Umoja wa Machifu Tanzania watoa pole kifo cha JPM

 

Dkt. John Pombe Magufuli (1959-2021) enzi za uhai wake.

Umoja wa Machifu Tanzania (UMT) na viongozi wa mila na desturi kutoka makabila mbalimbali nchini wametoa salamu za pole kwa Rais wa Jamhuri ya Muungano wa Tanzania Samia Suluhu Hassan, Mama Janeth Magufuli na kwa watanzania wote kutokana na kifo cha Rais wa awamu ya tano Dkt. John Pombe Magufuli kilichotokea Machi 17 mwaka huu.

Akizungumza na waandishi wa habari Mwenyekiti wa UMT Chifu Frank Marealle alisema umoja huo wa machifu nchini umepokea kwa masikitiko makubwa taarifa za kifo cha Rais mchapakazi wa awamu ya tano Dkt. Magufuli anayetarajiwa kuzikwa Machi 26 mwaka huu.

“Tunatoa pole kwa Rais mpya wa Jamhuri ya Muungano wa Tanzania Mheshimiwa Samia Suluhu Hassan, tunatoa pole kwa Mama Janeth Magufuli, watoto na jamii yote husika, tunatoa pole kwa Watanzania na kwa Waafrika wote popote walipo duniani,” alisema Chifu Marealle.

Chifu Marealle mwenye umri wa miaka 85  alisema  UMT inamshukuru Mwenyezi Mungu kwa zawadi ya maisha ya Hayati Rais Magufuli kwa uongozi, uzalendo, uthubutu, utendaji na maamuzi yake yalikuwa ni le oleo, hapakuwa na njoo kesho katika kipindi cha uongozi wake.

Aidha UMT ilisema itaendelea kufanya maombi kwa ajili ya Rais mpya wa Jamhuri ya Muungano wa Tanzania, familia ya marehemu na watanzania wote kutokana na msiba mzito wa kwanza kulikumba taifa.

Aidha umoja huo ulitoa rai yake kwa viongozi wa serikali kuyaendeleza mema aliyokuwa amedhamiria Dkt. Magufuli na kwamba UMT itakuwa kipaumbele kutoa ushirikiano wa hali na mali kwa Rais mpya katika kuijenga Tanzania.

Kwa upande wake Chifu wa Waha, Ntware Isambe G. Lugaliburiho alisema kwamba wamejifunza uzalendo wa Dkt. Magufuli wa kujali vya nyumbani hususani pale alipoamua kuliita soko kuu la Morogoro jina la Chifu wa Waluguru Chifu Kingalu.

Aidha Chifu Gilbert Shangali wa Hai/Machame alisema wamekubaliana na hali iliyolikumba taifa kwa moyo wa huzuni lakini wamechukua ujasiri mkubwa wa maamuzi aliyokuwa akiyafanya Dkt. Magufuli enzi za utawala wake wa miaka sita.

UMT ulianzishwa muongo mmoja uliopita kwa madhumuni ya kurudisha utawala wa zamani wa machifu, ambao ulikuwa hatarini kupotea kutokana na jamii kupenda tamaduni nyingine na kusahau tamaduni za kwao.

Mwenyekiti wa UMT Chifu Frank Marealle (katikati) akizungumza na waandishi wa habari,

mnamo Machi 22, 2021 nyumbani kwake mjini Moshi;

wakati akitoa pole za kifo cha Rais wa awamu ya tano Dkt. John Pombe Magufuli. (Picha na Kija Elias)

 

 

Read More

MAKTABA YA JAIZMELA: Samuel Eto'o ni nani?

Machi 10, 1981 alizaliwa nyota wa soka wa Afrika na duniani kwa ujumla Samweli Eto'o Fils alizaliwa huko Douala, Kameruni. Mama yake, alifahamika kwa jina la Christine Eto'o

Eto'o ambaye alikuwa mpenda mpira wa miguu, alikuwa na matamanio ya kuwa mmoja bora wa Afrika. 

Tamaa ambayo ilimwona akianza kazi yake ya kilabu cha vijana huko Kadji Sports Academy huko Douala nchini Kameruni Eto'o alifanya miaka minne ya kwanza ya maisha yake akikuza hamu yake ya kupata kutambuliwa kwa bara na kimataifa aliyotamani. 

Kufikia 1996, Eto'o alihamia Ufaransa kujaribu klabu cha mpira wa miguu cha Ufaransa. Cha kusikitisha, alikataliwa.

Kwa hivyo, ilimbidi aishi kama mhamiaji haramu kwa sababu ya ukosefu wa hati sahihi na kitambulisho.

Licha ya shida yake, Eto'o bado alishikilia ndoto na matamanio yake hata wakati ujao ulionekana kuwa mbaya juu ya mpira wake wa miguu. 

Alionwa na maskauti wa vipaji wa Real Madrid na kutua nchini Hispania akiwa na umri wa miaka 16 wakati wanamuona alikuwa nchini Ufaransa katika jiji la Le Havre wakati akifurahi kucheza mpira wa miguu.

Ingawa Eto'o alianza kwa kuichezea timu B ya Real Madrid mnamo 1997, kukaa kwake katika timu ya vijana hakukuwa kwa muda mrefu kwani ilishushwa kwa daraja la tatu la mpira wa Uhispania.

Kwa hivyo, Real Madrid ilimkopesha Samuel Eto'o kwa vilabu kadhaa pamoja na Leganes, Espanyol na Mallorca ambao waligundua matarajio makubwa kwa Wahamiaji wa Kiafrika. 

Haikuchukua muda mrefu kabla ya Mallorca kumnunua Eto'o kwa makubaliano ya kudumu mnamo 2000 kwa ada ya rekodi ya kilabu ya Pauni Milioni 4.4.

Baada ya ununuzi, Eto'o alianza kazi ya kuvutia na ya kusisimua katika maisha yake ya mpira wa miguu msimu huo alifunga mabao 11 ambayo yalimfanya awe vinywani mwa wachambuzi wa soka na vyombo vya habari sawa.

Samuel Eto'o akiwa huko Mallorca alivutia miamba ya Uhispania Barcelona mnamo 2003. Katika mwaka huo huo, Eto'o alisajiliwa na Barcelona, hatua ambayo ilionyesha mwanzo wa kuongezeka kwa Eto'o ambaye alikuwa anakua polepole. 

Katika mwaka huo huo wa kuhama kwake, Eto'o hakupewa tu Mchezaji bora wa Kiafrika kwa mwaka huo lakini alichangia pakubwa kuingiza Barcelona katika enzi ya dhahabu. 

Historia ya Samuel Eto'o ni muhimu kwa ukuaji wake. Hakutaka wengine wateseke baada ya kuitazama sana familia yake ikizama kutokana na kumtegemea baba yake Mhasibu hadi kulishwa kwa mapato kidogo yaliyopatikana kutokana na uuzaji wa samaki (na mama yake) imesaidia hadithi ya mpira wa miguu kukuza huruma kwa wasio na haki na wasio na uwezo katika jamii yake, nchi na bara.

Mnamo 2006, Samuel Eto'o alianzisha chuo cha mpira wa miguu kinachoitwa Samuel Eto'o Laikipia Football Academy, Kituo cha Elimu na Mazingira kilichosambaa kote Afrika. Lengo lake ni kukuza upendo kwa mchezo huo huku akichochea roho ya uchezaji katika watoto na
vijana sawa. 

Kwa kuongezea, Eto'o ametunga riwaya za michoro tisa / kitabu cha vichekesho kulingana na maisha yake na hadithi ya mpira wa miguu. Sehemu kubwa ya hadhira yake kuwa watoto na vijana ambao anatarajia kuwatia moyo kwa kujenga ndoto zao katika mpira wa miguu na kupenda.

Aliwahi kuhudumu na Inter Milan ya Italia  mnamo mwaka 2009 hadi 2011 alikocheza mechi 67 na kutupia mabao 33. Pia amehudumu na Anzi Makhachkala ya Russia, Chelsea, Everton, Sampdoria, Antalyaspor, Konyaspor na Qatar SC.

Katika ngazi ya klabu amecheza mechi 587 akifunga mabao 293. Katika timu ya taifa alianza kuhudumu mnamo mwaka 1997 hadi alipotundika daruga mnamo mwaka 2014. Akiwa na Simba Wasioshindika alicheza michezo 118 na kufunga mabao 56

Mnamo mwaka 2000 alikuwa miongoni mwa kikosi kichotwaa medali ya dhahabu katika Mashindano ya Olimpiki yaliyofanyika jijini Sydney nchini Australia.

Pia akiwa na timu ya taifa hilo, alifanikiwa kutwaa taji la Mataifa ya Afrika mnamo mwaka 2000 yaliyofanyika kwa pamoja nchini Ghana na Nigeria na 2002 nchini Mali.

Mnamo mwaka 2003 Eto'o akiwa na Kameruni walishika nafasi ya pili ya michuano ya mabara ya FIFA iliyofanyika nchini Ufaransa ambayo hata hivyo ilifunikwa na simanzi baada ya nyota wa Kameruni Marc-Vivien Foe kufariki dunia kwa matatizo ya moyo kwenye mchezo dhidi ya Colombia.

Eto'o na Georgette Tra Lou wamekuwa wapenzi wa utoto na marafiki bora, hadi hapo urafiki wao ulipofikia Ndoa. Georgette na Walioana kijadi mnamo 2004 na baada ya muongo mmoja walifanya harusi kubwa huko Milan.

Georgette alizaa watoto wanne kati ya watoto watano wa Samwel ambayo ni; Maelle, Etienne, Sienna na Lynn. Mtoto wa mwisho wa Samuel Eto'o Annie alizaliwa na mpenzi wa Eto'o; Barranca, mtunza nywele wa Italia.

Katika maisha yake ya soka Eto'o alikutana na changamoto nyingi ikiwamo ya umri.
Itakumbukwa mnamo mwaka 2014 kocha Jose Mourinho alipata kigugumizi cha umri wa nyota huyu wa Kiafrika.

"Shida na Chelsea ni kukosa Mfungaji…Nina Eto'o Lakini Ana Umri Wa Miaka 32, Labda 35, Ni Nani Anayejua?" Nadhani Samweli Sio 35 Ana Zaidi Ya 39… Samuel Alizaliwa Mnamo 1974 Na Kwa Hivyo Hiyo Inamfanya Awe 39 Sasa."

Read More

MAKTABA YA JAIZMELA: Joe Frazier alivyohimitisha safari ya Muhammad Ali 1971

Machi 8, 1971 mwanamasumbwi wa uzito mkubwa wa Marekani Joe Frazier alihitimisha safari ya bondia maarufu kwa wakati huo Muhammad Ali wa kushinda mapigano 31 katika ulingo wa Madison Square jijini New York na kutwaa taji la uzito mkubwa kwa pointi baada ya mizunguko 15 kwenye pambano ambalo lilipewa jina la "The Fight of Century." 

Hapo kabla Muhammad Ali alivuliwa mkanda wa ubingwa wa dunia wa uzito wa juu kwa miaka mitatu baada kukaidi amri ya serikali ya Marekani ya kwenda katika vita vya Vietnam. 

Mabondia hawa hawakuwa wamepoteza pambano lolote na mchezo huo ulitangazwa mubashara duniani kote kupitia runinga. Pia ulihudhuriwa na nyota mbalimbali wa dunia wakati huo Woody Allen, Diana Ross, Dustin Hoffman, Burt Lancaster, Barbra Streisand, Sammy Davis Jr, Hugh Hefner, mwandishi wa vitabu Norman Mailer na msanii wa muziki Frank Sinatra.

Sinatra alikamata vichwa vya habari duniani kwani katika pambano hilo licha ya kuwa nyota alisimama na kamera yake na kupiga pambano namna lilivyokuwa likiendelea.

 
Sinatra alikuwa akipenda sana kupiga picha katika maisha yake na jarida la Life lilimpa nafasi ya kuchukua picha za pambano hilo. Mhariri Mtendaji wa jarida hilo Ralph Graves alizitumia picha nne miongoni mwa alizopiga Sinatra katika jarida la mezi uliofuata ikiwa moja iliyokaa katika ukurasa wa kwanza.

Siku hii ya pambano hilo; Zilikuwa zimebaki dakika 15 ifike saa tano asubuhi kengele ya kuashiria pambano lilianze ilipopigwa ndani ya Araneta Queizone. 

Muhammad Alli kama kawaida yake alianza vurugu zake mapema sana, akimtupia Frazier matusi kabla hata hajaanza kurusha ngumi. Joe alimchekea tu na kumwambia “Huna kitu leo”.

Alli alishinda round ya kwanza na ya pili. Akaanza kwa kasi round ya tatu akiendelea kumtukana Joe na kumuambia maneno ya kejeli kama “nipige kwa nguvu nyani wewe.. tatizo ngumi zako laini kama za mke wangu. nakuambia ntakuua leo”. Ila ni katika round ya tatu Joe alifanikiwa kuingiza ngumi ya kwanza kwa Alli.

Frazier aliendelea kumuwashia moto Alli katika round tatu zilizofuata. Alli akarejea kutawala round ya saba na ya nane. Katika round ya tisa Alli alikimbilia pembeni na kumuambia ‘corner man’ wake “ndugu yangu nakufa, kweli tena nakufa kabla sijaandika urithi”. 

Upande mwingine wa ulingo Joe Frazier alikuwa anaugulia maumivu ya uso uliovimba kiasi cha kumziba jicho lake la kushoto.

‘Corner man’ wa Frazier alitupa taulo ulingoni katika round ya 14, japo bondia wake alishinikiza anataka kuendelea. Baada ya pambano Joe Frazier alisema “kweli yule jamaa ni shujaa, nimempiga ngumi zinazoweza kudondosha ukuta, ngumi zinazoweza kumdondosha farasi asinyanyuke tena”.

Alli yeye alisema, “sijawahi kusogelea kifo kama leo, Frazier alikubali yaishe sekunde kadhaa kabla yangu”.

Mnamo Aprili 29, 1967;  bondia Muhammad Ali alikataa kujiunga na jeshi la Marekani kwa ajili ya kuwania mkanda,  kwani walimtaka acheze pambano hilo akiwa mwanajeshi.

Muhammad Ali anachukuliwa kuwa bondia wa kiwango cha juu wa zama zote akitwaa medali ya dhahabu katika michuano ya Olimpiki na tuzo nyingine.

Medali ya dhahabu aliyoitwaa bondia huyo ilikuwa katika michuano ya Olimpiki ya mwaka 1960 nchini Italia akiwa na timu ya taifa ya ngumi ya Marekani.

Akiwa na  kimo cha futi 6 na inchi 3 alimkung’uta bondia wa Poland Zbigniew Pietrzkowski na kutwaa medali jijini Rome. 

Ali alikuwa akijulikana kwa makonde yenye nguvu na  namna ya kusimama ulingoni hadi kumtandika mpinzani wake.

Bondia huyo aligundulika kuwa na kipaji cha kucheza masumbwi akiwa na umri wa miaka 12, baada ya baiskeli yake kuibiwa.

Muhammad Ali akitumia jina la Cassius Marcellus Clay Jr. alikwenda kutoa taarifa kwa Afisa wa Jeshi la Polisi Joe Martin kuwa anataka ampige mwizi wa baiskeli hiyo.

Joe Martin alimwambia kuwa atatakiwa kujifunza kupigana kwanza kabla hajakutana na wabaya wake.

Muhammad Ali alizaliwa Januari 17, 1942.

Read More

Manispaa ya Moshi yaadhimisha siku ya wanawake 2021

Leo ni siku ya wanawake duniani, kila wilaya, kila mkoa, kila taifa lenye kutambua na kuridhia mikataba ya Umoja wa Mataifa (UM) yenye kuhamasisha usawa wa kijinisia inaadhimisha siku hii. 

Manispaa ya Moshi iliyopo mkoani Kilimanjaro, kaskazini mwa Tanzania imeadhimisha  siku hii kwa wanawake kutoka taasisi mbalimbali kukutana pamoja katika viwanja vya Uhuru maarufu Uhuru Park. 

Kauli mbiu ya mwaka huu, inahimiza nafasi sawa kwa kizazi cha sasa, ili kufanikisha usawa wa kijinsia mnamo miaka ijayo. 

 

Read More

Joan Laporta, rais mpya Barcelona apata 54% ya kura zote

Joan Laporta ametangazwa rasmi kuwa Rais mpya wa klanu ya Barcelona kwa mara ya pili baada ushindi alioupata kwenye uchaguzi mkuu uliofanyika mwishoni mwa juma lililopita. 

Laporta katika kampeni zake alisema ataendelea kumbakisha nyota wa Argentina Lionel Messi, hatua ambayo ilimpa asilimia 54 ya kura kwenye uchaguzi huo. 

Rais huyo mpya wa Barcelona kwa mara ya pili akiwa na umri wa miaka 58 sasa katika muhula wake wa kwanza ndiye alidaka saini ya kocha Pep Guardiola kwa kipindi cha mwaka 2003 hadi 2010. 

Wakati akiwa klabuni hapo katika muhula wa kwanza ndiye aliyemsajili nyota wa zamani wa Brazil Ronaldinho na nyota wa zamani wa Cameroon Samuel Eto'o. 

Pia akiwa Rais aliisaidia Barcelona kutwaa mataji mawili ya Ligi ya Mabingwa barani Ulaya, manne ya La liga na Kombe la Mfalme.

Aidha Messi ambaye alikuwa miongoni mwa wachezaji wa Barcelona waliokuwepo kati ka uchaguzi huo; aliibuka kuwa nyota wa dunia wakati wa utawala wa mzaliwa huyo wa Katalunya ambaye ni mwanasheria kwa taaluma.

Mwaka 2009 aliweka rekodi ya klabu ya kutwaa mataji sita ndani ya msimu mmoja.

Laporta amechukua nafasi hiyo baada ya kujiuzulu kwa Josep Maria Bartomeu Oktoba mwaka uliopita. 

Aidha Laporta alimshinda mpinzani wake Victor Font aliyepata asilimia 30 huku wakimwacha mbali Toni Freixa. 

Wapiga kura 55,611 walishiriki kati ya 109,531 na kwamba uchaguzi huo umefanyika baada ya kuahirishwa mwezi Januari kutokana vizuizi vya maradhi ya Covid-19 vilivyowekwa katika jimbo la Katalunya

Read More

MAKTABA YA JAIZMELA: Florentino Perez ni nani?

 

Machi 8, 1947 alizaliwa Rais wa sasa wa klabu ya Real Madrid Florentino Perez. Huyu ni mfanyabiashara, mhandisi na mwanasiasa wa zamani nchini Hispania. 

Haitoshi Perez ni mwenyekiti na Mkurugenzi Mtendaji wa Muunganiko wa Makampuni ya ACS yanayojihusisha na uhandisi. 

Alizaliwa Hortaleza, miongoni mwa wilaya 21 zinazounda jiji la Madrid. Perez alisoma katika chuo kikuu cha Polytechnic cha jijini Madrid. 

Alijiunga na harakati za kisiasa mnamo mwaka 1979 pale alipojiunga na chama cha Union of the Democratic Centre na kukitumikia kama walivyokuwa wakifanya wenzake katika baraza la Jiji la Madrid.

Mnamo mwaka 1986 Perez alipambana katika uchaguzi mkuu akigombea akiwa na Chama cha Reformista Democrático akihudumu katika nafasi ya Katibu Mkuu wa chama hicho.

Mnamo mwaka 1993 alitajwa kuwa makamu wa rais wa OCP Construcciones na ilipofika mwaka 1997 alikuwa rais wa kampuni jipya la Actividades de Construcción y Servicios, S.A. (ACS) baada ya kuungana kwa OCP na Gines y Navarro.

Mwaka 2018 aliongoza muungano wa makampuni wa ACS  lilikiwa ni kampuni kubwa la ujenzi nchini Hispania na wakati huo alikuwa na utaji wa kiasi cha dola za kimarekani bil. 2.3.
Perez alijitosa katika kinyang'anyiro cha urais wa klabu ya Real Madrid na kutwaa kama rais mnamo mwaka 2000 baada ya kushindwa mara ya kwanza. Alimshinda Rais wa klabu hiyo wakati huo Lorenzo Sanz. 

Sanz alikuwa na matumaini makubwa ya kushinda nafasi hiyo kutokana na Real Madrid kushinda mataji ya Ligi ya Mabingwa barani Ulaya mnamo mwaka 1998 na 2000. Kilichomwangusha ni matatizo ya kifedha na usimamizi mbovu wa bodi ulikuwa kigingi kilichompa mwanya Perez. 

Kwa upande wake Perez aliwaahidi wanachama wa Merengues kuwa atamleta nyota wa Ureno Luis Figo klabuni hapo ambaye kwa wakati huo alikuwa akihudumu na mahasimu wao Barcelona. Alichaguliwa tena mwaka 2004 kwa asilimia 94.2 za kura. 

Ujio wa Figo klabuni hapo ilikuwa alama muhimu katika utawala wa Perez kalabuni hapo na ulikuwa mwanzo wa nyota bora kutua kila msimu kwa miamba hiyo. 

Hapo ndipo ujio wa wachezaji ghali na bora ulifahamika kwa jina la Galácticos; badala ya Zidanes y Pavones kwa kifupi Canteranos. 

Mnamo mwaka 2001 Zinedine Zidane alisajiliwa akitokea Juventus kwa kuweka rekodi ya usajili ghali duniani wakati huo kwa Euro milioni 77.5 Mnamo mwaka 2002 Ronaldo de Lima alitua katika viunga vya Madrid akifuatiwa na David Beckham mnamo mwaka 2003; Michael Owen alitua mwaka 2004 na kwa kipindi kifupi alitua Robinho mnamo mwaka 2005. 

Sera za Perez zilionekana kufanya kazi  na kwa mafanikio makubwa akiweka uzani mzuri katika kila idara katika dimba ikiwa na maana ya ushambuliaji na safu ya ulinzi.

 
Katika miaka ya mwanzoni Real Madrid ilishinda mataji mawili ya La liga na kuweka rekodi ya kutwaa taji la tisa la Ligi ya Mabingwa barani Ulaya. 

Maendeleo makubwa aliyafanya Perez kwa kulipa madeni makubwa ambayo Los Blancos ilikuwa nayo, licha ya wakati fulani kutofautiana na mkurugenzi Ramón Calderón. 

Baada ya miaka kadhaa kupita Fernando Hierro aliyekuwa mchezaji klabuni hapo aliwahi kusema kuwa uwepo wa nyota Claude Makelele ulikuwa wa muhimu licha ya kutopewa umuhimu na kukubalika, " Kumpoteza Makelele ndio ulikuwa mwanzo wa kupotea kizazi cha Los Galácticos....Hilo unaweza ukaliona kuwa ulikuwa ndio mwanzo wa zama mpya nzuri za Chelsea."

Kutoka msimu wa 2003/04 na kuendelea kukosekana kwa kocha Vicente del Bosque na Makelele kuliifanya Real Madrid ishindwe kutwaa mataji. 

Sera za Perez zilikosolewa mara kwa mara kwamba zimejikita katika masoko badala ya mpira kwani Perez alipanua wigo wa Real Madrid hususani barani Asia. 

Mnamo Februari 27, 2006 alitangaza kujiuzulu, akiishukuru klabu hiyo na timu kuwa inahitaji kupata mwelekeo mpya.

Hata hivyo mnamo Mei 14, 2009; Perez alitangaza kuwania tena urais wa klabu hiyo kwenye taarifa yake kwa vyombo vya habari aliyoitoa katika ukumbi wa Hoteli ya Ritz jijini Madrid.
Juni 1, 2009 alitangazwa kuwa Rais wa klabu hiyo akiwa ni mgombea pekee alifanikiwa kutoa kiasi cha euro mil. 57.4

Kushika nafasi hiyo kwa msimu wa pili hakukubadili sera na falsafa yake ya kuwaleta nyota bora ambapo siku saba tu baada ya kuwa rais wa klabu hiyo alimsajili Mbrazil Ricardo Kaka akitokea AC Milan kwa ada ya pauni mil. 60.

Mnamo Juni 11, 2009 alimleta Cristiano Ronaldo kwa ada ya pauni milioni 80 akitokea Manchester United akiweka rekodi nyingine ya usajili duniani. Juni 25, 2009 alimleta mlinzi wa kati Raul Albiol akitokea Valencia kwa euro milioni 15. 

Hakuishia hapo Julai 1, 2009 alimleta mshambuliaji Karim Benzema akitokea Olmpique Lyon kwa ada ya pauni milioni 30 ambayo ilikuja kupanda na kufikia pauni milioni 35 kutokana na kiwango chake namna kilivyokuwa kikipanda. 

Mnamo Agosti 5, 2009 Real Madrid ilithibitisha ujio wa Xabi Alonso akitokea Liverpool kwa ada ya pauni milioni 30 akiweka rekodi ya kuwa mchezaji wa pili kutua Los Blancos akitokea Liverpool baada ya mlinzi wa pembeni Arbeloa mnamo Julai kwa ada ya pauni milioni tano.
 

Mei 31, 2010 Perez alimtangaza kocha Jose Mourinho kuwa kocha mpya ya Real Madrid kwa ada ya pauni milioni 6.8 

Ujio wa Mourinho ulikuja na sura mpya misimu mitatu baadaye nyota Mesut Ozil, Angel di Maria ambao walikuwa na mvuto baada ya fainali za Kombe la Dunia mwaka 2010 nchini Afrika Kusini

Mnamo Juni 2, 2013 Perez alimwondoa Mourinho na kumleta Carlo Ancelotti ambapo Ozil na Gonzalo Higuain waliuzwa kwenda Arsenal na Napoli mtawalia. Kuondoka kwa nyota hao kuliwapa nafasi Benzema na Luka Mdric kuwamo katika kikosi cha kwanza. 

Perez aliendelea kununua wachezaji bora kwa bei ghali ambapo Gareth Bale alitua Santiago Bernabeu akitokea Tottenham Hotspur kwa ada ya pauni mil. 86akivunja rekodi ya dunia kwa mara nyingine. 

Isco na Asier Illarramendi watoto wa Hispania walipata nafasi katika kikosi cha Real Madrid; misimu iliyofuata ilidhihirika sera zake ambapo Real Madrid ilitwaa mataji ikiwamo Kombe la Mfalme na taji la 10 la Ligi ya Mabingwa.

Majira ya joto mwaka 2014 baada ya Kombe la Dunia nchini Brazil, Perez aliwaleta nyota wengine James Rodriguez, Toni Kroos Keylor Navas na Javier Hernandez 'Chicharito' akitua kwa mkopo kutoka Manchester United huku Di Maria akiondoka na kutua Manchester United na Alonso akijiunga na Bayern Munich.

Huyo ndiye Florentino Perez.

Ujio wa Figo klabuni hapo ilikuwa alama muhimu katika utawala wa Perez kalabuni hapo na ulikuwa mwanzo wa nyota bora kutua kila msimu kwa miamba hiyo. 

Read More

Uvaaji wa barakoa ni tendo la huruma

 

Ubuddha ni mojawapo ya falsafa ya kidini zinazoongoza duniani katika suala la wafuasi, ueneaji kijiografia, na ushawishi kijamii na kiutamaduni. 

Ni falsafa ya kipekee ya dunia katika haki yake yenyewe, ingawa ina mengi ya kushiriki na Uhindu katika kwamba zote hufundisha Karma (maadili kinachosababisha na athari), Maya (hadithi asili ya dunia), na Samsara (mzunguko wa kuzaliwa upya ).

Wabudha wanaamini kwamba lengo la mwisho katika maisha ni kufikia "kuelimisha" vile wao hufikiria.

Tofauti na dini zote duniani, Ubuddha ni falsafa ya Maisha ya Kuishi na Elimu na Kuelewa maisha kiundani. Sio elimu ya kumuabudu fulani au elimu ya kuamini visivyoeleweka bali ni Elimu inayomfundisha mwanadamu ajitambue na kujifahamu yeye ni nani.

Mwanzilishi wa Ubuddha ni, Siddhartha Guatama, alizaliwa katika familia ya ufalme huko India karibu 600 BC.

Kama vile hadithi anavyosema, aliishi maisha ya raha, akiwa na utambulisho mdogo sana wa dunia. Wazazi wake walikuwa na nia kwake kuwa asishawishiwe na dini na akingwe dhidi ya maumivu na mateso.

Hata hivyo, haikuchukua muda mrefu kabla ya makazi yake kupenywa, na akawa na maono ya mtu mzee, mtu mgonjwa, na maiti. Maono yake ya nne yalikuwa ya mtawa aliyejiepusha na anasa kwa amani (mtu akanaye anasa na starehe).

Kuona utulivu wa mtawa, aliamua kuishi maisha ya kujinyima raha na anasa. Yeye aliyatelekeza maisha yake ya ukwasi na utajiri na kutafuta kuelimika kupitia ukali. Alikuwa mwenye ujuzi katika aina hii ya kujinyima mwenyewe na kutafakari kwa hali ya juu. Alikuwa kiongozi kwa wenzake.

Hatimaye, juhudi zake zilifika kilele katika ishara moja ya mwisho. Yeye "alijilisha" mwenyewe na bakuli moja ya mchele na kisha kuketi chini ya mtini na kutafakari hadi yeye aidha kufikia "uelimisho" au alikufa akijaribu.

Mbali na kuona uchungu na majaribu, kesho yake asubuhi yeye alikuwa amekwisha fikia mafanikio ya kutaalamika. Hivyo, basi yeye akaja julikana kama 'aliyetaalamika' au 'Buddha.'

Alichukua utambuzi wake mpya na kuanza kuwafundisha watawa wenzake, ambao alikuwa tayari amewashawishi pakubwa. Watano wa hawa rika lake wakawa wanafunzi wake wa kwanza.

Ubuddha hii leo ni tofauti kabisa. Ni takribani umegagwanyika katika makundi mawili pana ya Kitheravada (chombo kidogo) na Mahayana (chombo kikubwa). Kitheravada ni aina ya utawa ambaoo unapindua uelimisho wa mwisho na nirvana kwa watawa, huku Ubudha Mayana wazidisha lengo hili la kuelimisha hadi walei pia, yaani, wasio watawa.

Ndani ya makundi hayo yanaweza kupatikana matawi mbalimbali ikiwa ni pamoja na Tendai, Utibeti, Nichiren, Shingon, Pure Ardhi, Zen, na Ryobu, miongoni mwa wengine.

Katika Ubudha, dhambi kwa kiasi kikubwa inaeleweka kuwa ujinga. Na, huku dhambi ikieleweka kama "kukosa maadili," mazingira ambayo "ovu" na "nzuri" zimeeleweka ni potovu.

Tunapozungumza kuhusu huruma ina maana hii; Huruma (kutoka neno la Kiarabu) ina maana ya wema ulio tayari kusaidia na kusamehe.

Sifa hiyo ni ya kwanza kwa "Mungu" kadiri ya dini mbalimbali, zikiwemo Uyahudi, Ukristo na Uislamu.

Ubuddha unaamini unapokuwa na huruma unakuwa ni mtu mwenye maadili. Hivyo basi hata kipindi hiki cha dunia kutetemeka kwa janga la covid-19; hatua ya kuvaa barakoa ni tendo la huruma ambalo hata dini mbalimbali zinatambua kuwa unapochukua hatua za kujizuia ili mwenzako au jirani yako asiambukizwe ni jambo jema na uzingativu wa maadili.

Hivyo kama serikali inavyosisitiza kuhusu uvaaji wa barakoa na tahadhari zote za maradhi haya ni vema kuyafanya huku mioyoni mwetu tukijua kuwa ni tendo la huruma au tunahurumiana wenyewe kwa wenyewe ili kutopata maradhi hayo.

Maana kuna wengi wanadhani uvaaji wa barakoa ni kama kulazimishana, lakini kama tulivyoona hapo awali kuwa ubuddha unaamini mtu anapopata elimu ya jambo fulani na akazingatia anakuwa mtu mwenye maadili; na mwenye maadili huwa hana kiburi.

Huruma ndani yake huzaa upendo, na upendo unapokuwapo miongoni mwetu huzaa furaha. Hivyo kujikinga na maradhi haya kutatufanya tuishi kwa upendo na furaha ambavyo ni muhimu kwa maendeleo ya jamii yetu kwa ujumla.

Tuzingatie uvaaji wa barakoa kama ambavyo wataalamu wa masuala ya afya wanashauri.

 

Read More

Wanawake timizeni wajibu wenu, saidia Tanzania

Jamii mbalimbali zimekuwa na hadithi simulizi katika maisha yao hususani zilizopo barani Afrikani. Hadithi simulizi ni utanzu wa kimasimulizi ambao umekuwapo katika jamii tangu kale.

Utanzu huo umekuwa ukitumika katika jamii, ili kuiburudisha hadhira pamoja na kufikisha ujumbe ikiwamo kuwataka wanajamii waishi kwa umoja na mshikamano, kufanya kazi kwa bidii ili kuyajenga maisha yao. Hadithi simulizi hugaiwa kutegemea mtazamo wa mtaalamu husika.

Kwa mfano, Ndungo na Wafula (1993), wanamnukuu Thomson (1946), akipendekeza kuwa, ngano zinaweza kutambulika kutegemea matukio muhimu yanayotokea katika ngano hizo.

Mvungi (2010) anaeleza kuwa, hadithi simulizi ni masimulizi marefu kidogo yanayolenga kuadilisha. Pia, Hadithi simulizi huonesha tukio la kawaida. Amesisitiza kuwa, matukio yake aghalabu huwa mazuri kwa baadhi ya wahusika na mabaya kwa wengine.

Mtafiti Hafsa Abdallah Ali mnamo mwaka 2015 alifanya utafiti wake katika mila na desturi za Wapemba ili kusawiri au kutathmini nafasi ya mwanamke katika jamii hiyo.

Wataalamu kadhaa wamemchora mwanamke katika hali tofauti, kuna waliomchora kuwa ni kiumbe duni, shujaa, mlezi wa familia na nafasi nyingine nyingi. Afrika au Tanzania, Sengo (2009) alimchunguza mwanamke ndani ya familia na akabaini kwamba vyeo tisa vya mwanamke vya heshima na thamani kubwa.

Wanaume wote wa Afrika wanawake wanawaita mama, mke, binti, dada, nyanya, mamkwe, mkwe, shangazi, na shemeji Kwa mtazamo huu mwanamke amebeba hadhi kubwa kupindukia.

Farsy (1956), katika kazi yake amemsawiri mwanamke kuwa, ni kama pambo na kuhusu hili anasema: “Zamani biharusi alipokuwa, akioneshwa alasiri, alipohudhurishwa mbele ya wanawake wenziwe huanza kupambwa tangu mchana, zama hizo walivishwa kiarabu…”

“Wakisukwa ususi wa behedani, kutiwa wanja usoni na machoni na nakshi nzuri nzuri…. kichwa kizima…..puani hutwa kipini……shingoni mkufu…….. mapambo yote haya hutiwa kwa ajili ya kumpendezesha mumewe.” (uk. 38).

Robert (1966),anaendelea kuwaelimisha wale wanaosema kuwa, mwanamke ni kiumbe aliyeleta laana na janga duniani. Katika Pambo La Lugha,anasema,

“Wanawake wana laana; jibu lako ufedhuli, Tena mimi naona lawama lastahili; Kuwa, hujui kunena u mchache wa akili; Wanawake bora sana ni hazina ya awali.”

Hali hii yote mwandishi anaonekana kumkweza mwanamke na kuachana na dhana ya kumdunisha.

Mohamed (1984) katika utangulizi wa kazi yake ya Kina Cha Maisha amegusia suali zima la nafasi ya mwanamke.

Mwandishi anasema: “….kwa kuendelea kumsanifu mwanamke kwa sifa kama mwenye shingo ya upanga mwendo wa maringo, ama kumfananisha na ndege au tunda kwa kusudi la kuusifia uzuri wake tu, kumepotosha na kugubika ukweli wa maisha wanavyoishi wanawake katika jamii nyingi za Kiswahili…”

Mwandishi anatuonesha kuwa, wakati umefika wa kuzifanya kazi za fasihi kujikita zaidi katika kumkomboa mwanamke, ama kumkweza. Kazi za fasihi zinazomdunisha mwanamke kwa kiasi fulani zimepitiwa na wakati.

Mtobwa (1984), alimchora mwanamke katika nafasi kadhaa kupitia kazi yake ya ‘Pesa Zako Zinanuka’.

Katika kazi hiyo, mwanamke amechorwa kuwa, ni mtu duni na tegemezi kwa mwanaume, hasa kwa vile anatumika kuwa, ni chombo cha starehe.

Kwa mfano, Mauwa alimstarehesha Born Kandili pamoja na Daktari. Mwandishi anasema: “Sasa nini? Kuwa uudhike? Unachotaka ni nini zaidi ya faraja ya kimwili kwa muda wa siku moja?

Aidha, Mbogo (1993) amemchora mwanamke kuwa ni jasiri na mwanamapinduzi.

Hali hii ameionesha kupitia Jalia ambaye aliyeongoza kikosi kumkamata Nungunungu aliyeogopwa na watu wote kupitia umaarufu wake.

Pia, alimpiga Nungunungu bila ya kuogopa vitisho vyake atoavyo kwa wengine tena bila ya wasi wasi.

Taswira hiyo, ilikuwa ni msingi imara katika kusukuma mbele umuhimu wa mwanamke.

Kwa mfano, katika hadithi ya Mkaidi Hafaidi, inasema: “Hapo zamani za kale alikuwepo bibi na wajukuu wake wawili wanawake, watu hao, waliishi msituni ulipofika wakati wa usiku bibi aliwaambia wajukuu wake wasitoke nje, wajukuu walimuuliza bibi tusitokenje kwa nini?

Hadithi hiyo inatuonesha kuwa, bibi ni mlezi wa watoto na kawaida katika ulezi mtoto huweza kuambiwamabaya namazuri ili kuyafuata au kuyaacha kama bibi alivyotumia nafasi yake katika hadithi hii.

Hivyo basi Wapemba kwa asilimia kubwa wameonyesha katika hadithi zao kuwa mwanamke ni chombo muhimu hivyo hawana haja ya kujidharau na kujiona hawafai. Wiki hii ni maalum kwa wanawake; Jambo la msingi mwanamke anapaswa ajitambue na ajiamini tayari kwa ajili ya kuisaidia Tanzania kwani ni muhimu kwa maendeleo ya nchi.

 

Read More

MAKTABA YA JAIZMELA: Erick Lamela ni nani?

Machi 4, 1992 alizaliwa mchezaji wa soka wa Argentina na klabu ya Tottenham Spurs Erik Lamela. Lamela alizaliwa kwa wazazi Miriam na Jose Manuel Lamela katika kitongoji cha kaskazini mwa jiji la Buenos Aires nchini Argentina. Familia yake ilimpa jina la utani ‘Coco’. 

Alijiunga na klabu ya River Palte akiwa na umri wa miaka saba. Aidha Barcelona iliripoti kuwa iliMPA Lamela na familia yake akiasi cha pauni laki moja kwa mwaka pia makazi ya kuishi na ajira kwa wazazi wake ili wahamie jijini Barcelona ukiwa ni mpango sawa na ule uliofanyika kwa nyota Lionel Messi alipokuwa mdogo kwenda nchini Hispania. 

Mnamo mwaka 2004 kikosi cha watengenezaji wa filamu cha Trans World Sport kilisafiri hadi Argentina kwa ajili ya kufanya mahojiano na Lamela wakati huo akiwa na umri wa miaka 12 ambaye alikuwa katika vichwa vya wengi baada ya kufikisha kufunga mabao 120 kwa klabu ya vijana ya River Plate katika msimu mmoja nyuma. 

Katika mahojiano yake Lamela aliweka bayana kuwa anatamani kufuata nyayo za mkongwe na kioo cha soka cha Argentina na dunia Diego Maradona ikiwamo kushinda kombe la dunia. 

Nyota huyu ambaye hucheza katika nafasi ya kiungo alianza maisha yake ya sokas katika klabu ya River Plate ya nchini mwake na mnamo mwaka 2011 alisaini kuitumikia AS Roma ya Italia kwa mkata wa awali wa euro milioni 12. 

Baada ya misimu miwili ya kuwepo Serie A alijunga na Spurs kwa ada ya pauni milioni 25.8. Alianza kuhudumu na timu ya taifa kuanzia mwaka 2011 na alikuwa miongoni mwa wachezaji walioshiriki kuisaidia timu ya taifa ya Argentina kumaliza nafasi ya pili katika mashindano ya Copa America mnamo mwaka 2015 na 2016. 

Mnamo Novemba 2018 aliitwa tena katika kikosi cha Albicelestes ikiwa ni miaka miwili ya kutokuwamo kikosini humo. Hadi sasa ameifungia timu ya taifa mabao 3 katika mechi 25 alizocheza.

Mnamo Agosti 30, 2013 klabu ya Tottenham ilikamilisha usajili wa Lamela kutoka AS Roma  na kumpa bonsai ya pauni milioni 4.2. Ada aliyonunuliwa Lamela ilimfanya wakati huo kuwa mchezaji ghali katika historia ya klabu hiyo akivunja rekodi mbili za usajili ghali zilizowekwa na klabu hiyo walipowasajili Paulinho na baadaye Roberto Soldado.

Mpaka sasa Lamela amecheza mechi 168 akiwa na Majogoo hao wa London na kufumania nyavu mara 16; ambapo msimu wa 2020-21 Lamela alianza katika robo fainali ya Kombe la Ligi (Carabao) dhidi ya Chelsea. 

Aliisawazisha Spurs ikiwa ni bao lake la kwanza la msimu na baada ya hapo alifunga penati kwenye ushindi wa mikwaju 5-4 baada ya sare ya 1-1. Mnamo Januari 2021,  alipigwa faini baada ya kuvunja sheria iliyowekwa ya kujikinga na maradhi ya Covid-19 baada ya kuhudhuria sherehe za Krismasi na aliwekwa  pembeni katika kikosi cha Spurs kwa mechi kadhaa. 

Lamela ana watoto wawili Tobias (2017) na Thiago (2020) aliowazaa kwa kipenzi wake wa siku nyingi Sofia Herrero.

Read More

Preview: Liverpool vs Chelsea, Tuchel na kibarua kizito Anfield?

Baada ya kushuhudia Manchester United ikishindwa kutamba katika dimba la Selhurst Park kwa kutoka sare tasa na wenyewe wa Kusini mwa London, Crystal Palace leo usiku macho na masikio yatakuwa kwa  mchezo muhimu utakaowakutanisha miamba Liverpool na Chelsea utakaopigwa katika dimba la Anfield. 

Fabinho na Allison watarudi katika kikosi cha Jurgen Klopp huku Diogo Jota akiwa karibu kurudi katika ubora wake. Chelsea wataikosa huduma ya Thiago Silva ambaye bado hajarudi kutokana na majeruhi huku Callum Hudson-Odoi atakuwamo katika mahesabu ya miamba hiyo ya Stamford Bridge. 

Mshambuliaji Tammy Abraham atachunguzwa kuona kama anaweza kucheza hii leo kutokana na majeruhi ya kifundo cha mguu. Raia wa Senegal Sadio Mane amefunga mabao saba kati ya 16 dhidi ya Chelsea katika mashindano yote huku Olivier Giroud amefunga mabao saba dhidi ya Liverpool.  

Thomas Tuchel anaweza kuwa kocha wa kwanza kati ya watatu kushikilia kibarua akiwa na klabu hiyo katika mechi 10 bila kupoteza katika mashindano yote. 

Rekodi kama hiyo iliwekwa na Jose Mourinho na Luiz Felipe Scolari.

Read More

Harry Kane kuendeleza rekodi yake dhidi ya Fulham?

 

Fulham itawakaribisha Majogoo wa London Tottenham katika dimba la Craven Cottage huku Tom Cairney akiendelea kuugulia majeraha ya goti huku mlinda mlango Marek Rodak akiwa na matatizo ya kidole. 

Kwa upande Spurs, Harry Kane ana matumaini makubwa ya kuendeleza rekodi yake dhidi ya Fulham. Aidha kiungo Giovan Lo Celso amerudi katika mazoezi wiki hii kutokana na majeruhi ya misuli licha ya kwamba mechi hii inaweza kuwa imekuja mapema mno kwa nyota huyo. 

Fulham imeshinda mchezo mmoja tu katika 14 dhidi ya mahasimu wao Spurs ikitoka sare tatu na kupoteza michezo 10. 

Hata hivyo kocha Jose Mourinho hajawahi kupoteza mechi nne mfululizo za ugenini katika ligi tangu aanze kufundisha soka.
 

Read More

Preview: Everton vs West Brom; Dominic Calvert-Lewin anaweza kuifikia rekodi ya Lukaku

Everton watakuwa na kibarua dhidi ya Wes Brom ambako wataikosa huduma ya Yerry Mina, Fabian Delph na Jean-Philippe Gbamin ambao wanaendelea kuuguza majeraha yao. 

Aidha Kocha Carlo Ancelotti ameweka bayana kuwa nyota wake James Rodriguez, Seamus Coleman, Tom Davies na  Robin Olsen watachunguzwa kama wataweza kuwavaa The Hawthorns katika mchezo wa leo usiku. 

Kwa upande wao West Brom, kiungo wao Robert Snodgrass atakuwamo katika mchezo wa leo baada ya kupona majeruhi ya goti na kigimbi yaliyokuwa yakimsumbua. 

Hata hivyo mshambuliaji Dominic Calvert-Lewin atahitaji kufunga bao moja tu leo katika mchezo wa ugenini ili kufikia rekodi ya Romelu Lukaku aliyoiweka ya kufunga mabao tisa ugenini katika Ligi Kuu wakati akiwa hapo.

Read More

Aston Martin kuinua matarajio ya Vettel

Nyota wa langalanga Sebastian Vettel amesema kwa sasa ana amani moyoni mwake baada ya msimu mbaya akiwa na kampuni ya Ferrari msimu uliopita na kwamba amestaajabu kuanza kufanya kazi na timu ya Aston Martin. 

Bingwa huyo mara nne wa taji la langalanga la dunia amesema ana matumaini makubwa kufanya kazi na Aston Martin ambao wamerudi kwa mara ya kwanza baada ya miaka 60. 

Vettel amesisitiza kuwa hakufurahishwa na namna alivyoshiriki mbio mwaka uliopita licha ya kwamba amesema hana budi kukubali matokeo aliyoyapata na kuongeza kwamba anatarajia makubwa mwaka huu. 

Msimu uliopita Vettel alizidiwa na McLaren.

Read More

BMT yavitaka vyama vaya michezo vya kitaifa kupeleka mipango mikakati 2020/21

Baraza la Michezo la Taifa (BMT) limevitaka vyama vya michezo nchini kuwasilisha mipango mikakati ya mwaka 2020/21 na visipofanya hivyo hatua kali zitachukuliwa.

Akizungumza na vyombo vya habari Katibu Mtandaji wa BMT George Msonde amesema vyama vya michezo vyote nchini vinatakiwa kuwasilisha taarifa zao na mipango mikakati kati ya Machi 4 na 12 na vitakavyokiuka agizo hilo vitakuwa kinyume na sheria za nchi katika medani ya michezo.

"BMT inaviagiza vyama vya michezo vya kitaifa ambavyo havijawasilisha mipango mikakati yao kwa mwaka 2020/21 kuwasilisha mipango hiyo ndani ya siku saba za kazi kuanzia Machi 4 hadi 12 mwaka 2021; ambapo kutofanya hivyo ni kukiuka agizo la serikali na hatua zitachukuliwa dhidi yao," amesema Msonde.

Msonde amesema hadi Februari 28 mwaka huu ni vya 38 ambavyo tayari vimeshafikisha mipango mikakati kwa baraza hilo na kuongeza kwamba taarifa zao zinaendelea kufanyiwa  upembuzi yakinifu.
 

Aidha Msonde amesisitiza kuwa madhumuni makubwa ya kupeleka taarifa hizo ni kuziwezesha timu za taifa katika michezo mbalimbali kufanya vizuri kitaifa na kimataifa hivyo taarifa zinapochelewa zinasababisha kufanya vibaya katika mashindano.

Read More