Kortini kwa kubaka

NA DIANA JOACHIM, TUDARCO

Washtakiwa wawili wamepandishwa kizimbani katika Mahakama ya Wilaya ya Ilala jijini Dar esSalaam kwa kosa la kumbaka msichana wa miaka 15 akiwamo mwanamke mmoja kushirikiana na mbakaji.

Mwendesha mashtaka Eric Shija alidai mbele ya Hakimu Mkazi Wilberforce Luhwago kuwa siku isiyo na tarehe mwaka huu katika maeneo ya Gongo la Mboto Samuel Frank (23) ambaye ni mfanyabiashara wa Mtongani jijini hapa akishirikiana na Fatima Salum 'Mama Mudy' (21) walitenda kosa kinyume na kifungu cha sheria 130(1),(2)(e) na 131(1) sura ya 16 kilichofanyiwa marekebisho mwaka 2002 cha kanuni ya adhabu.

Aidha ilidaiwa Frank alimbaka binti huyo na kumsababishia maumivu makali.

Pia mwendesha mashtaka aliongeza kuwa Mama Mudy alikwenda kinyume na kifungu cha sheria Na. 140(c) sura ya 16 cha kanuni ya adhabu.

Shija alisisitiza Mama Muddy alitumbukiza dawa za kumfanya binti huyo kuweza kuhimili vishindo vya mfanyabiashara wakati wa tendo la ngono.

Hakimu Luhwago aliahirisha kesi hiyo hadi Septemba 29 mwaka huu itakaposikilizwa tena.