miongoni mwa wanansiasa huwa inapanda na kushuka na hili hupelekea wale wanaoamini wanaweza kukitumikia chama kujitokeza kwa wingi”, alisema.

Alisema katika Tanzania ya leo demokrasia inaenda vizuri na kwamba hilo linadhihirishwa na uwazi ulioko sasa ndani ya CCM na uongozi wa chama hicho kuridhia yaweko mazungumzo yanayohusiana na swala la katiba mpya.

“Ile hali iliyokuweko miaka ya nyuma ambapo watu waliamini wananyimwa haki zao inaendelea kutoweka, hata vyama vingine za kisiasa vinaonyesha kuridhika na hali hii, ni wazi kabisa ya kuwa kukua kwa demokrasia msingi wake ni utawala unaokuweko katika uongozi”, alisema.

“Katiba ndio msingi wa demokrasia katika nchi yoyote duniani, ndio dira ya kuongoza nchi, baada ya Watanzania kuonyesha mahitaji ya kuweko kwa katiba mpya kwa muda mrefu, CCM ambayo huwa haikurupuki imeonyesha nia yake katika swala hili tena kwa kuanzia ngazi ya chini waliko wananchi wengi”, alisema.

Alisema kuwa wakati wa umefika kwa Tanzania kupata katiba mpya ambayo alisema ujio wake utakiimarisha CCM yenyewe, vyama vya kisiasa hapa nchini, taasisi mbalimbali na Taifa kwa ujumla.