Wagomea Shilingi 3,000 ya taka

NA MWANDISHI WETU

Wakazi wa Relini, Mtoni wakifuatilia hotuba ya diwani Mwakyembe.

WAKAZI wa Kata ya Mtoni Wilaya ya Temeke jijini Dar es Salaam wameigomea halmashauri ya wilaya hiyo kutozwa shilingi 3,000 ya taka kwa kila kaya kwa mwezi ambayo wameanza kuitoza na badala yake watumie utaratibu wa zamani.

Hayo yamejiri huku maeneo ya Temeke na Mwembeyanga yaliyokuwa yakitumika kumwaga taka yamebinafsishwa hivyo taka zimeanza kupelekwa kwenye dampo kuu la Pugu.

Mwananchi akizungumza katika mgomo huo

Aidha wakazi hao wameitaka halmashauri hiyo kushusha tozo ya bei hadi shilingi elfu moja kutokana na hali ngumu ya maisha kwa sasa inayowanyemelea huku wakiwa hawana kazi za kudumu.

Wakizungumza katika mkutano wa dharura ambao umefanyika mwishoni mwa wiki lililopita katika mtaa wa Relini, Mtoni-Mtongani walisema halmashauri haikuwashirikisha katika mchakato kuhusu tozo hiyo.

“Lilipokuja tuliona kabisa serikali haitaki ushirikiano na wananchi wake kwani kumleta mkandarasi huyo ambaye anasemekana ni kutoka Kinondoni wakati sisi ni wa Temeke tuliona wazi lilishapangwa kunufaisha wachache,” walisema wakazi hao.

Diwani Bernard Mwakyembe akizungumza

“Mapendekezo ya wengi ni shilingi elfu moja kwa mwezi kwa kila nyumba, shilingi elfu tatu hatulipi na hakuna wa kutufanya lolote…hawakutushirikisha,” waliongeza kusema wakazi hao

Pia wamesema mpaka sasa mkandarasi aliyewekwa na halmashauri ni hatua za kunufaisha wachache huku vijana wao wakikosa ajira kupitia mfumo walioutengeneza tangu awali wa ukusanyaji wa taka kwa bei nafuu.

“Tulijiwekea utaratibu mzuri wa vikundi vya vijana wa hapa Mtoni ambao kila kaya ilikuwa ikichangia kiasi kidogo tu cha fedha, kutuletea mkandarasi wakati sisi hatujashindwa tunaona ni kutuvuruga,” walisema wakazi hao.

Hata hivyo wengine wamehoji magari ya halmashauri yaliyokuwa yakitumika kuzoa taka wameyapeleka wapi huku wakitaka njia ya wakandarasi wakubwa isipewe nafasi kutokana na hali za maisha za wakazi wa kata hiyo.

Kwa upande wake Diwani wa kata hiyo Bernard Mwakyembe alisema maoni ya wananchi atayapeleka kwa mkandarasi na endapo hatayakubali basi atakuwa ameshindwa kuzoa taka katika kata hiyo na hivyo utaratibu wa zamani unaweza kutumika kuifanya kata hiyo kuwa safi muda wote.