Tuzingatie Kilimo cha Kahawa kwa Ukuaji wa Uchumi

UMEWAHI kujiuliza kwanini unapoamka asubuhi unahitaji chai badala ya kahawa wakati yote ni mazao yanayotoa vinywaji muhimu kwa maisha ya watu?

Kahawa ni kinywaji maarufu na kinachopendwa sana na watu wengi. Kahawa pia imekuwa ni zao mashuhuri la kibiashara duniani kwa muda mrefu. Kwa hakika umaarufu na kupendwa kwa kinywaji cha kahawa unatokana na manufaa kadhaa yanayopatikana ndani ya kinywaji hiki.

Kwa Afrika Mashariki hususani maeneo yote yanayolima kahawa kinywaji cha kahawa ndicho kinachoongoza kupendwa. Hata hivyo juhudi mbalimbali zimekuwa zikifanyika ulimwenguni kote kuhakikisha unywaji wa kahawa unaongezeka katika jamii. Kama ilivyo chai watu wanavyoongezeka katika unywaji wa chai ndivyo kilimo cha chai kinavyopewa uzito. 

Shirika la Kimataifa la Kahawa (ICO), liliamua kwa dhati kuongeza unywaji wa kahawa na kilimo chake pale lilipoamua kwa moyo mmoja kuanza maadhimisho ya siku ya Unywaji wa Kahawa kila Oktoba Mosi. Mnamo mwaka 2015 kila siku ya kwanza ya mwezi Oktoba huwa maalum kwa ajili ya kuikumbusha jamii kuhusu unywaji wa kahawa.

Kwa mara ya kwanza maadhimisho hayo yalifanyika jijini Milan, Italia kwa ajili ya kuongeza unywaji wa kahawa. ICO ilisema Oktoba Mosi ni maadhimisho ambayo ni maalum kwa ajili ya kuunga mkono mamilioni ya wakulima ambao wamekuwa wakitegemea kuendesha maisha yao kupitia zao hilo muhimu la kahawa pia kuwapa fursa wale ambao wamekuwa wakipenda kahawa na bidhaa zake kuendelea kutumia kinywaji hicho.

Utafiti umeonyesha kuwa unywaji kahawa una faida kubwa kwa mwanadamu. Mtu anayekunywa vikombe vitatu hadi vinne vya kahawa kwa siku, huishi kwa muda mrefu ukilinganisha na asiyekunywa kabisa.

Utafiti uliofanywa katika chuo kimoja mjini London umeonyesha kuwa mtu mwenye kunywa kahawa huwa na uelewa zaidi ukilinganisha na asiyekunywa. Magonjwa kama saratani, kisukari, matatizo ya maini na vilevile akili yameonekana kuwapata kwa nadra wanywaji kahawa. Wanawake wajawazito pia hufaidika kwa wingi endapo watakunywa kwa kiasi walau kikombe kimoja kwa siku. Ripoti zinaonyesha kuwa faida za kunywa kahawa ni kubwa kuliko hasara.

Watafiti walipolinganisha watu wasio kunywa kahawa, na wale wanaokunywa takriban vikombe vitatu vya kahawa kwa siku walionekana kupunguza uwezekano wa kupata kiharusi.

Kunywa kahawa huchangamsha mwili ikiwa na maana humfanya mnywaji asijisikie kuchoka na huongeza kiwango cha nguvu za mwili. Caffeine inayopatikana kwenye kahawa huuchangamsha ubongo na kuufanya mwili kuwa katika hali nzuri. Hii ndiyo sababu watu wengi wenye kazi nyingi hupenda kunywa kahawa wakati wa kazi au baada ya kazi zao.

Pia unywaji wa kahawa huyeyusha mafuta mwilini; Tafiti mbalimbali zinaeleza kuwa kahawa huchangia katika kuyeyusha mafuta mwilini na kusababisha kupunguza uzito wa mwili. Utafiti mmoja uliofanyika ulibaini kuwa kahawa iliweza kusaidia kupunguza mafuta kwa watu wanene kwa asilimia 10 na kwa asilimia 29 kwa watu wembamba.

Faida nyingine ya unywaji wa kahawa ni kuwa kahawa ina virutubisho muhimu; Inaelezwa kuwa kikombe kimoja cha kahawa kina virutubisho kama Riboavin (Vitamini B2): 11%, Asidi ya Pantothenic (Vitamini B5): 6%, Manganese na Potasiamu: 3%,Magnesiamu na Niacin (B3): 2%. Hivyo kunywa vikombe visivyozidi vitatu kwa siku kutaongeza kiwango cha virutubisho hivi.

Huzuia maradhi ya kupoteza kumbukumbu; maradhi ya kupoteza kumbukumbu huwakabili watu wengi hasa wenye umri wa kuanzia miaka 65. Kwa sasa hakuna tiba ya maradhi haya lakini yanaweza kuzuiwa au kupunguzwa kwa lishe bora pamoja na mazoezi. Wataalamu wa afya wanasema watu wanaokunywa kahawa hupunguza kama siyo kukabili athari za maradhi haya kwa asilimia 65.

Unywaji wa kahawa ni mlinzi mzuri wa afya ya ini; Ini ni kiungo muhimu sana kwenye mwili wa binadamu. Hata hivyo maradhi kama vile uvimbe kwenye ini (hepatitis) pamoja na tatizo la seli za ini kugeuka makovu (cirrhosis) hupungua kutokana na unywaji wa kahawa.

Kwa wale wenye msongo wa mawazo unywaji wa kahawa hupunguza kwa kiasi kikubwa changamoto hiyo; kwani msongo wa mawazo ni tatizo baya la kiakili na kisaikolojia ambalo linaweza kuathiri maisha kwa kiasi kikubwa hata kusababisha kifo.

Hivyo basi umuhimu wa kilimo cha kahawa unapaswa kupewa kipaumbele hasa ikizingatiwa kuwa Tanzania ni nchi ya nne barani Afrika kwa uzalishaji wa kahawa; ikizidiwa na Ethiopia (39%), Uganda (23%) huku nafasi ya tatu ikishikwa na Ivory Coast (13%). Asilimia 6 ya uzalishaji huo inatoka Tanzania hivyo ni muhimu kuendelea kutilia mkazo kilimo cha zao hili kwa manufaa zaidi.