Maboresho yanatakiwa vivutio vya utalii Moshi DC

 

Madiwani wa Halmashauri ya Moshi katika picha ya pamoja kwenye Maporomoko ya Materuni 

Vivutio vya utalii vinavyopatikana Halmashauri ya wilaya ya Moshi mkoa wa Kilimanjro vimetakiwa kuboreshwa zaidi hususan kwenye miundombinu ya barabara za kuelekea kwenye vivutio hivyo, pamoja na kuwa na miundombinu ya vyoo na maeneo ya kutupia taka nguvu.

Ushauri huo umetolewa  hivi karibuni na madiwani wa  Halmashauri hiyo waliotembelea kivutio cha utalii  cha maporomoko ya maji Materuni kilichopo Kata ya Uru Mashariki, wilayani humo ikiwa ni sehemu ya ziara ya kuhamasisha utalii wa ndani.

Wakizungumzia kuhusu lengo la ziara hiyo  Diwani wa kata ya Old Moshi Mashariki Super Macha, Diwani  Kata ya Njia Panda Loveness  Mfinanga, na Diwani Kata ya Mwika Kaskazini Samuel shao, walisema ziara hiyo ya siku moja ilikuwa imejikita kuhamasisha utalii wa ndani  sanjari na kubaini vyanzo vipa vya mapato ya halmashauri hiyo.

Katika ziara hiyo Madiwani hao wameshauri mapato ya asilimia 40 yanapatikana katika eneo la maporomoko ya maji Materuni yarudi kuboresha miundo mbinu ya barabara vyoo pamoja na sehemu ya kutupa taka ngumu ili wageni wanaofika kutembelea eneo hilo waweze kuvutiwa na mandhari nzuri iliyopo.

Diwani wa Kata ya Uru Kusini Wilhard Kitali Diwani alisema upo umuhimu wa mkubwa wa halmashauri ya Moshi, kuhakikisha vivutio vyote vya  utalii vilivyopo wilayani humo vinatangazwa.

Kitali alisema  halmashauri ya Moshi ndio benki na kitovu cha utalii katika mkoa wa Kilimanjaro, kwani inavyo vyanzo vingi vya utalii ikiwemo soko la watumwa, mapango, mti uliotumika kumnyongea Mangi Meli, malango ya kupandia mlima Kilimanjaro, mahandaki na mti mrefu Afrika  kama vitatangazwa mapato ya halmashauri kwa upande wa utalii yataweza kuongezeka zaidi.

Kwa upande wake Mwenyekiti wa Halmashauri hiyo Moris Makoi alisema ziara hiyo ilikuwa imelenga kuvitambua vivutio ili kuongeza mapato ya halmashauri sambamba na kuhamasisha Watanzania kujenga utamaduni wa kuvitembelea vivutio vinavyowazunguka kwenye maeneo yao.

Aidha Makoi alisema  halmashauri hiyo itaanzisha  program maalum ya mafunzo kwa vijana wanaojishughulisha na kuwatembeza wageni  (Waongoza watalii) ili waweze kuwaelezea vizuri historia ya wilaya ya Moshi na namna ilivyo na vivutio vingi vya utalii ili wageni wanapofika Kilimanjaro kabla ya kupanda mlima huo waweze kwanza kuvitembelea vivutio hivyo ikiwemo mti uliotumika kumnyongea Mangi mengi.

Awali Ofisa mtendaji wa Kijiji cha Uru Mashariki Robert Soka, aliwaeleza madiwani hao kuwa  maporomoko ya maji Materuni ni moja ya maporomoko ya maji yanayotoka katika mto Mware ambapo kimekuwa kivitio kibwa cha wageni kutoka nje kutembelea eneo hilo.

Alisema uwepo wa maporomoko hayo ya maji ukusanyaji wa mapato umeongezeka kutoka shilingi laki sita hadi laki nane kutokana na wageni wengi kutoka nje ya nchi kuja kutembelea kivutio hicho huku takribani ya wakazi wa kijiji hicho 2,000 wanajishughulisha na shughuli za kuwatembeza watalii hao.

Naye Kaimu Mkurugenzi wa Halmashauri hiyo Dk. Alex Kazura alisema katika bajeti ya mwaka ujao wa fedha 2023-2024 halmashauri imejiwekea mkakati wa kuongeza ukusanyaji wa mapato kutoka sekta ya utalii, hivyo watakwenda kuviboresha vivutio hivyo ili kuwa na mazingira mazuri ya watalii kupenda kuyatembelea.

Wilaya ya Moshi imejaliwa kuwa na vivutio vingi vya utalii wa aina mbalimbali ndiyo maana wilaya hiyo inaitwa ni Benki ya vivutio vya utalii ambavyo bado havijatangazwa kikamilifu ili kuwa moja ya vyanzo vya mapato ya halmashauri hiyo.