Ubakaji wampeleka jela miaka 30

NA NEEMA HARRISON, TUDARCO

MAHAKAMA ya Wilaya ya Ilala jijini Dar es Salaam imemhukumu Rashid Mohamed (32) miaka 30 jela baada ya kupatikana na hatia ya kumbaka mwanafunzi wa miaka 13.

Akisomewa hukumu hiyo jana na Hakimu Mkazi Juma Hassan alisema mahakama imeridhishwa na ushahidi wa pande zote na kwamba anamtia hatia kutumikia kifungo hicho.

Awali ilidaiwa na Mwendesha Mashtaka Agatha Lumato mshtakiwa alitenda kosa hilo maeneo ya Chania Zuala wilayani Ilala, Desemba 13 mwaka jana kinyume na kifungu cha sheria Na.130(1)(2)(e) na 131(1) sura ya 16 kilichofanyiwa marekebisho mwaka 2002 cha kanuni ya adhabu

Pia ilidaiwa kuwa mtoto huyo alitumwa dukani kununua mahitaji ndipo hakuonekana na kwamba mshtakiwa alimfungia muathirika kwa siku 45 huku wazazi wake wakiwa hawajui mtoto wao alipo na mshtakiwa akiendelea kumfanyia vitendo viovu.

Aidha ilidaiwa mahakamani hapo kuwa shahidi mmoja ambaye ni jirani wa mshtakiwa alisema walikuwa wakishangaa kumuona kijana huyo kuishi na mwanafunzi huyo na muda mwingine kwenda kumuogesha, ndipo walipoamua kutoa taarifa kwa mjumbe wa Serikali za Mitaa Juma Saidi ambaye alishiriki kukamatwa kwa mshtakiwa.

Hakimu alisema kupitia ushahidi wa Dk. Joan wa Hospitali ya Amana jijini Dar es Salaam kupitia vipimo vya kitaalamu umeonyesha mwanafunzi huyo alikuwa ameathirika vibaya  katika sehemu za siri na tendo hilo limefanyika kwa muda mrefu.