RON W. DAVIS: Asimulia Nelson Mandela alivyotumia Riadha kushinda uchaguzi Afrika Kusini-2

Ron Davis (mwenye tai nyekundu), akiwa mjini Pretoria na Rais wa zamani wa Afrika Kusini Nelson Mandela. Picha hiyo ilipigwa mwaka 1992 wakati Ron Davis alipozuru taifa hilo.

DAR ES SALAAM, TANZANIA

Makala yaliyopita tulijikita kumfahamu kiundani kocha Ron William Davis aliyemnoa mwanariadha aliyeipa medali ya kwanza Tanzania Filbert Bayi.

Pia tuliangazia kwa kifupi kuhusu tukio la mwaka 1968 katika michuano ya Olimpiki ambalo Tommie Smith na John Carlos baada ya kushinda mbio jijini Mexico waliunga mkono mapambano dhidi ya ubaguzi wa mtu mweusi.

Haikutosha tulimuona Ron Davis akishindwa katika mbio za kuwania kufuzu hivyo kushindwa kwenda kwenye michuano ya Olimpiki ya mwaka 1964.

Hata hivyo alipozwa machungu yake kwa kupewa ziara ya kuzuru Afrika chini ya Goodwill.

Hapo ndipo kiini cha makala haya kuhusu Ron Davis ambaye ni Mmarekani mzaliwa wa New York City aliyekulia Baltimore na Connecticut.

Leo tunaendelea katika sehemu ya pili ambayo Ron Davis anasimulia namna alivyofika Afrika Kusini na kukutana na Nelson Mandela akiwa ametoka jela la Robben Island.

ILIKUAWAJE?

Nelson Mandela enzi za uhai wake.

Licha ya kushindwa kufuzu michuano ya Olimpiki mwaka 1964 Idara ya Michezo ya jimbo ilimteua kuwa miongoni mwa watakaozuru Afrika kwa majuma sita katika nchi 20.

Nchi ya kwanza Ron Davis anasema ilikuwa Ghana na hapo ndipo alipokutana na wanariadha wengi wa Afrika hivyo kuhamasika na programu za mbio fupi za uwanja (Track & Field).

Tukio la kukutana na Nelson Mandela mpambanaji wa ubaguzi wa rangi nchini Afrika Kusini lilitokea ikiwa ni miaka takribani 15 baada ya kuhitimisha kibarua chake cha kuinoa Nigeria ambayo aliipa medali katika michuano ya All Africa Games mwaka 1978.

 

Mwaka huo akiwa na kocha Lee Evans, Ron Davis waliweka rekodi ya kuwa taifa la kwanza kuizabua Kenya kwa ushindi mwingi wa medali.

Hivyo Nigeria hadi sasa inashikilia rekodi ambayo haitafutika kamwe kuwa taifa la kwanza kuitupa chini Kenya kwani hakukuwa na taifa lolote barani Afrika ambalo lilikuwa na uwezo wa kuizidi Kenya kwa medali na pointi.

Ron Davis alifanikiwa kufanya hayo kwa medali na hata pointi akiipa Nigeria pointi 68 huku Kenya ikijiwekea kibindoni pointi 63.

Katika ukocha wake zaidi ya miaka 40 sasa hataweza kusahau alipochaguliwa na Shirikisho la Kimataifa la mbio za Ridhaa (IAAF), kusimamia na kuratibu timu ya Afrika ya mbio za kiwanja ili kupambana na Afrika Kusini jijini Dakar, Senegal na Johannesburg, Afrika Kusini. 

Alichokifanya Ron Davis anasema, " Niliwasiliana na ANC ambao tulikubaliana kukutana na Nelson Mandela na wakati huo alikuwa akiwania Urais wa kuliongoza taifa la Afrika Kusini."

Hafla ya usiku iliyopangwa  kukutana na Nelson Mandela ilifanikiwa. Usiku ule Ron Davis anasema anaukumbuka kwani Mandela aliomba radhi kwa wanamichezo wa Afrika Kusini wenye asili ya Afrika kwa michezo yote ukiwamo riadha kwa mgomo uliowafanya wasishiriki michuano ya Olimpiki na michuano ya kimataifa.

Itakumbukwa miaka ile ya 1960 hadi 1980 kulikuwa na wimbi kubwa la ubaguzi wa rangi nchini Afrika Kusini.

Mauaji ya watu 69 wakiwamo watoto 29 katika kituo cha polisi kule Transvaal (ambayo sasa ni Gauteng) maarufu 'Sharpville Massacre' Machi 21, 1960 ilikuwa miongoni mwa matukio yaliyokuwa yakionyesha hali ya ubaguzi ilivyokuwa nchini humo.

Kauli ya Mandela usiku ule kuomba radhi ilimpa kibali katika uchaguzi. Ikumbukwe  mwaka 1964 alihukumiwa miaka mitano jela na serikali ya kikaburu na baadaye walimtupa jela ya Robben Island alikodumu hadi mwaka 1990.

Mchango wa Ron Davis katika kuirudisha Afrika Kusini katika michuano ya kimataifa ilionekana michuano ya Olimpiki ya mwaka 1992 mjini Barcelona, Hispania.

Afrika Kusini ilishiriki kwa mara ya kwanza tangu mwaka 1960, ikiwapeleka wanamichezo 93 wanaume 68 na wanawake 25 ambao walishiriki matukio 87 kwenye michezo 19.

Afrika Kusini ilirudi na medali mbili za fedha. Mwanariadha Elana Meyer alikuwa miongoni mwa waliopa medali ya fedha Afrika Kusini katika mita 10,000 (10K) akitumia dakika 31:11.75

Pia Ron Davis anasema baada ya kumsoma kwa kina Nelson Mandela aligundua masuala mbalimbali yenye kutia moyo katika medani ya michezo.

 

"Niliposoma nukuu za Nelson Mandela; aliposema Elimu ni silaha yenye nguvu inayoweza kubadilisha dunia, pili aliposema Michezo ina nguvu ya kubadilisha dunia ilinigusa sana."

USHAWISHI WA GRACA MACHEL KUKUTANA NA MANDELA

Kutokana na kufanana katika mapambano dhidi ya mtu mweusi Ron Davis alijikuta akikutana na wapambanaji mbalimbali barani Afrika miongoni mwa hao alikuwa Graca Machel ambaye alikuwa mke wa Rais wa zamani wa Msumbiji Samora Machel na baadaye Nelson Mandela.

Ron Davis anasema alipata nafasi ya kuinoa Msumbiji ambayo ilimpa nafasi ya kupenya na kukutana na Nelson Mandela.

Njia ilirahisishwa kutokana na uhusiano wa Graca Machel na Nelson Mandela hivyo alipopewa majukumu ya kuandaa timu wakati ule alikuwa na mawasiliano mazuri na Graca.

Makala haya yametayarishwa na Jabir Johnson ambaye alipata fursa ya kuzungumza na Ron Davis  masuala mbalimbali ya maisha yake na medani ya riadha alipotua nchini Tanzania. Kwa maoni ushauri barua pepe: jaizmela2010@gmail.com