Madiwani CCM Kilimanjaro wapigwa msasa

Madiwani wa halmashauri zote mkoani Kilimanjaro wamepigwa msasa wa kazi yao kwa wananchi waliowapigia kura huku wakitakiwa kutunza familia zao vizuri.

Akizungumza katika semina ya siku moja iliyofanyika katika makao makuu ya Chama cha Mapinduzi (CCM) mkoa wa Kilimanjaro  Katibu wa NEC na Uhusiano wa Kimataifa Kanali Mstaafu Ngemela Lubinga alisema madiwani wanatakiwa kujitambua

“ Madiwani mnatakiwa kujua hitajio la jamii…ambalo ni kujenga jamii yenye usawa, kuheshimiana na haya yote hayawezi kufanyika kama nyinyi wenyewe hamjijui,” alisema Lubinga.

Lubinga alisema madiwani wana dhamana kubwa kwani maendeleo ya nchi yapo mikononi mwao, utulivu na amani katika maeneo yao ni muhimu kuzingatia.

Aidha Kanali huyo Mstaafu aliwataka madiwani hao kutambua kuwa wakitimiza wajibu wao kwenye familia zao hata jamii wanayoiongoza itakuwa  na maendeleo ya kweli.

“Diwani ni lazima uwe mvumilivu, kuwa kiongozi wa kisiasa sio tafrija, ni lazima uwe mvumilivu na muungwana kwa kila mtu; walio wengi familia hatuzijali na wengine walipopata udiwani walihama na nyumbani,” aliongeza Lubinga.

Kanali Mstaafu Lubinga aliongeza, “ Sio kuku wanapotea kijijini, wanasema nenda pale kwa diwani ana watoto wanaoiba kuku… nanyi kina mama mlipopata udiwani hakikisha kiatu cha mumeo hakijachubuka akitoka waseme yule ni mume wa diwani,”

Pia Lubinga alisisitiza ugomvi baina ya mke na mume ndani ya nyumba sio mzuri huku akitaka usiri mkubwa pindi inapotokea mitafaruku baina yao ili kulinda dhamana ya uongozi waliopewa.

“Tutofautishe nguo ya kuanika ndani na ya kuanika nje…hakuna jamii yoyote duniani isiyo na siri; chutama kwenye mambo ambayo hutaki kila mmoja ajue, sio kila kitu kwako kionekane kwa mtu. Ukila nawe mdomo,” alikumbusha Lubinga.

Hata hivyo Kanali Mstaafu Lubinga aliwataka madiwani hao kwenda mbali zaidi katika utunzaji wa siri ikiwamo vikao vya ndani ya chama.

“Mmemaliza kamati ya madiwani watu wanawasubiri kijiweni. Na wakikupa bia mbili basi tena unasukumwa…unabinuka, ukisukumwa usibinuke wewe una dhamana. Siri ndio inayojenga jamii bora,” alisema Lubinga.

Kwa upande wao madiwani walipongeza juhudi za chama chao kuwapa semina kwani kuna baadhi ya mambo walikuwa hawayajui na kuanza hapo wamepiga hatua muhimu katika ujenzi wa chama chao na jamii kwa ujumla.

Awali katika ufunguzi wa semina hiyo Mwenyekiti wa Chama cha Mapinduzi  (CCM) mkoa wa Kilimanjaro Patrick Boisafi alisema licha ya changamoto kujitokeza tangu uchaguzi wa 2020 lakini madiwani hao wamekuwa waaminifu katika kutenda haki kwa kila mmoja kwa kadiri inavyotakiwa.