Wananchi watakiwa kuilinda miradi inayotekelezwa na serikali

 

Mwenyekiti wa Chama cha Mapinduzi mkoa wa Kilimanjaro (CCM)akitia saini kitabu cha wageni baada ya kuwasili katika Ofisi za CCM Siha mnamo Oktoba 4, 2023; kwa madhumuni ya kukijenga chama na kutekeleza Ilani ya CCM.

Wananchi  wametakiwa kuilinda miradi inayotekelezwa na serikali ya awamu ya Sita inayoongozwa na Rais wa Jamhuri ya Muungano wa Tanzania Dkt. Samia Suluhu Hassan ili iweze  kuwanufaisha  kwa muda mrefu.

Mwenyekiti wa (CCM), Mkoa wa Kilimanjaro Patrick Boisafi,  aliyasema hayo Oktoba  Nne wakati akizungumza kwenye mkutano wa hadhara uliofanyika kata ya NgareNairobi  Wilayani Siha mkoani humo.

"Miradi yote inayotekelezwa  na Serikali inahitaji kutunzwa, hivyo niwaombe wananchi wa wilaya ya Siha na mkoa wa Kilimanjaro kwa ujumla, hakikisheni miradi hiyo inatunzwa kwani imetumia fedha nyingi kuweza kutekelezwa,"alisema.

Aidha aliwaomba wananchi kujitokeza kwa wingi kuchukua fomu za uchaguzi wa Serikali za Mitaa ndani ya chama hicho na uchaguzi mkuu utakao fanyika mwaka 2025  waweze kumpa  kura nyingi  za kishindo Rais  Samia Suluhu Hassan.

Kwa upande wake Mkurugenzi mtendaji wa Halmashauri ya Siha Dkt. Haji Mnasi, ameishukuru kamati y siasaa mkoa kwa kuweza kufika, kukagua na kutembelea miradi mbalimbali ya maendeleo ikiwemo ili ya afya, elimu, maji na barabara.

"Namshukuru sana Rais Samia  kwa namna ambavyo ameendelea kufungua uchumi wa wananchi kupitia miradi hiyo ya maendeleo inayojengwa ndani ya wilaya ya Siha,"alisema Dkt. Mnasi.

Akizungumzia mafanikio waliyoyapata ndani ya muda mfupi wa uongozi wa Rais Samia Diwani wa kata ya Ngare Nairobi Patrick Boisafi, amesema kwenye sekta ya elimu kata hiyo imepokea kiasi cha bilioni 1.3 ambazo zimewezesha kujenga  shule mpya, mabweni, vyumba vya madarasa pamoja na matundu ya vyoo.

Kamati ya siasa mkoa ilianza ziara ya kikazi Oktoba 4, 2023 katika majimbo yote tisa ya mkoa wa Kilimanjaro kwa lengo la kukagua uhai wa chama na Jumuiya zake , maandaalizi ya uchaguzi wa Serikali za Mitaa  pamoja na Utekelezeji wa  Ilani ya CCM ya mwaka 2020-2025 inatarajiwa kuhitimisha mnamo Oktoba 18, 2023.