Serikali yaitengea fedha mil. 800 TaCRI

 

Taasisi ya Utafiti wa Kahawa Tanzania (TaCRI) imetengewa fedha zaidi ya Shilingi  milioni 800 zitakazotumika kuboresha utafiti wa kahawa nchini kwa nia ya kuongeza uzalishaji wa zao la kahawa nchini kwa ujumla. 

Naibu Waziri wa Kilimo Anthony Mavunde, aliyabainisha hayo katikati ya wiki  wakati wa ziara yake ya kikazi katika ofisi za TaCRI zilizoko Lyamungo Wilayani Hai mmkoani Kilimanjaro. 

“Serikali kupitia Wizara ya Kilimo kwa sasa imeegemea kwenye Sayansi na hii ni kwa sababu  ya utafiti ukiwemo ule wa zao la Kahawa, ambayo ndio njia pekee itakayoboresha kilimo nchini na kwamba mgao wa fedha hizi ni ongezeko kutoka mgao wa awali wa zaidi ya milioni 300,”alisema Mavunde.  

Alisema “Matarajio yetu ni kwamba TaCRI itapata watafiti wengi zaidi na wengine kwenda kupata utaalamu wa ziada iwe ndani au nje ya nchi ili wakulima wetu waweze kuzalisha zaidi; serikali itaendelea kuwekeza katika eneo hili la utafiti”, aliongeza. 

Aidha Mavunde aliendelea kusema kuwa ongezeko la fedha za utafiti kwa TaCRI ni sehemu ya bajeti ya ziada kwa ajili ya utafiti ndani ya Wizara ya Kilimo katika mwaka huu wa fedha ambapo alisema bajeti ya jumla ya utafiti ndani ya wizara hiyo imeongezwa kutoka shilingi bilioni 11.  mwaka 2021/2022 hadi  kufikia kiasi cha shilingi bilioni 39. 

Awali, Mkurugenzi Mtendaji Mkuu wa TaCRI (EDR), Dk. Deusdedit Kilambo alisema Taasisi hiyo kwa kushirikiana na wadau wengine inalenga kutekeleza agizo la Serikali la kuzalisha zaidi ya miche milioni 20 ya kahawa ambayo itasambazwa kwa wakulima na baadaye kuongeza uzalishaji wa kahawa nchini. 

“Mikakati iliyopo ambayo itatuwezesha kufikia azma hiyo ni pamoja na kuwekeza katika maeneo mapya ya uzalishaji wa kahawa ambayo yameainishwa na wataalamu kama Sirari mkoani Mara pamoja na Mkoa wa Morogoro”, alisema.

Kuhusu uzalishaji wa milioni 20 kwa ajili ya miche ya Arabika na Robusta kama ilivyoelekezwa na Serikali, Dk. Kilambo alisema kuwa taasisi hiyo iko tayari kutekeleza agizo hilo, ambapo aliishukuru Serikali kwa kutenga fedha zaidi kwa ajili ya bajeti ya taasisi hiyo.

“Kwa kushirikiana na Bodi ya Kahawa Tanzania (TCB), nakuhakikishia Naibu Waziri kuwa tutafikia lengo la kuzalisha zaidi ya miche milioni 20 bila shaka yoyote kuanzia mwaka 2022/2023”, alisema.