Mizoga ya Tembo yapungua Selous Game Reserve

Mzoga wa tembo baada ya kuuliwa na majangili

MAUAJI ya tembo katika Mbuga ya Selous yamepungua kutoka mizoga 184 hadi 84.

Hayo yanajiri wakati ambapo tembo wawili kuuawa na wananchi hivi karibuni huku mmoja aking’olewa meno yake katika kijiji cha Wenje Tarafa ya Nalasi wilayani humo.

Akizungumza katika kikao cha Ulinzi na Usalama cha Wilaya ya Tunduru mkoani Ruvuma Kaimu Mkurugenzi wa Operesheni ya kuuzuia Ujangili dhidi ya wanyama Pori Robert Mande  amesema takwimu hizo zinaonyesha kuwa ukubwa wa tatizo hilo umepungua kutokana na jitihada za kupambana na majangili.

Mande amesema mizoga ya tembo imepungua kutokana na wafanyabiashara wakubwa wa pembe za ndovu kukamatwa.

Mwenyekiti wa Kamati ya Ulinzi na Usalama wilaya ya Tunduru Juma Homera amewataka watu wanaomiliki Silaha Kiholela kuzisalimisha kwenye ofisi za vijiji na vituo vya Polisi

Homera amebainisha kuwa wananchi wanaoishi karibu na mipaka ya nchi jirani ya Msumbiji wanapata silaha hizo kwa kubadilishana na chakula.

Kutokana na tukio hilo watuhumiwa 8 wa ujangili wamekamatwa

Kwa upande wake Mratibu wa Shirika la  PAMS Foundation linalojishughulisha na Mapambano dhidi ya Ujangili Maximillan Janes  amesema shirika limetoa ndege mbili ambazo zinatumika kulinda wanyama wasiingie katika makazi ya watu pia kufuatilia mienendo ya watu wanaojihusisha na ujangili.