Mwaka mmoja jela kwa kutelekeza familia

Mahakama ya Mwanzo Mjini Moshi imemhukumu mwanaume mmoja mkoani Kilimanjaro kwenda jela mwaka mmoja kwa kosa la kutelekeza familia yake. Akitoa hukumu hiyo Hakimu Mkazi Adnani Kingazi alisema mshtakiwa anayefahamika kwa jina Dickson Ndimangwa Mbwambo (54) mkazi wa Moshi aliitoroka familia yake miaka tisa iliyopita na kumuacha mkewe aliyefahamika kwa jina la Frida Evarist Mushi (43) akitaabika na watoto. 

Awali ilidaiwa mahakama hapo kuwa mshtakiwa huyo alikuwa akiishi na mwanamke huyo maeneo ya Longuo A wilayani Moshi lakini akatoweka kusikojulikana bila sababu yoyote ya msingi. 

Dickson alikuja kuonekana baada ya kutokea kwa msiba wa mmojawapo wa watoto wake ambaye alifariki baada ya kugongwa na gari wakati akienda shuleni. Ilidaiwa mahakamani hapo mtoto aliyefahamika kwa jina la Evarist ambaye ni miongoni mwa watoto sita aliozaa na mwanamke huyo alipoteza maisha mwaka 2018. Baada ya msiba kutokea mshtakiwa alijitokeza kuzika na ndipo polisi ilipomsubiri afanye mazishi hayo kisha kumtia mikononi. 

Ilielezwa mahakamani hapo kuwa mshtakiwa alipokamatwa alipelekwa kwa Ustawi wa Jamii kutokana na kwamba muda wote aliotoweka hakuwahi kutoa hata senti kwa ajili ya kuitunza familia yake.

Walipofika Ustawi wa jamii walifikia makubaliano kwamba anapaswa kutoa 200,000 kila mwezi kwa ajili ya matunzo ya familia lakini hadi anapandishwa kizimbani tarehe 7 Mei 2019 alikuwa hajatoa kiasi chochote cha fedha. Mshtakiwa alijitetea baada ya adhabu hiyo kutolewa ambapo alidai kuwa kilichomwondoa nyumbani ilikuwa ni ugomvi baina yake na mkewe na kwamba anaiomba mahakama impunguzie adhabu kwani amezaa watoto sita na mlalamikaji na bado wanapendana.

Aidha mshtakiwa alidai kuwa ana wazazi hawajiwezi na wanamtegemea na kwamba kazi yake ni mpasua mbao. Ilielezwa mahakamani hapo kuwa mshtakiwa alifunga ndoa halali mwaka 1993 na kisha kumtelekeza mwanamke huyo mwaka 2009.