RON W. DAVIS: Alivyoanza kazi ya kufundisha wanariadha wa Tanzania-5

Awali ya yote nitoe pole kwa familia ya riadha kwa kuondokewa na wakongwe katika mchezo huo Zakaria Gwandu na Samwel Tupa ambao wamefariki dunia Oktoba mwaka huu. Ni pigo kubwa katika mchezo huu Mwenyezi Mungu Muumba wa vyote aifariji familia ya riadha. Amen.

Ron W. Davis (wa kwanza kushoto) akiwa na Filbert Bayi mwaka 2019 alipomtembelea Kibaha, Pwani.

Makala yaliyopita tuliangazia namna ambayo Ron Davis alivyopigiwa simu kutoka Tanzania kuwa amechaguliwa kuwa kocha mkuu wa timu ya taifa ya riadha.

Pia tuliishia pale aliporudi Nigeria na kwenda kuiaga timu ya taifa hilo na kuanza safari ya kuja Tanzania. Katika safari yake kuja nchini, alitua katika Uwanja wa Kimataifa wa Julius Nyerere jijini Dar es Salaam ambako alishangazwa na umati wa wanahabari waliokuwa wakimsubiri kwa shauku.

Kilichomstaajabisha alikuwa hajawahi kuona hapo kabla. Ilikuwa ngumu kuamini kwani watu hawakuficha shauku na matarajio yao kwake katika medani ya riadha.

Katika makala haya tutaendelea kumwangazia Ron Davis baada ya kufika nchini Tanzania katika nafasi yake mpya ya kocha mkuu wa timu ya taifa kwenye mchezo wa riadha alianza vipi.

Ron Davis alisema, “Tangu siku ya kwanza nilipowasili katika kazi ya ukocha, nilipata uungaji mkono mzuri kutoka kwa mheshimiwa Chadiel Mgonja, aliyekuwa Waziri wa Utamaduni na Michezo wakati huo.”

Mmarekani huyo aliongeza kusema kupitia Mgonja aliunganishwa na maofisa mbalimbali wa riadha wa timu ya taifa ya Tanzania. Pia Ron Davis alikumbusha kuwa  uungwaji mkono katika kila kitu katika ukocha wa riadha alipata kutoka kwa mtu mmoja aliyemtaja kwa jina la Zambi.

Huyu Zambi wakati huo alikuwa Katibu Mkuu wa Kamati ya Taifa ya Olimpiki (TOC) ambaye awali alikuwa akimnoa mkongwe Filbert Bayi.

“Labda mtu ambaye alionyesha zaidi ukaribu katika kazi ya ukocha alikuwa Profesa Sangui ambaye alikuwa Daktari wa Timu ya Taifa ya Riadha ya Tanzania,” alisema Ron Davis.

Ron Davis aliongeza kuwa Profesa Sangui alikuwa mbele kumpa taarifa zote kwa kina na kumshauri kuhusu riadha na mazingira ya Tanzania hali ambayo ilimpa uzoefu mkubwa wa namna ya kuendana mazingira na mafanikio makubwa kwa wanariadha nchini.

“Unapokuwa na mtu kama yule (Prof. Sangui) ambaye anakuamini na anakuunga mkono katika kila njia, hali hiyo inapunguza mahangaiko katika mazingira mapya ambayo yana changamoto zake,” aliongeza Ron Davis.

MAANDALIZI KUELEKEA DAKAR 1979

Baada ya kuwasili nchini Ron Davis alipewa taarifa kwamba wataanza safari ya kwenda Arusha ili kujiandaa na Mashindano ya Afrika ya Riadha (ACA) ambayo yalifanyika Dakar kuanzia Agosti 2-5, 1979.

Timu ya taifa ya Riadha ilikuwa kambini mkoani humo kwa ajili ya kujiandaa na mashindano hayo.

Ikumbukwe Nigeria iliongoza kutwaa medali kati ya nchi 24 zilizoshiriki katika matukio 39 yaliyowaleta wanariadha 251 pale Stade Demba Diop jijini Dakar.

Katika michuano hiyo ya ACA, Tanzania iling’ara katika mbio ndefu ambazo medali ya fedha ilibebwa na Gidamis Shahanga aliyekimbia kwa saa 2:36:46 akizidiwa na raia wa Ethiopia Kebede Balcha alikimbia kwa  saa 2:29:53 aliyetwaa medali ya dhahabu.

Katika kurusha mkuki Tanzania ikiwakilishwa na Zakayo Malekwa ilitwaa medali ya fedha. Malekwa alirusha mita 76.74 akiachwa nyuma kwa sentimeta 68 na raia wa Ivory Coast Jacques Aye Abehi aliyetwaa medali ya dhahabu.

Pia Tanzania katika michuano hiyo ilianza kwa mara ya kwanza mwaka huo ilishika nafasi ya tatu katika mchuano wa mbio za vijiti mita 400 kwa dakika 3:11.5a.

Baada ya historia hiyo ya yaliyojiri wakati huo turudi katika mwaka ambao Ron Davis anafika Tanzania na kupewa taarifa za kwenda Arusha iliko timu ya taifa. Viongozi wa riadha walimwambia kuwa Arusha itakuwa kambi ya timu ya taifa ya riadha kwenye michuano ya olimpiki mwaka 1980.

RON DAVIS, FILBERT BAYI WAKUTANA TANZANIA

Kabla ya kwenda Arusha alikaa takribani siku saba na alipewa taarifa kwamba Bayi anataka kukutana naye kipindi hicho Bayi alikuwa mwanariadha bado kijana tu.

“Nilifurahi sana kupata fursa ya kukutana na Filbert uso kwa uso na nikaona ni fursa ya kuzungumza naye namna ambavyo tutafanya kazi pamoja,” alisema Ron Davis.

Ron Davis aliongeza kuwa walikubaliana kukutana katika mgahawa mmoja jijini Dar es Salaam kwa ajili ya chai na biskuti. Hata hivyo alipenyezewa kuwa Bayi anataka kuzungumza naye kwani hajafanya mazoezi yoyote tangu Michuano ya Jumuiya ya Madola 1978 ilipomalizika kutokana na majeruhi.  

Muda uliwadia Ron Davis akakutana na Bayi, katika mazungumzo yao Bayi aliweka bayana kuwa hafahamu ni lini atarudi katika mazoezi na alikuwa njiani kuelekea Ujerumani kwa matibabu.

Hata hivyo Bayi alimhakikishia kuwa atakuwa sawa na ataweza kujiandaa kwa ajili ya mazoezi kuelekea michuano ya olimpiki. Baada ya mazungumzo na nyota huyo Ron Davis alifurahi kuonana naye kujua hatima ya changamoto iliyokuwa ikimkabili mwanariadha huyo wa kiwango cha kimataifa na aliyeweka rekodi ya kimataifa.

“Ni kwa namna gani majeruhi yake yataathiri mazoezi,” alijiuliza Ron Davis.

Pia Ron Davis alijiuliza baada ya kupona majeruhi hayo ataweza kurudi katika kiwango chake bora na kama atarudi katika kiwango chake atachukua muda gani.

Haikutosha Ron Davis alijiuliza endapo Bayi ataweza kufundishika na kuamini mafunzo yake.

Hayo yote yalikuwa ni maswali ambayo yalimsumbua kwa kiasi kikubwa Ron Davis ambaye alikuwa ameanza kazi yake ya kuwanoa wanariadha wa Tanzania akiwamo Bayi ambaye alikuja kuweka rekodi ya kwanza ya kuipa medali ya kwanza ya Olimpiki nchi ya Tanzania. Nini kilitokea baada ya Bayi kwenda Ujerumani kupata matibabu? Tukutane Makala yajayo.

Makala haya yametayarishwa na Jabir Johnson ambaye alipata fursa ya kuzungumza na Ron Davis  katika masuala mbalimbali ya maisha yake na medani ya riadha alipotua nchini Tanzania. Kwa maoni ushauri barua pepe: jaizmela2010@gmail.com