Waburkinabe 14 wauawa wakiwa Kanisani

Zaidi ya watu 14 wameuawa kwa risasi ndani ya kanisa moja jana jumapili nchini Burkina Faso na askari wa Kiislamu wenye msimamo mkali.

Wahanga wa tukio hilo waliuawa na askari hao wakiwa katika ibada yao ya Jumapili mjini Hantoukoura uliopo Mashariki mwa Brukina Faso.

Imedaiwa kuwa chanzo cha waumini hao kuuawa haijawekwa wazi huku wauaji hao wakitoroka kwa pikipiki baada ya kutenda unyama huo.

Mamia ya watu wamekuwa wakiuawa nchini humo kwa miaka ya hivi karibuni wengi wao wakiuawa na makundi ya Jihad, mapigano ya kikabila karibu na mpaka wa taifa hilo na Mali.  

Serikali ya mkoanchini humo imesema watu wengi wamejeruhiwa katika tukio hilo. Vyombo vya usalama nchini humo vimesema miongoni mwa waliouawa ni mchungaji na watoto wake.

Mwezi Oktoba mwaka huu watu 15 waliuawa na wengine wawili walijeruhiwa katika shambulio lililofanywa katika msikiti mmoja.

Mashambulio yanayofanywa na  waislamu wenye msimamo mkali yamekuwa yakiongeza tangu mwaka 2015 huku maelfu ya shule zikilazimishwa kufungwa.

CHANZO: BBC