BOOST yatoa bil. 1.9 ujenzi wa madarasa na matundu ya vyoo

 

Serikali ya Tanzania kwa kushirikiana na Benki ya Dunia imeanzisha mradi wa BOOST ili kutatua  changamoto zinazoikabili  sekta ya elimu ya Awali na Msingi hapa nchini, ambapo itajenga na kukarabati miundombinu ya shule za awali na msingi. 

 Halmashauri ya Wilaya ya Moshi imepokea jumla ya Shilingi bilioni 1.9 kwa ajili ya ujenzi wa vyumba vya madarasa 48, shule mpya mbili pamoja na matundu ya vyoo 30.

Mkurugenzi mtendaji wa halmashauri ya Moshi Kastori Msigala, ameyasema hayo Aprili Mosi, 2023 wakati wa ziara yake ya kutembelea, kuona na kuangalia maeneo ambayo yatakwenda kujengwa shule mpya kupitia banjeti ya 2023-2024.

"Katika bajeti ya mwaka 2023-2024  serikali kupitia mradi wa BOOST imeleta fedha kiasi cha shilingi bilioni 1.9 kwa ajili ya ujenzi wa shule mpya mbili kwenye maeneo yenye msongamano mkubwa wa wanafunzi na vyumba vya madarasa 48 pamoja na vyoo 30 kwenye shule zenye miundombinu chakavu”, alisema Msigala.

Aliongeza, “Nyingi ya shule hizi zilizojengwa miaka ya 40 miundombinu yake kwa sasa ni chakavu kiasi cha kwamba hazina mazingira rafiki kwa matumizi; ziko zinazohitaji ukarabati mkubwa na zingine ni za kuvunja na kujengwa upya”.

Msigala aliendelea kusema kuwa moja wapo ya shule ambazo zitanufaika na mradi huo ni shule ya msingi Matemboni ambapo alisema katika bajeti  ya mwaka 2023/204 jumla ya shilingi milioni 60 zimetengwa kwa ajili ya ujenzi wa madarasa mawili, jengo la utawala na matundu ya vyoo vinane.

Kwa upande wake Afisa Elimu Msingi wa Halmashauri ya Wilaya ya Moshi Gaudence Assey,  alisema zaidi ya shule za msingi 190 ambazo ni mali ya serikali wilayani humo ni chakavu, zinatakiwa kubomolewa na kujengwa upya, zingine zikihitaji ukarabati mkubwa.

"Halmashauri ya Wilaya ya Moshi ina jumla ya shule za Msingi 229 ambazo ni za serikali na kati ya hizo shule 190 zina uchakavu mkubwa ambazo zilijengwa toka miaka ya 1940 ambazo kwa sasa zinahitaji  kuvunjwa  kutokana na miundombinu yake kuwa chakavu,"alisema.

Pia afisa elimu huyo alisema zipo shule za msingi 98 zenye uchakavu mkubwa wa vyoo vya wanafunzi ambavyo vimejengwa juu ya shimo na hivyo kuhitajika kujengwa upya.

Awali Kaimu Mkuu wa Shule ya Msingi Matemboni Sofia Lyatuu, alisema yako madarasa  matatu hayatumiki kwa miaka 10 waliyafunga kutokana na kuta zake kupasuka na kuhofia kuleta madhara kwa wanafunzi na jamii kwa ujumla  na kuiomba serikali kuyavunja.

Mbali na hayo Kastori alisema serikali imekuwa ikiboresha mazingira ya ufundishaji na kujifunzia ambapo  katika halmashauri ya Moshi  kwa mwaka 2022-2023  ilipokea shilingi milioni 340  kwa ajili ya ujenzi wa vyumba vipya ya madarasa 12 kwenye shule za msingi Kilolotoni, Kochakindo, Mieresini, Ngangu, Mruwia, Kyaseni, Fumvuhu, Kisuluni na Maendeleo, pamoja na kujenga matundu ya vyoo 82 yenye thamani ya shilingi  milioni 113. 4.