Lions Club Moshi Kibo yakabidhi Chuo cha Ufundi Msandaka, Wahisani wa Ubelgiji wafurahia matunda ya kazi yao

Lions Club Moshi Kibo imekabidhi jengo la Chuo cha Ufundi Stadi katika Shule ya Viziwi ya Msandaka hivyo kuweka ya kwanza Tanzania kwa shule za msingi mahitaji maalum kuwa na chuo cha ufundi stadi.

Ufunguzi wa Chuo hicho cha ufundi stadi ulifanywa na Mkurugenzi wa Elimu Mahitaji Maalum Tanzania Dkt. Magreth Matonya.

Katika hotuba yake Dkt. Matonya aliwashukuru wahisani kwa mchango mkubwa walioutoa kufanikisha ujenzi wa Chuo cha Ufundi Stadi Msandaka.

“Tumekuta hapa wanajifunza ufundi cherehani, wanajifunza ufundi seremala, tumeona wanatengeneza viti vizuri, stuli nzuri lakini wana vifaa vya kisasa ambavyo wamepewa na wahisani kutoka Lions Club International, kituo hiki ni muhimu sana,” alisema Dkt. Matonya.

Aidha Dkt. Matonya alisema uwepo wa Chuo hicho kilichojengwa kwa zaidi ya shilingi mil. 700 utaifungua jamii kwa wanafunzi wenye mahitaji maalum.

Awali mratibu wa Viziwi Tanzania Selemani Chamshama alisema miaka ya hivi karibuni mtazamo wa jamii kuhusu wanafunzi wenye uhitaji maalum umebadilika na kuwa chanya ukilinganisha na miaka mingi iliyopita.

“Chuo hiki ni adimu kwa nchi yetu. Kama mnavyokumbuka miaka ya nyuma jamii ilikuwa haina uelewa mkubwa juu ya wanafunzi viziwi lakini sasa kumekuwa na uelewa mkubwa juu ya wanafunzi wenye ulemavu hususani viziwi,” alisema Chamshama.

Kwa upande wake Mkurugenzi wa Manispaa ya Moshi Rashid Gembe alisema haikuwa kazi rahisi kupatikana kwa chuo hicho cha ufundi stadi Msandaka.

“Shule hii ilipata usajili baada ya kupitia changamoto mbalimbali na kuwezesha kuzitatua. Ofisi ya Mkurugenzi (Manispaa ya Moshi) inatoa shukrani za dhati kwa ufadhili mkubwa kutoka Lions Club Moshi kwa kushirikiana na wadau wengine kuwa na wazo la kujenga chuo cha ufundi,” alisema Gembe.

Aidha Gavana wa Wilaya wa Lions Club aliyepo Tanzania Mustansir GhulamHussein alitoa shukrani zake za dhati kwa Lions Club wa Ubelgiji kwa kufanikisha ujenzi wa chuo hicho.

“Ni matumaini yetu kuwa mtaendelea kutuunga mkono, Pamoja tumesimama na Pamoja tumeuungana…ndoto tuliyoota pamoja sasa imekuwa halisi,” alisema GhulamHussein.

Hata hivyo Profesa Jerome Sheridan kutoka Ubelgiji alisema elimu ndiyo kitu muhimu cha kuwasaidia wenye mahitaji maalum kutokana na changamoto wanazopitia.

“Ndugu wanafunzi, chuo chenu cha ufundi stadi sasa ni halisi. Kwanini tumefanya hivi? Kwasababu tuna imani nanyi…licha ya changamoto lakini mnaweza kuzikabili endapo mtasoma katika chuo hiki,” alisema.

Aidha Profesa Sheridan alisisitiza kuwa chuo cha ufundi Stadi Msandaka kitaenda mbali zaidi ya kujihusisha na kilimo ili kuwajengea uwezo zaidi wanafunzi wenye mahitaji maalum.

“Kilimo ni muhimu lakini chuo hiki cha ufundi kitaenda mbali zaidi ya kilimo kwa kuwapatia ujuzi mwingine ili wajitegemee katika maisha yao,” alisema Prof. Jerome

Mbali na hilo Mkuu wa shule ya Viziwi Msandaka Rosada Shayo alisema sababu kubwa ya kuanzisha ujenzi wa chuo hicho ni baada ya kubaini kuwa wanafunzi wao wanapomaliza shule ya msingi na kujiunga na sekondari wanapofika kidato cha pili hurudishwa nyumbani kutokana na matokeo mabaya hivyo kuangukia tena katika changamoto.

Mwenyekiti wa Lions Club Moshi Kibo Sarah Mandara Jones na Katibu wake Inderjeet Rehal walitoa shukrani zao kwa wote walioshiriki kufikia mafanikio hayo.

“Asante sana  kwa kile mlichofanya kwa ajili ya Msandaka; mtakumbukwa kwa miaka mingi ijayo, katika historia ya Msandaka majina yenu siku zote yatakuwa yakiandikwa. Asante sana.”

 MORE PHOTOS OF THE EVENT CLICK HERE: MSANDAKA VTC

Read More

PICHA: Lions Club Moshi Kibo yakabidhi jengo la Chuo cha Ufundi Msandaka, wahisani wa Ubelgiji wafurahia uwekezaji uliofanywa

 

Read More

Usangi Day yaongoza Kilimanjaro kidato cha Sita 2022

Shule mbili za  sekondari za  Kata Wilayani Mwanga mkoani Kilimanjaro, zimeibuka kidedea baada ya kushika nafasi ya kwanza na ya pili kimkoa katika matokeo ya mitihani ya kidato cha sita mwaka 2022.

Akitoa tathmini ya matokeo hayo Julai 22,2022 Mkurugenzi wa Halmashauri ya Wilaya ya Mwanga Bi. Mwajumba Nasombe, amezitaja shule hizo kuwa ni shule ya sekondari Usangi day  iliyoshika nafasi ya kwanza kiwilaya na kimkoa na shule ya sekondari ya Vudoi iliyoshika nafasi ya pili.

Amesema shule ya sekondari ya Usangi day, imeshika nafasi ya kwanza kiwilaya na Kimkoa, ambapo kitaifa imeshika nafasi ya 18,  na kuongeza kuwa jumla ya watahiniwa 133 sawa na asilimia 93.7 walipata ufaulu wa daraja la kwanza na tisa sawa na asilimia 6.3 walipata daraja la pili.

Nasombe amesema kuwa jumla ya watahiniwa 829 katika wilaya hiyo walifanya mtihani huo kutoka  shule 11 za wilaya hiyo ambapo amesema kati ya shule hizo sita ni za Serikali na tano ni shule za kibinafsi, ambapo pia alitumia fursa hiyo kutoa ujumbe kwa shule zinazomilikiwa na watu.

Wakizungumza kwa nyakati tofauti wanafunzi wa shule ya sekondari ya wasichana ya Usangi day, Irene Lema, Joyce Bashungwa na Hosiana Mziray,  wamesema moja ya changamoto inayowakabili shule hipo ni pamoja na ukosefu wa walimu wa mchepuo  wa sayansi, vitabu masomo ya biashara, bwalo la chakula pamoja na uchakavu wa miundomnbinu ya majengo ya shule.

Kwa upande wake afisa elimu sekondari wilaya ya Mwanga Ashimun Reuben Mnzava,  amewapongeza walimu kwa kushirikiana katika malezi na usimamizi wa masomo kwa wanafunzi wote na kuwataka waendeleze mbinu hizo kwa wanafunzi wengine waliobaki ili wilaya ya Mwanga ije kushikea nafasi ya juu kitaifa.

Awali akisoma taarifa kwa Mkurugenzi wa halmashauri hiyo, Mkuu wa Shule ya Sekondari ya Usangi day Emmanuel  Masanja, amesema kuwa shule hiyo imeendelea kufanya vizuri kwenye mitahihani ya kitaifa kutokana na matokeo ya watahiniwa wa shule hiyo kuendelea kuwa mazuri kila mwaka.

Masanja amesema kuwa mbali na mafanikio hayo ambayo amesema yanaendelea kukua mwaka hadi mwaka, bado  shule hiyo, inakabiliwa na changamoto kadhaa ambazo amesema ni pamoja na ukosefu wa bwalo na maktaba shuleni hapo.

Aidha mkuu huyo wa shule ameipongeza serikali kwa miradi iliyotekelezwa shuleni hapo kupitia fedha za mfuko wa Uviko-19 ambapo shule hiyo ilipata madarasa mawili, matundu 12 ya vyoo, ongezeko la kiwango cha maji pamoja na ujenzi wa miundombinu ya kunawia mikono.

Read More

Kata, Vijiji vyatakiwa kuendelea kuhamasisha watu kuhesabiwa Agosti 23

Viongozi wa ngazi ya kata na vijiji watakiwa  kuendelea kuhamasisha wananchi kwenye maeneo yao  washiriki kuhesabiwa kwenye Sensa  ya Watu na Makazi itakalofanyika Agost 23 mwa huu.

Hayo yalibainishwa na baadhi ya makarani wa  Sensa  ngazi ya mkoa wa Kilimanjaro mara baada ya kufanya mafunzo ya majaribio  ya kutambua mipaka  ya maeneo wakati wa kuhesabu watu kwenye kata ya Mabogini  iliyopo wilaya ya Moshi vijijini na kata ya Pasua iliyoko halmashauri ya Manispa ya Moshi.

Karani wa sensa Agnes Mchau, alisema mafunzo hayo yalilenga kuandaa dodoso la jamii ili kuona changamoto na huduma zinazopatikana kwenye jamii husika, hivyo akatoa wito kwa viongozi wa kata na vijiji kuendelea kuwahamasisha wananchi washiriki kuhesabiwa.

“Ziara yetu ya mafunzo kwa vitendo yalilenga kuangalia dodoso la jamii ili kuona huduma gani zinazopatikana kwenye jmaii husika, kuna changamoto ambazo tumekutana nazo mfano ramani inakuonesha kwamba eneo hili linatakiwa lianzie hapa na kuishia mahali flani, unapofika katika eneo husika unakuta yule kiongozi anayewaonesha mipaka hiyo anahisi kama mnataka kumnyang’anya baadhi ya mipaka na kuipeleka kwingine,”alisema Agnes.

“Tulikwa kwenye mafunzo kwa vitendo ambapo tulitembelea kata za Kibosho na kata ya Mabogini na Pasua, mafunzo kwa vitendo yalikuwa mazuri, kwasababu yalituimarisha vizuri na tukiri kwamba tulikutana na baadhi ya changamoto kadhaa lakini changamoto hizo zilikuwa sehemu ya kutuimarisha zaidi,”alisema Mwalimu Yateri.

Naye Peter Msaka alisema mafunzo hayo ya sensa kwa vitendo yalikuwa yamelenga makarani kuitambua mipaka ya maeneo husika watakayokwenda kuhesabu watu wakati wa zoezi la sense ya watu itkapofika.

“Kimsingi mafunzo haya yametujengea uwezo wa kutosha kwa kuwa kila karani atakuwa na eneo lake hivyo kwenda kujua eneo lake na mipaka inapoishia ni muhimu, vinginevyo kama atashindwa kuitambua mipaka yake anaweza kusababisha mtu kuhesabiwa mara mbili,”alisema Msaka.

Kwa upande wake Mratibu wa Sensa mkoa wa Kilimanjaro Albert Aloyce Kulwa alisema zaidi ya washiriki 292 wa mafunzo wameanza mafunzo ya majaribio kwa njia ya vitendo ambapo watakwenda katika Kata tatu  za Manispaa ya Moshi pamoja na Kata mbili zilizoko Wilaya ya Moshi Vijijini, ili kuhoji dodoso la jamii, litakaloambatana na  kutambua mipaka  eneo husika, kuzipima nyenzo ambazo wamejifunza kwa vitendo kila mtu aweze kutambua mipaka ya ramani husika.

“Sensa ya Watu na Makazi inasaidia kupata idadi kamili ya watu walio kwenye eneo husika hivyo hata mafungu ya fedha yanayotolewa na serikali kwa ajili ya miradi mbalimbali ya maendeleo yanatoka kulingana na idadi ya watu, hivyo ni lazima wahesabiwe kwa ajili ya maendeleo yao.

Sensa ya mwaka huu itakuwa ya sita  kufanyika nchini baada ya Muungano wa Tanganyika na Zanzibar mwaka 1964 ambapo sensa nyingine zilifanyika mwaka 1967, 1978, 1988, 2002 na 2012.

Read More

Ithibati ya Kimataifa Hospitali ya Kibong'oto mkombozi kwa Watanzania

Mkurugenzi Mkuu wa Hospitali Maalum ya Afya ya Jamii na Magonjwa Ambukizi ya Kibong’oto Dkt. Leonard Subi  

Hospitali Maalum ya Afya ya Jamii na Magonjwa Ambukizi ya Kibong’oto, Siha mkoani Kilimanjaro imejizolea ithibati nne za kimataifa hatua ambayo itakuwa mkombozi kwa watanzania waliokuwa wakipeleka sampuli zao nje ya nchi kwa ajili ya kuzichakata.

Akizungumza na waandishi wa habari Mkurugenzi Mkuu wa hospitali hiyo Dkt. Leonard Subi alisema hatua ambayo makamu wa Rais wa Jamhuri ya Muungano wa Tanzania kufungua Maabara ya Kisasa hospitalini hapo ni ukombozi kwa watanzania waliokuwa wakienda nje ya nchi kupeleka sampuli za magonjwa ambukizi  kwa ajili ya kuzichakata.

“Hautapeleka sampuli nje, kwa mfano uliyokuwa ukipeleka nje kwa shilingi laki moja sasa unaweza kupata kwa shilingi elfu arobaini au elfu hamsini ndani ya nchi bila usumbufu kwasababu huduma kama hiyo inafanyika hapa Kibong’oto,” alisema Dkt. Subi.

Dkt. Subi alisema uchunguzi wa magonjwa ya ini, figo, moyo yatakuwa yakifanyika katika hospitali hiyo ya Afya ya Jamii.

“Mimi na wataalamu wenzangu tumeweza kupata ithibati nyingine ya kimataifa kutoka vipimo vinne hadi 28, kwa maana sasa majibu tutakayokuwa tunayatoa Kibong’oto katika eneo la Kemia Uhai yatakuwa yanatambulika kimataifa,” alisema Dkt. Subi

Aidha Dkt. Subi alisema ithibati nyingine wameipata katika eneo la seololojia ikiwa na maana ya kuangalia kinga za mwili.

“Kama mnavyofahamu unapochukua damu ukizungusha kidogo utaona majimaji yanayobaki juu, hayo ni kinga ya mwili, na penyewe tumepata ithibati,” alisema.

Hospitali ya Kibong’oto imepata ithibati ya tatu katika uchunguzi wa kifua kikuu cha kawaida na kifua kikuu sugu.

Dkt. Subi aliongeza, “Pia tumepata ithibati ya kimataifa katika uchunguzi wa sampuli za magonjwa yoyote yanayosababishwa na vimelea aina ya protozoa kwa maana ya parasaitoloji au vidudu vingine vya parasaitoloji vinavyosababisha maradhi kama malaria.”

Hospitali hiyo ya maalum ya Kibong’oto imepata ithibati nyingine katika uchunguzi wa vijidudu vidogo vidogo hususani kwenye uoteshaji na kuvichakata kwa maana ya microbaolojia.

“Tumemuahidi Makamu wa Rais (Dkt. Philip Mpango) kuwa vipimo vyote vinavyotolewa katika hospitali hii vinapata ithibati ya kimataifa,” alisisitiza Dkt. Subi.

Julai 16, 2022 Makamu wa Rais Dkt. Mpango alifungua jengo jipya la kisasa la Maabara katika Hospitali Maalum Kibong’oto ambapo wataalamu hospitalini hapo watajikita kuangalia vimelea na kufuatilia magonjwa ya kuambukiza nchini na ulimwengu kwa ujumla.

Read More

Chifu Mhelamwana apendekeza cheo cha Urais kifutwe kitumike Malkia katiba mpya

 

Chifu Frank Marealle (kushoto) akipokea fimbo ya uchifu kutoka kwa Chifu Omary Mwariko Mhelamwana katika hafla fupi ya kukabidhiwa iliyofanyika Marangu mkoani Kilimanjaro 

Kutokana na utendaji wa kazi wa Rais wa awamu ya sita Samia Suluhu Hassan ndani na nje ya Jamhuri ya Muungano wa Tanzania, Chifu wa Kizigua Omary Mwariko ‘Mhelamwana’ amependekeza cheo cha Rais kifutwe na kiwepo cha malkia.

Akizungumza wakati wa hafla fupi ya kumkabidhi fimbo Mwenyekiti wa Umoja wa Machifu na Wazee wa Mila na Desturi Tanzania (UMT) Frank Marealle, Chifu Mhelamwana alisema, “Nimefikiria kwa machifu wenzangu, tugeuze jina la Rais (Samia Suluhu) naye akapata heshima ya kuitwa Malkia wa Tanzania.”

Chifu Mhelamwana alisema jamii zilizo nyingi barani Afrika zimekuwa zikimkandamiza mwanamke na kumuona sio chochote kwa muda mrefu sasa hivyo ni vema Tanzania ikaongeza juhudi dhidi ya mapambano hayo kwa vitendo.

“Hii ndio sababu ya kutaka mama huyu (Rais Samia  Suluhu) aitwe malkia na iwe mwanzo wa kumpa nafasi mwanamke wa kushika nyadhifa za juu katika serikali,” alisema.

Chifu Mhelamwana aliongeza, ‘Sisi machif tunapendekeza Rais Samia aitwe Malkia wa Tanzania, kwasababu ndiye mwanamke pekee na wa aina yake na hata barani Afrika iwe inasikika hivyo. Sio kwamba yeye alipenda hivyo, ni kwamba aliandikiwa na Mungu.”

Aidha chifu huyo alisisitiza Waingereza licha ya kuitawala ardhi ya Tanzania lakini bado hawakumpa nafasi mwanamke wakati wao kwa miaka mingi wamekuwa wakiongozwa na Malkia.

“Malkia Elizabeth ni mfano mzuri kwa waingereza katika ardhi yao, cheo cha juu kabisa ambacho ni lazima awe mwanamke, sisi hapa Afrika tunataka tuwe wa kwanza ili kuondoa ukandamizaji wa wanawake kwenye jamii zetu,” alisisitiza chifu huyo.

Chifu huyo alisema katika mchakato wa kupata katiba mpya unavyoiendelea ni vema cheo cha malkia kikapata nafasi na kuvunja utaratibu wa miaka mingi ambao umeshindwa kumsaidia mtanzania na kuwafaidisha wachache.

“Sisi hatutaki tena wanaume watawale hata kama mimi mwenyewe ni mwanaume…hili tunalitaka katika katiba mpya liingie , licha ya kwamba wengi wanataka apatikane Rais Mwanaume,” alisema Chifu Mhelamwana.

Awali wakati akikabidhi fimbo yake kwa mwenyekiti wa UMT, Chifu Mhelamwana alisema, “ Mimi Chifu Omary Mhelamwana natoa fimbo hii iliyo takatifu kwa ajili ya shughuli za uchifu wa Marealle .”

Kwa upande wake Chifu Marealle alisema, “Wewe umenijengea heshima kubwa sana ya kunikabidhi fimbo hii. Asante Sana , Asante Sana; Tumekuwa tukifanya mikutano mikuu ya machifu ya kila mwaka , sijawahi  kupokea zawadi yoyote kutoka kwa machifu.”

Chifu Mhelamwana  ndiye aliyetengeneza kifimbo cha baba wa Taifa Mwalimu Julius Kambarage Nyerere (1922-1999) na kukabidhi kwa ajili ya uongozi wa taifa hili.

Mwaka 2021 Chifu alipendekeza kuwapo kwa noti ya shilingi 50,000 au shilingi 100,000 ambayo itakuwa na picha ya Rais wa awamu ya Tano wa Tanzania Dkt. John Pombe Magufuli kutokana kazi alizozifanya.

Read More

Chipsi ya 2500 yaondoa uhai wa Mmasai

Wakazi wa Kijiji cha Uchira, wilayani Moshi wakitoa heshima zao za mwisho kwa marehemu Yohana Laizer (30) aliyeuawa kwa  kudhaniwa kuwa ni mwizi (Picha na Kija Elias).

 Wahenga walisema “Ukistaajabu ya Musa, utayaona ya Firauni”, ndivyo unavyoweza kusema katika tukio la Mmasai mmoja kuuawa kwa kile kinachodaiwa kuwa ni katika harakati za kudai fedha yake iliyobaki (chenji) baada ya kula chipsi za shilingi 2500. 

Kijana mjasiriamali anayefahamika kwa jina la Yohana Laizer (30) mkazi wa Uchira wilayani Moshi mkoani Kilimanjaro ameuawa kwa kipigo kutoka kwa walinzi wa baa moja iliyopo karibu na soko la Uchira akidhaniwa kuwa ni mwizi. 

Ilikua hivi, usiku wa Julai 13, 2022  majira ya saa nane usiku walinzi hao walimkamata Laizer na kuanza kumpa kipigo na kwa madai ya kuwa ni mwizi na baadaye kumtembeza katika maeneo ya kijiji huku mwili wake ukiwa umetapakaa damu hatimaye kumtelekeza pembezoni mwa barabara kuu ya Moshi –Arusha. 

Laizer ambaye alikuwa mbebaji wa mizigo ‘Kibega’ katika soko la Uchira inadaiwa majira ya mchana wa Julai 13 alikwenda katika baa hiyo ambayo hukaanga na kuuza chipsi, aliagiza kiasi cha kumtosha cha shilingi 2500, hatimaye alitoa shilingi 10,000. 

Baada ya kutoa kiasi hicho cha fedha aliambiwa na muuzaji wa chipsi kuwa hana fedha ya kumrudishia (chenji) hivyo aje baadaye kuchukua kiasi cha fedha kilichobaki. 

Mashuhuda wa tukio hilo walisema, marehemu kwasababu alikuwa akifahamika na sio mara yake ya kwanza kwenda kula hapo aliondoka akitarajia baadaye aje achukue kiasi cha fedha kilichobaki.

Hata hivyo marehemu alirudi usiku baada ya kumaliza kazi zake za kujitafutia kipato na kwenda kwa muuzaji wa chipsi akiwa na matumaini ya kuchukua kiasi cha fedha kilichobaki, lakini hali haikuwa hivyo. 

Shuhuda mmoja (jina tunalihifadhi), alisema marehemu alipohitaji kiasi cha fedha kilichobaki aligeuziwa kibao kuwa hakuna fedha yoyote aliyoiacha baada ya kula chipsi 

“Mzozo uliibuka baina yao, ambapo muuza chipsi alimgeuzia kibao, na kuanza kupiga kelele za mwizi ambapo watu wasiojulikana wakimo walinzi walimtoa nje na kuanza kumpa kipondo,” alisema shuhuda huyo. 

Hata hivyo inadaiwa kuwa mzozo huo uliendelea mpaka majira ya usiku ambapo mashuhuda walidai walinzi wa baa hiyo wanahusika moja kwa moja na mauaji ya kijana huyo. 

"Walifika karibu na nyumbani kwangu majira ya saa nane, saa tisa usiku hivi, watu waliposikia makelele walikuja tulifungua mlango tukawakuta vijana waliokua wanampiga marehemu kisha wakamuuliza marehemu Said uliyekuwa naye ndiye huyu, marehemu alikataa na kusema sikuwa na Said, msinilazimishe nimtaje mtu wakati sikuwa naye, alipowajibu hivyo ndipo waliendelea kumpa kipigo, "alisema shuhuda aliyejitambulisha kwa jina la Said Msangi. 

Shuhuda huyo alisema baada ya marehemu kukataa kumtaja aliyekuwa naye aliwataka vijana waliokuwa wanampiga marehemu kumchukua  na kuondoka naye kwani marehemu alikuwa tayari ameishiwa nguvu. 

"Niliwaambia waondoke na mtu wao maana walinikuta nyumbani na familia yangu, wakamchukua na kumtembeza kwenye baadhi ya maeneo na kisha wakamtelekeza barabara kuu, ambapo asubuhi  tuliukuta mwili wake pembezoni mwa barabara, hakuna aliyemgusa hadi Polisi walipokuja kuchukua," alisema Msangi. 

Elizabeth Kimario, mkazi wa kijiji hicho alionyesha kushangazwa na mauaji hayo kutokana na kijana huyo kutokuwa na historia ya udokozi katika kazi zake za ujasiriamali sokoni hapo. 

"Tulishangaa kusikia kuwa alipigwa na ameuwawa kwasababu kaiba lakini hatujawahi kusikia kama ana tabia ya wizi, hajawahi kuiba kitu cha mtu,  alikuwa mwaminifu maana  anaweza kupewa laki mbili hadi tatu akanunue mizigo ya watu ya dukani, hata siku moja hatujawahi kusikia tukio lake la wizi hapa mtaani," alisema Kimario. 

Mwili wa marehemu ulichukuliwa na jeshi la polisi mkoani Kilimanjaro mnamo Julai 14, 2022 na kuhifadhiwa katika hospitali ya KCMC kwa uchunguzi zaidi. 

Ndugu wa marehemu kutoka Ngage Simanjiro mkoani Manyara walipata taarifa za kifo cha ndugu yao Julai 15, 2022 na kufunga safari kwa ajili ya kujua sababu za kifo cha kijana wao. 

Msemaji wa familia hiyo, Saitoti Karuduni alisema kuwa familia imepokea kwa masikitiko taarifa za kifo cha ndugu yao ambaye amekatishwa uhai wake na kuiomba serikali  kulivalia njuga suala la watu kujichukulia  sheria mkononi . 

" Leo hii ameuawa ndugu yangu, serikali isipolivalia njuga kesho atauwawa mwingine  asiye na hatia, niombe sana  vyombo vya ulinzi na usalama vichukue hatua ili waliokatisha uhai wa ndugu yetu waweze kupatikana" alisema Saitoti. 

Mwenyekiti wa kijiji hicho  Julius mkojera alisema kuwa kilichofanyika  kukatisha uhai wa Laizer ni  ukatili ambao umepelekea watu kujichukulia sheria mkononi. 

Aliongeza kuwa iwapo kijana Laizer alikua amefanya uhalifu wowote ilipaswa kupelekwa kwenye ofisi ya serikali ili hatua  za kisheria zichukuliwe lakini sio kuchukua sheria Mkononi. 

"Napenda kumwambia  kuwa serikali ina mkono mrefu sana, hivyo kwa waliohusika tuwaachie mahakama na polisi waendelee na uchunguzi wao ili haki ya ndugu yetu  Yohana iweze kupatikana" 

Akiongoza ibada ya kuuaga mwili wa kijana huyo Mchungaji  wa Kanisa la Uamsho, Uchira  Meshack Karani ameitaka jamii kuwa na hofu ya Mungu na kuacha kujichukulia sheria mkononi  kwani hatua hiyo ni hatari na haimpendezi Mungu. 

"Sote tumeumbwa kwa sura na mfano wa Mungu,  hatupaswi kuchukua sheria Mkononi, ipo serikali, vipo vyombo vya ulinzi na Usalama, tuviache vifanye kazi yake, Tupendane  pia, upendo ungekuwepo leo hii tusingekatisha uhai wa kijana huyu asiye na hatia. 

Wahenga hawakukaa kimya “Mla kuku wa mwenziwe miguu humwelekea” ndivyo Jeshi la Polisi mkoani Kilimanjaro kupitia  Kamishna Msaidizi Mwandamizi wa Jeshi la Polisi (ACP) Simon Maigwa alithibitisha kuwakamata watu ambao hakutaja idadi yake kuhusika na mauaji ya Mmasai huyo kwa ajili ya hatua zaidi za kisheria.

Mchungaji  wa Kanisa la Uamsho, Meshack Karani, akiongoza ibada ya kuuaga mwili wa Yohana Laizer  (30) aliyeuawa kwa kudhaniwa kuwa mwizi. (Picha na Kija Elias).

 

Read More