Yaliyojiri Tamasha la Bagamoyo 2018

NA JABIR JOHNSON

johnsonjabir@gmail.com

 

Kikundi cha Sanaa cha Kisonge cha TPS-Moshi kikitoa burudani ya aina yake katika tamasha hilo

Siddharth Katragadda ni mwandishi, mtengenezaji wa filamu, msanii na mwana ushairi mwenye asili ya India aliyezaliwa mwaka 1972 aliwahi kusema katika mojawapo ya nukuu zake        aliwahi kusema, “Ukubwa wa utamaduni fulani unaweza kuupata katika matamasha.” 

Nukuu hiyo inaweza kushabihiana na kilichojiri katika tamasha la 37 mjini Bagamoyo mwaka huu. Tamasha hilo kongwe nchini lilianza kurindima Oktoba 20 na kuhitimishwa Oktoba 27 mwaka huu. 

Waziri wa Habari, Utamaduni, Sanaa na Michezo Dkt. Harrison Mwakyembe alifungua tamasha hilo huku Naibu wake katika wizara hiyo Juliana Shonza alifunga. Tamasha hili lilizidi kuwanufaisha wenyeji wa Bagamoyo kwani madereva wa pikipiki ‘bodaboda na bajaji’ walipata wateja wengi kutokana na tamasha kumalizika nyakati za usiku. 

Biashara ya bidhaa za madukani na masokoni mzunguko wake uliongezeka hali kadhalika katika mahoteli na nyumba mbalimbali za wageni. Katika siku ya ufunguzi uwepo wa mabalozi wa Palestina, India, Msumbiji na Nigeria. 

Mtendaji Mkuu wa Taasisi ya Sanaa na Utamaduni Bagamoyo (TaSUBa), Dkt. Herbert Makoye alisisitiza umuhimu wa udhamini katika tamasha hilo ili kuendeleza dhima ya uanzishwaji wa Bagamoyo International Festival.

Mtendaji Mkuu wa TaSUBa Dkt Herbert Makoye

SIMANZI KIFO CHA MPONDA

Machi 22, 2018 alifariki Mwalimu na gwiji la Sanaa John Mponda. Dakika moja katika siku ya ufunguzi ukumbi ulikaa kimya kumkumbuka mhamasishaji mkuu wa tamasha hilo kwa miaka mingi Mwalimu Mponda. 

Mtazamaji aliyetambulisha kwa jina la Farida Sengu akibubujikwa na machozi alisema, “Tamasha limekuwa doro kweli angekuwapo Mwalimu Mponda ungependa…”

VIKUNDI 100 VYA BURUDANI

Vikundi 65 kutoka Bagamoyo na vingine kutoka nje ya mkoa wa Pwani kikiwamo kile cha ngoma ya Kisonge TPS-Moshi. Pia katika burudani hiyo kulikuwa na kikundi cha wasanii kutoka Munich nchini Ujerumani ambacho kilionyesha muziki wake kwa watazamaji. 

Uimbaji wa mwanadada Sonja Lachenmayr, na wapiga vyombo Felix Renner, Simon Mack, Vincent Crusius, Anne Buter na Hugo Siegmeth uliwagusa wengi.

Kikundi cha Ngoma cha Wakufunzi wa TaSUBa wakionyesha umahiri wao jukwaani katika tamasha hilo

 

WARSHA NA SEMINA KWA WASANII

Taasisi ya Kuzuia na Kupambana na Rushwa (TAKUKURU) wilaya ya Bagamoyo na Kituo cha Ushauri Nasaha cha Life and Hope Rehabilitation vilipata fursa ya kupeleka elimu kuhusu masuala ya rushwa na uraibu wa dawa za kulevya unaowakumba vijana ambao ni nguvu kazi ya taifa.

KIKUNDI CHA WALIMU TaSUBa

Kilitisha sana tangu ufunguzi hadi kufunga pale kilipopewa nafasi ya kupanda jukwaani kuonyesha umahiri katika ngoma na maigizo. 

Ilionyesha wazi kuwa hawakukosea kuwa walimu na kutengeneza picha ya wanafunzi watakaokuwa wakitoka hapo watakuwa manguli wa Sanaa.

BENDI YA WEUTONGA

Kina dada watatu kutoka Harare Zimbabwe wanaounda bendi ya Weutonga kutoka kushoto ni Nancy, Beauty na Edith wakihitimisha mojawapo ya wimbo katika tamasha hilo.

Mwanamke aliyekuwa akishikilia gitaa la bass, Edith Weutonga hakika alikonga nyoyo za watazamaji waliofika kutokana na umahiri wake wa kuimba na kupiga gita hilo kwa ustadi mkubwa. 

Hata kama walikuwa wakiimba lugha ya Kichewa lakini muziki ni muziki tu, kelele, vifijo na nderemo havikuzuilika ukumbini hapo. 

Edith hakuwa peke yake alikuwa na wenzake Beauty, Nancy, Ishe, Richard, Farai, Givemore na Aaron.

UWEPO WA MATOVOLWA

Kuonekana kwa Lumole Matovolwa maarufu BIG au Tupatupa katika maigizo ya majukwaani kulivutia sana watazamaji ambao wengine walikuwa wakitazama kwa hisia maigizo yao likiwamo la ‘Bibi Titi Mohamed’. 

Akizungumza Matovolwa alisema inapaswa watanzania kukumbuka na kutilia mkazo maigizo ya majukwaani ili kuendeleza utamaduni wa watanzania kwani kwa sasa wengi wamesahau na wengine hawajui kutokana na uzito mdogo yanayopewa maigizo hayo. “Tamthilia za nje zimeua sana maigizo ya majukwaani…” alisema Matovolwa.

KIKUNDI CHA NIHICHILILA

Kikundi hiki kutoka Nanyumbu kilitisha sana kutokana na kuwa na asilimia kubwa ya wachezaji wake ni wenye umri usiopungua miaka 45.  Umahiri katika kutikisa makalio ulivutia sana kwa wenyeji hao kutoka Kusini mwa Tanzania.

 

MAONYESHO YA SANAA ZA UCHONGAJI, UCHORAJI NA USANIFU

Msanii wa Akili Arts & Crafts akitoa maelezo ya kazi yake ya sanaa kwa Katibu wa Wizara ya Habari, Utamaduni, Sanaa na Michezo Suzana Mlawi alipozuru tamasha hilo

Kusanifu ni kuumba, kufanya jambo au kitu kwa kutumia ufundi au ustadi ili kuvutia watu kwa uzuri wake. Mtu hueleza hisia zinazomgusa kwa kutumia umbo fulani ambalo limesanifiwa. 

Hivyo kazi yoyote ya sanaa inategemewa ioneshe ufundi wa hali ya juu ili iwe na mvuto kwa hadhira yake. Tukiwa Bagamoyo tuliweza kujionea kazi ya sanaa kupitia tanzu za fasihi, uchoraji, ususi, ufumaji, utarizi, uchongaji, ufinyanzi na kadhalika. Katika ukumbi wa Flexible wasanii walikuwapo humo kuonyesha kazi zao. 

MADHAIFU YA TAMASHA LA 37

Vikundi dhaifu, Mfumo wa sauti haukuwa mzuri sana, Jukwaa la Nje lina umuhimu wake lililopo la Mwembeni halifai kwa maendeleo ya kizazi cha sasa, Mfumo wa Kamera za kutembea unapaswa kutiliwa mkazo ili kuendana na sayansi na teknolojia, Uwepo wa washereheshaji butu, pia vipaza sauti vichache vilikuwa pungufu ikilinganishwa na hali ya sasa.

Taasisi ya Sanaa na Utamaduni Bagamoyo - TaSUBa

USHAURI KWA WAANDAJI NA WASANII

Kuhakiki vikundi ni vema kuwa na vichache ambavyo vitashibisha kiu za washiriki na watazamaji kuna wakati ilifikia ukumbi unakuwa umepoza licha ya wasanii kuwapo jukwaani.

Haya ni matamasha ya burudani kuwapandisha jukwaani washereheshaji wa mikutano ya ndani sio sawa, Kwani MC ana mchango mkubwa wa kulifanya jukwaa lisimame au lilale.

Kwa upande wa wasanii wenyewe kwa upande wenu sio kila tamasha unapaswa kupanda jukwaani wakati mwingine ni vema kujipima ukiona uwezo wako bado ni mdogo usipande jukwaani kupoteza muda wa watu wengine, jipange kwa wakati mwingine.

Wadhamini jitokeze kwa nguvu kudhamini tamasha la 38 ili liweze kuvuta zaidi kwani ni nafasi pekee haiwezekani mtu afunge safari kutoka Ulaya ajigharamie zaidi ya shilingi milioni 15 halafu mfanyabiashara wa Tanzania unashindwa kuchangamkia fursa hii kwa shilingi milioni tano kwenda mbele.

TaSUBa hoyeeeeee! Bagamoyo International Festival juuuu!

Watazamaji wakifuatilia kwa makini kinachoendelea katika jukwaa wakati wa tamasha la 37 la Sanaa na Utamaduni la Bagamoyo