Siku ya Wanawake: Wanafunzi Ashira Girls wapokea taulo za kike

 

Mbunge wa viti maalum, kundi la Wanawake mkoa wa Kilimanjaro Esther Maleko, ametoa taulo za kike kwa wanafunzi wa shule ya sekondari ya wasichana ya Ashira, ili kuwawezesha kuhudhuria masomo yao wakati wote bila ya kikwazo cha kukosa masomo.

Maleko alikabidhi taulo hizo za kike katika kilele cha siku ya Wanawake duniani mnamo Machi 8,2023  ambapo alisema amelazimika kutoa taulo hizo za kike ikiwa ni mkakati wake wa kutatua changamoto za taulo za kike kwa wanafunzi kwani wengi wao wanatoka kwenye mazingira duni hali inayosababisha kushindwa kumudu gharama za taulo hizo  na hivyo kukosa masomo.

Aidha Mbunge Maleko alikabidhi kiasi cha shilingi milioni 1.6 kama ahadi yake aliyoitoa hivi karibu shuleni hapo alipotembelea na kuahidi kutoa kiasi hicho cha fedha kwa ajili ya ununuzi wa madawati kama sehemu ya kuunga mkono juhudi za Serikali  katika kuboresha sekta ya elimu nchini.

"Leo nimekabidhi ahadi yangu ya madawati niliyoiahidi shuleni hapo, msaada huouwa madawati ni sehemu ya jitihada zangu katika kusaidia jamii ili kuwawezesha wanafunzi hawa waweze kusoma kwa utulivu,"alisema Mbunge Maleko.

Akizungumza na wanafunzi hao Maleko aliwataka watoto wa kike kujiwekea malengo ya kusoma kwa bidii ili kupata maarifa yatakayolisaidia taifa na wao wenyewe kupata maendeleo huku akiwaasa kujiepusha na vishawishi na mahusiano kabla ya wakati muafaka ili wasikatishe ndoto zao kwa kupata mimba za utotoni.

Kwa upande wake Mwenyekiti wa Jumuiya ya Umoja wa Wanawake Tanzania(UWT) Wilaya ya Moshi Rwaichi Kaale, alimpongeza Mbunge Maleko  kwa kutimiza ahadi yake aliyoitoa shuleni hapo huku akitoa wito kwa wanafunzi hao kujichunga ili waweze kutimiza ndoto zao za kimasomo.

Naye Mkuu wa shule hiyo Elizabeth Abdallah, alishukuru kwa msaada huo wa madawati ambayo yatawasaidia watoto kusoma kwa utulivu huku akitoa wito kwa wadau wengine kuguswa na kuisaidia shule hiyo.

Wakizungumza baadhi ya wa wanafunzi waliopatiwa taulo hizo za kike wanaosoma kidato cha tano katika shule ya sekondari ya wasichana Ashira Zainabu Bomba, Faraja Jackson,  Magreth Lugano, walimshukuru Mbunge Maleko kwa msaada huo  wa taulo za kike kwani hedhi inakuwa ikisababisha baadhi yao kukosa masomo kwa sababu ya kukosa taulo za kuvaa.