Mume adai talaka mahakamani baada ya kutelekeza kwa miaka 12

Mahakama ya Mwanzo ya Moshi Mjini mkoani Kilimanjaro imetoa talaka baada ya mdai ambaye ni mwanaume mkazi wa Himo kuieleza mahakama hiyo kuwa mdaiwa ambaye ni mwanamke alimtelekeza kwa muda mrefu na kumwachia watoto bila kujua wanaishi vipi wala kula nini. 

Hayo yamejiri baada ya mdai aliyefahamika kwa jina la Solomon George Mongi (60) kudai talaka dhidi ya Marry Benjamin Shayo. Hakimu Mkazi wa mahakama hiyo Adnan Kingazi alisema mahakama baada ya kupokea ushahidi ilijiuliza hoja za msingi kama ndoa ilikuwa ya halali kati ya mdai na mdaiwa; kama kuna mgogoro kati ya wanandoa hao na jitihada za kuusuluhisha zimefanyika bila mafanikio. 

Pia ilielezwa mahakamani hapo kama mdai anazo sababu za kisheria pamoja na ushahidi wa kutosha kuthibitisha kuwa ndoa yao imevunjika moja kwa moka na kama anastahili talaka; 

Aidha mahakama ilijiuliza kama kuna ushahidi wa mali walizochuma pamoja wanandoa hao na kwamba nani mwenye wajibu wa kutunza na kuishi na watoto waliozaliwa na wanandoa hao. Hakimu Mkazi Kingazi alisema baada ya mahakama kuchambua kwa kina hoja hizo ilibaini kuwa mdai baada ya kuthibitisha madai yake ya talaka kupitia Kifungu cha 101 cha Sheria ya Ndoa za Mwaka 1971 kinachosema, “ Si ruhusa kwa mtu yeyote kufungua madai ya talaka isipokuwa tu pale atakapokuwa ametanguliza kuupeleka mgogoro wao wa ndoa kwenye Baraza la Usuluhishi wa Ndoa na Baraza hilo kutoa hati ya kuthibitisha kuwa imeshindwa kuwasuluhisha wanandoa hao.” 

Kingazi alisema kifungu cha 110 (1) cha Sheria ya Ndoa ya Mwaka 1971 kimeridhia maombi ya mdai kuwa anastahili kupewa talaka.  Mbali na maamuzi ambayo mdai alipata stahili ya talaka yake mahakama hiyo iliamuru kufanywa kwa tathmini ya nyumba mbili za wadaawa ili ziuzwe kisheria na hatimaye wadaawa hao wagawane kiasi kitakachopatikana.  

Aidha mahakama iliamuru taratibu za kusajili talaka na kuondoa usajili wa ndoa ya wadaawa kwenye mamlaka husika zifanyike na Mdaiwa amlipe mdai gharama za shauri hilo pamoja na usumbufu wote uliojitokeza tangu alipomtelekeza na watoto mwaka 2007 amekaa mpweke kwa miaka 12 sasa. 

Awali Mdai aliwasilisha shauri la Madai ya Talaka na  mgawanyo wa mali katika mahakama hiyo kwamba mdaiwa alikosa uaminifu kipindi chote cha ndoa. Ilidaiwa mahakamani hapo kwamba kipindi chote cha shauri hilo mdaiwa alipuuzia wito wa mahakama hivyo shauri hilo likasikilizwa upande mmoja. 

Ilidaiwa mahakamani hapo  Mdai alishawahi kumfumania mdaiwa akiwa na mwanaume maeneo ya stendi kubwa ya Moshi wakiwa  kwenye teksi na kwamba kama asingekuwa uvumilivu angeweza kufa kwa pressure kwani mdaiwa alifikia hatua ya kutaka kuuza nyumba yao iliyopo Pasua. 

Ilidaiwa mahakamani hapo Mdai alipeleka shauri lake katika Baraza la Usuluhishi la Kata ya Bomambuzi  Matindigani lakini mdaiwa alikataa kuitia wito wa baraza hilo.

Mdai ambaye ni fundi magari alifunga ndoa takatifu ya Kikristo tarehe 4 Februari 1998 katika Kanisa la Kilutheri  la Samanga  na kubahatika kupata watoto watatu ambao ni John (34), Benjamin (25) na Praygod (19).

STORY BY: Jabir Johnson