Mtoto wa miaka 12 auawa, anyofolewa viungo

Ramani ya Mkoa wa Singida

MTOTO wa kike mwenye miaka 12 ameuawa mkoani Singida baada ya kunyongwa kwa kamba ya ngozi na watu wasiojulikana, kisha mwili wake kunyofolewa baadhi ya viungo na kutoweka navyo kwa kile kinachosadikiwa kuwa ni imani za ushirikina.

Mtoto huyo Dorcas Meshack mkazi wa Kijiji cha Matongo Wilaya ya Ikungi aliondoka nyumbani kwao juzi majira ya saa sita mchana na kuaga kuwa anakwenda kuvuna mahindi kwenye shamba lililopo umbali wa mita 70 lakini hakurejea tena hadi mwili wake ulipookotwa.

Kaimu Kamanda wa Polisi Mkoa wa Singida Mrakibu Mwandamizi Isaya Mbughi amethibitisha kutokea kwa tukio hilo na kwamba upelelezi unaendelea.

Hata hivyo Mrakibu Mwandamizi Mbughi ameitaka jamii mkoani humo kuweka utaratibu wa ulinzi dhidi ya watoto na kutoa taarifa kwa mtu yeyote au kundi lolote linalojihusisha na vitendo hivyo.