Miili ya Askari wa Tanzania waliouawa DR Congo na Afrika ya Kati yaagwa

Majeneza yaliyobeba miili ya askari yakiagwa katika Kambi ya Kijeshi ya Lugalo jijini Dar es Salaam.

Miili ya askari watatu wa Jeshi la Ulinzi wa Wananchi wa Tanzania (JWTZ) waliofariki dunia wakati wakiwa kwenye operesheni za amani za Umoja wa Mataifa (UN) imeagwa leo Lugalo jijini Dar es Salaam. 

Askari wawili waliuawa wakiwa kwenye majukumu ya ulinzi wa amani katika Jamhuri ya ya Kidemokrasia ya Congo (DRC) na mmoja Jamhuri ya Afrika ya Kati. Praiveti Mussa Shija Machibya na Koplo Mohammed Mussa  walipoteza maisha Jamhuri ya Kidemokrasia ya Kongo wakati  Koplo Erick Masauri John alipoteza maisha akiwa Jamhuri ya Afrika ya Kati.

Shughuli za kuagwa askari hao zimefanyika katika viwanja vya hospitali ya Lugalo na kuhudhuriwa na Waziri wa Ulinzi na Jeshi la Kujenga Taifa (JKT), Dkt. Hussen Mwinyi, vikosi vya ulinzi na usalama na ndugu na jamaa. Miili ya askari hao iliyowasili jana imesafirishwa katika mikoa ya Mara, Mwanza na Zanzibar ambako itazikwa.