Mradi wa Arusha Sustainable Urban Water and Sanitation Delivery kuinufaisha Hai.

Serikali imeanza kutekeleza mradi mkubwa wa maji unaojulikana kama “Arusha  Sustainable Urban  Water and Sanitation Delivery Project” ambao utaboresha huduma ya Majisafi na Usafi wa Mazingira katika Jiji la Arusha na baadhi ya  maeneo ya wilaya za Arumeru na Hai.

Mkuu wa Wilaya ya Hai Lengai Ole Sabaya akionja maji ya kisima kilichochimbwa na Mradi wa Arusha  Sustainable Urban  Water and Sanitation Delivery kwa udhamini wa Benki ya AfDB

Hayo yalisemwa na Mkurugenzi wa Mamlaka ya Majisafi na Usafi wa Mazingira Jiji la Arusha  Mhandisi Ruth  Koya, wakati alipokuwa akitoa taarifa yake mbele ya  kamati ya ulinzi na  usalama ya Wilaya ya  Hai, kwenye ziara ya kutembelea mradi wa uchimbaji wa visima virefu 18 vya maji vinavyochimbwa katika wilayani Hai mkoani Kilimanjaro, kwa ufadhili wa Benki ya Maendeleo Afrika (AFDB) na Serikali ya Tanzania.

Mhandisi Koya alisema mradi huo ulianza kutekelezwa Julai 2018 na Mradi huo utarajiwa kukamilika Julai 2020, ambapo hadi kukamilika kwake utagharimu kiasi cha fedha Bilioni 476 za Kitanzania.

 Mhandisi Koya  alisema mradi huyo umelenga kuhakikisha Jiji la Arusha linaondokana na changamoto ya maji inayoikabili kwa sasa na kwamba kukamilika kwa mradi huo kutaweza kuwapa wananchi huduma hiyo muhimu.

“Mradi huu utagharimu jumla ya dola za Marekani  milioni 233,915,581,11 sawa na shilingi  za Tanzania  bilioni  476, ambapo katika fedha hizo kiasi cha dola za Marekani milioni 210,962, 581.00 ni mkopo wenye masharti nafuu kutoka Benki ya Maendeleo ya  Afrika AFDB na kiasi cha dola za Marekani milioni 22,953,000.00 ni mchango wa serikali ya Tanzania.

Mkurugenzi wa Halmashauri ya Wilaya ya Hai mkoani Kilimanjaro Yohana Sintoo akionja maji ya kisima kilichochimbwa na Mradi Arusha  Sustainable Urban  Water and Sanitation Delivery ambao utazinufaisha jiji la Arusha na wilaya ya Hai mkoani Kilimanjaro.

Alisema kutokana na  kasi ya ukuaji wa Jiji  la Arusha, utoaji wa huduma za Majisafi na  uondoaji wa majitaka umekuwa hautoshelezi mahitaji ya wakazi wote, hivyo  kukamilika kwa mradi huo utaweza kutatua changamoto iliyopo katika Jiji hilo. 

 

Mhandisi  Koya alisema kazi kubwa zilizopangwa kutekekelezwa kwenye mradi huo zilikuwa ni pamoja na  utafutaji wa vyanzo vya maji, uchimbaji wa visima virefu, ujenzi wa matenki, ulazaji wa mtandao wa Majisafi na Maji taka.

Kazi nyingine ni  ujenzi wa mitambo ya kutibu maji, ujenzi wa mabwawa mapya ya kusafisha majitaka, ununuzi wa vitendea  kazi, ujenzi wa ofisi  kuu ya  Mamlaka na ofisi za Kanda.

“Lengo la mradi huu ni kuboresha hali ya upatikanaji wa Majisafi na  kuboresha huduma ya uondoaji wa Majitaka  katika Jiji la  Arusha  ili  kuboresha  afya na hali ya  maisha ya wakazi wa Jiji hilo kwa ujumla wake.”

Alifafanua kuwa Mradi huo unatarajiwa kukamilika Mwaka 2020 na baada ya kukamilika  huduma za Majisafi na uondoaji wa majitaka zitakuwa zimeboreshwa katika Jiji hilo.

Akizungumza mara baada ya ziara kukagua mradi huo Mkuu wa wilaya ya Hai Lengai Ole Sabaya, alisema serikali imekuwa ikichukua kwa haraka changamoto ambazo zimekuwa zikiwakabili  wananchi kwa ujumla.

“Upatikanaji wa maji kwa wilaya ya Hai upo kwa wango cha  juu  na hilo limethibitishwa  na watafiti waliofanya  utafiti katika wilaya ya Hai na  kuona kuwa kuna maji meng,”alisema DC Sabaya.

Kwa upande wake Mkurugenzi mtendaji  wa  halmashauri ya Wilaya ya Hai Yohana  Sintoo, alisema ukanda wa tambarare ndio ambao mara nyingi umekuwa ukikumbwa na changamoto ya upungufu wa maji  hususani katika kipindi cha kiangazi, kutokana na vijiji vya tanbarare kutegemea vyanzo vya maji vilivyopo maeneo ya milimani.

“Nia ya serikali ya awamu ya tano chini ya Rais Dk John Magufuli ni kuhakikisha wananchi wake wanapata Maji safi na salama hivyo, kukamilika kwa mradi huu, kutawaondolea changamoto wananchi wa vijiji vya Chekimaji na Ngosero ambao wananufaika na  mradi huo kwa kujengewa visima hivyo vya maji vinavyo chimbwa katika maeneo yao,”alisema Sintoo.

STORY by: Kija Elias

PHOTOS by: Kija Elias

EDITED by: Jabir Johnson