Polisi, DC Mwaipaya wafanya usafi kituo cha Afya Mwirange-Mwanga

 

Jeshi la Polisi kwa kushirikiana na Watumishi wa kituo cha afya Mwirange, Januari 28,2023 wameshiriki zoezi la usafi wa mazingira katika baadhi ya maeneo yanayozunguka kituo hicho cha afya  ikiwa ni sehemu ya kuimarisha mahusiano baina yao na wananchi ili kukabiliana na vitendo vya uhalifu. 

Akizungumza mara baada ya zoezi la usafi Mrakibu Mwandamizi wa Polisi Wilaya ya Mwanga (SSP) Hendry Nguvumali alisema, jeshi la polisi nchini lina kawaida ya kushiriki katika shughuli mbalimbali za kijamii kila Jumamosi ya mwisho wa mwezi. 

SSP Nguvumali  alisema askari polisi wilaya ya Mwanga wameamua kuungana na wafanyakazi wa kituo cha afya Mwirange, ili kufanya usafi, lengo likiwa ni kuwa karibu na jamii pamoja na kutoa elimu kwa jamii itakayo lenga usalama wa Raia na mali zao, katika kuzuia na kupambana na uhalifu. 

Akishiriki zoezi la usafi Mkuu wa Wilaya ya Mwanga Abdallah Mwaipaya alisema serikali wilayani humo imeungana na jeshi hilo katika kufanya usafi katika eneo ambalo linatoa huduma za afya kwa wananchi. 

Mwaipaya alisema maeneo ya kutolea huduma za afya yanapokuwa na mazingira salama yanasaidia kuepusha kuwepo kwa maambukizi mbalimbali ya magonjwa yasiyakuambukiza kwa wananchi wanaofika katika kupata huduma za kimatibabu. 

Alisema wilaya ya Mwanga inazo kata 20 na kati  ya hizo kata 16 zote zina polisi jamii na kwamba uwepo wa askari hao, umesaidia kupunguza changamoto za wananchi hao kusafiri kwenda katika kituo kikuu kupeleka mashauri mbalimbali. 

Kwa upande wake Mganga Mfawidhi wa Kituo cha Afya Mwirange Dkt. Yosya Foya, alisema kwenye kituo hicho wagonjwa wengi wanaofika kwa ajili ya kupatiwa matibabu wengi wao wanasumbuliwa na ugonjwa wa homa ya mapafu, kuharisha na malaria. 

Akizungumza Dkt. Afath Mohamed na Dkt. Joyce Kangero, walisema changamoto ya maradhi ambayo wakazi wa wilaya ya Mwanga wamekuwa wakiugua  na kuletwac katika kituo hicho cha afya yanaweza kuzuilika endapo watazingatia zaidi elimu ya afya ambayo imekuwa ikitolewa na wataalamu hao wa afya. 

Zoezi la usafi wa mazingira hufanyika kila Jumamosi ya mwisho wa kila mwezi ambapo Januari 28 mwaka huu Jeshi la Polis8i Mwanga kwa kusirikiana na uongozi wa serikali ya wilaya na uongozi wa kituo cha afya Mwirange wameshiriki kufanya usafi katika kituo hicho.