16 kortini kwa kukutwa na gongo

NA MWANDISHI WETU

Pombe haramu ya Gongo katika hatua za awali

WATU 15 wamepandishwa katika mahakama ya mwanzo ya Ilala jijini Dar es Salaam kwa kukutwa na pombe haramu ya gongo kinyume na sheria za nchi.

Wakisomewa mashtaka na Karani Blanka Shayo mbele ya Hakimu Mkazi Matrona Luanda ilidaiwa Marijani Muhidin (29), Amos Yakob (30), Amina Ally (47), Hidaya Abdul (33), Monica Milanzi (49), John Kibuko (26), Sophia Josephy (40), Said Shabani (26), Hugo Saimoni (51), David Wilfredy (26), Shukuru Mwagama (42), Said Kinyozi (47), Kennedy Umcha (35), Ndoma John (28), Adam Mohamed (48) na Boniface Nestroy (31) walitenda kosa hilo Agosti 30 mwaka huu saa 11:30 jioni katika mtaa wa Pemba, Kariakoo jijini hapa.

Aidha ilidaiwa askari wa Jeshi la Polisi Na. 1669 Koplo Thomas aliwakuta washtakiwa wakiwa na lita 15 za pombe hiyo kinyume na Kifungu cha Sheria Na. 30 (16) cha Kanuni ya Adhabu.

Kesi itatajwa tena Septemba 12 mwaka huu huku fungu la dhamana Sh. 200,000 lilikuwa wazi kwa kila mshtakiwa.

Read More

Kondakta kortini kwa kutukana Mwalimu

NA JABIR JOHNSON

Mwalimu akifundisha darasani (Picha ya Mtandao)

KONDAKTA wa daladala mkazi wa Vingunguti Kiwalani Nuhu Omary (32), jijini Dar es Salaam amefikishwa katika Mahakama ya Mwanzo ya Ilala kwa kosa la kuwatukana walimu.

Akisomewa mashtaka na Karani Blanka Shayo mbele ya Hakimu Matrona Luanda ilidaiwa mshtakiwa alitenda kosa hilo Agosti 19 mwaka huu saa 8:30 mchana katika maeneo ya Mnazimmoja  kinyume na Kifungu cha Sheria Na. 89(1)(a) sura ya 16 ya Kanuni ya Adhabu.

Aidha ilidaiwa mshtakiwa alimtukana Mwalimu Asia Abdallah na walimu wenzake waliokuwa katika gari hilo kuwa “Hawana Kazi Wanajiuza Mchana Kutwa”.

Hakimu alisema fungu la dhamana la Sh. 100,000 lipo wazi kwa mshtakiwa na mdhamini wa kuaminika huku kesi ikitarajiriwa kusikilizwa tena Septemba 8 mwaka huu.

Read More

Wizi wa madini wawafikisha kortini

ILALA, DAR ES SALAAM

Madini aina ya Natural Opal

WAKAZI watatu wa Buguruni jijini Dar es Salaam akiwamo mganga wa kienyeji wamefikishwa katika Mahakama ya Wilaya ya Ilala kwa kujipatia madini yenye thamani ya Sh. Milioni 500 kwa udanganyifu.

Mwendesha Mashtaka Sylivia Mitanto mbele ya Hakimu Mkazi Wilberforce Luhwago alidai Salum Joseph (52) ambaye ni mganga wa kienyeji, Zahoro Hamis (41) na Sofia Michael kwa pamoja walitenda kosa hilo maeneo ya Buguruni Juni 24 mwaka huu kinyume na sheria za nchi.

Aidha Mitanto alidai washtakiwa walijipatia madini aina ya Opal (karati 92.14) yenye thamani ya Shi. Milioni 500 kwa udanganyifu wa kutumainiwa  mali ya Jesse Kahembe aliyewatuma wakauze.

Upelelezi wa shitaka hilo haujakamilika hadi Septemba 12 mwaka huu itakapotajwa tena, huku Hakimu akiwataka washtakiwa kutimiza masharti ya dhamana ya Sh. Milioni 75 kila mmoja au hati ya makazi yenye thamani hiyo na wadhamini wa kuaminika. 

Read More

Matusi yampandisha kizimbani

NA MWANDISHI WETU

MKAZI wa Sikukuu jijini Dar es Salaam Athuman Iddi (24) amepandishwa katika mahakama ya mwanzo Ilala kwa kosa la kumtukana matusi ya nguoni Askari wa Jeshi la Polisi.

Akisomewa mashtaka na karani Blanka Shayo mbele ya Hakimu Mkazi Matrona Luanda ilidaiwa mshtakiwa alitenda kosa hilo Agosti 29 mwaka huu saa 5:49 usiku kinyume na Kifungu cha Sheria Na. 89(16) cha kanuni ya adhabu.

Aidha ilidaiwa mahakamni hapo mshtakiwa alitenda kosa hilo katika mtaa wa Kongo kwa askari aliyekuwa lindo katika Tawi la NMB aliyefahamika kwa jina la Sajenti Kambona D.4061 alipomtukana, “Wasenge na hamnifanyi lolote”.

Hakimu alisema fungu la dhamana lipo wazi kwa mshtakiwa kwa Sh. 400,000 na kwamba kesi hiyo itatajwa tena Septemba 8 mwaka huu.

Katika shauri lingine mkazi wa Zakheim Mbagala Ramadhani Omary (35), alipandishwa kortini kwa kumtukana Zawadi Abdallah matusi ya nguoni.

Ilidaiwa mahakamani hapo mshtakiwa alitenda kosa hilo Agosti 26 mwaka huu saa 11 jioni maeneo Jangwani, “Kuma la mamaake, msenge unafirwa” kinyume na sheria za nchi.

Hakimu alisema fungu la dhamana la Sh. 100,000 lipo wazi na mdhamini mmoja wa kuaminika na kesi itatajwa tena Septemba 8 mwaka huu.

Read More

Fundi seremala kizimbani kwa wizi

NA DIANA JOACHIM, TUDARCO

FUNDI seremala aliyefahamika kwa jina la Mrisho Iddi (29) mkazi wa Mchikichini amefikishwa mahakama ya mwanzo ya Ilala jijini Dar es Salaam kwa kosa la kuiba pochi iliyokuwa na dola 3000.

Akisomewa mashtaka na karani Blanka Shayo mbele ya Hakimu Matrona Luanda ilidaiwa mshtakiwa alitenda kosa hilo kinyume na sheria za nchi, Agosti 26 mwaka huu katika Mtaa wa Kongo, Kariakoo.

Aidha ilidaiwa kuwa mshtakiwa aliiba pochi iliyokuwa na risiti za bidhaa, vitambulisho na dola 3000 (sawa na Sh. Milioni 6 mali ya Alli Bonomali .

Hakimu alisema dhamana ipo wazi kwa mshtakiwa kwa ahadi ya Sh. Milioni 10 na wadhamini watatu wa kuaminika na aliahirisha kesi hiyo hadi Septemba 6 mwaka huu.

Katika shauri lingine Omary Twaha (23) na Jeremia Molel (32) wote wakazi wa jijini hapa waliiba Sh. Milioni 2 zilizokuwa dukani mali ya Boniface Gervas.

Washtakiwa walikana mashtaka hayo na kesi kuahirisha hadi Septemba 7 mwaka huku washtakiwa wakitakiwa kutoa Sh. Milioni 3 na wadhamini wawili.

Read More

Kortini kwa kukutwa na Heroine

ILALA, DAR ES SALAAM

MKAZI wa Buguruni kwa Mnyamani jijini Dar es Salaam Mbaraka Ndambwe (22) amepandishwa kizimbani katika mahakama ya wilaya ya Ilala kwa kukutwa na dawa za kulevya aina ya heroine.

Mwendesha mashtaka Chesensi Gavyole mbele ya Hakimu Mkazi Flora Haule alidai mshtakiwa alitenda kosa hilo Februari 2 mwaka huu Buguruni kwa Mnyamani kinyume na sheria za nchi.

Pia ilidaiwa mahakamani hapo kuwa siku ya tukio alikuwa katika  nyumba ya Salma Ramadhani wakati alipokamatwa akiwa na gramu 1.92 ya dawa hizo.

Upande wa mashtaka ulidai kuwa unajiandaa kuleta mashahidi watano na vielelezo viwili kuhusu kesi inayomkabili mshtakiwa.

Hakimu aliahirisha kesi hiyo hadi Septemba 7 mwaka huu itakapotajwa tena.

Read More

Kortini kwa wizi kontena la Mil. 160

NA JABIR JOHNSON

WATU watatu wamepandishwa kortini katika mahakama ya wilaya ya Ilala jijini hapa wakikabiliwa na makosa ya kula njama na kujipatia mali kwa udanganyifu ikiwamo wizi wa kontena lenye thamani ya Sh. Milioni 160

Wakisomewa mashtaka na Mwendesha Mashtaka Sylivia Mitanto mbele ya Hakimu Mkazi Wilberforce Luhwago mshtakiwa Abdallah Ndule mkazi wa Mbezi Louis (47) na Hassan Selemani mkazi wa Buguruni (49) ilidaiwa washtakiwa wakiwa na Hamis Mtitu (ambaye hakutokea mahakamani hapo) walitenda kosa hilo Mei 16, 2015 maeneo Ticts Bandarini.

Aidha Mitanto alidai walitenda kosa la kula njama kinyume na Kifungu cha Sheria Na. 384 cha Kanuni ya Adhabu kilichofanyiwa marekebisho mwaka 2002 na walitenda kosa la wizi wa kontena Na. MSK 435766 lenye thamani ya Sh. 160,125,433 kinyume na Kifungu cha Sheria Na. 258 na 265(16) mali ya Nyota Tanzania Ltd.

Baada ya kusomewa mashtaka yao Hakimu wa mahakama hiyo aliwapa masharti ili waweze kuachiliwa kwa dhamana kuweka Sh. Milioni 20  au Hati za Makazi zenye thamani ya Sh. Milioni 20, washtakiwa walishindwa na kurudishwa rumande hadi Agosti 30 mwaka huu itakapotajwa tena.

Read More

Kizimbani kwa kuvuruga ibada

ILALA, DAR ES SALAAM

WATU 10 wamepandishwa kizimbani kwa kuvuruga ibada ya waumini wa Kanisa la Moravian Parishi ya Kitunda jijini hapa.

Wakisomewa mashtaka na Mwendesha Mashtaka Sylivia Mitanto  mbele ya Hakimu Wilberforce Luhwago ilidaiwa washtakiwa walitenda kosa hilo Agosti 14 mwaka huu.

Ilidaiwa Joachim Mwaseba (45), Obadia Mwatonoka (28), Obedi Mbotwa (28), Matthew Mwasiposya (62), Kennedy Nsangafuru (21), Geoffrey Kibona (25), Godfrey Gambi (35), Edom Kasengile (39), Boniface Disoni (35) na Martin Mwiba (35) walitenda kosa hilo kinyume na Kifungu cha Sheria Na. 126 na 35 CAP 16 R.E 2002 cha Kanuni ya Adhabu.

Washtakiwa wote walikana kuhusika na tukio hilo hivyo kuachiliwa kwa dhamana

Awali upande wa utetezi chini ya Wakili Msomi Hezron Mwankenja uliiomba mahakama kuipeleka kesi hiyo hadi Novemba 24 mwaka huu kutokana na wakili huyo kupata udhuru ambapo Hakimu Luhwago aliridhia ombi hilo.

Read More

Wizi wa Sh. Milioni 13 wamtupa jela miaka 4

NA DIANA JOACHIM, TUDARCO

MKAZI wa Lumo, Ilala jijini hapa Ally Juma  (25) ametupwa jela miaka minne baada ya kukutwa na kosa la wizi wa Sh. 13,500,000 mali ya Come and Call Co. Ltd

Akisomewa mashtaka na Mwendesha Mashtaka Florida Wenceslaus mbele ya Hakimu Mkazi Juma Hassan ilidaiwa Machi 3, 2014 mshtakiwa akiwa na Charles Malima walivamia kampuni hilo na kuiba kiasi hicho cha fedha.

Aidha mwendesha mashtaka alidai mshtakiwa aliwatishia kwa bastola Ivan Marinde na Agnes Pima ili kujipatia mali hiyo kinyume na Kifungu cha Sheria Na. 258 na 265 cha Kanuni ya Adhabu.

Awali ilidaiwa mahakamani hapo kuwa washtakiwa hao walijipatia mali hiyo kwa uvamizi wa kutumia silaha kinyume na Kifungu cha Sheria Na. 287A cha Kanuni ya Adhabu.

Hakimu alisema ushahidi wa kuvamia kwa kutumia silaha haukuthibitika  hivyo mshtakiwa wa pili Charles Marinde kuachiwa huru.

Pia mshtakiwa wa kwanza Ally hakuwepo mahakamani hapo kutokana na kuendelea kutumikia kifungo cha miezi sita kwa kutaka kumpaka kinyesi Hakimu wa kesi hiyo. 

Read More

Wembe wampeleka kortini, sahani zamtupa jela miezi minane

NA JEMA MAKAMBA

KIJANA aliyefahamika kwa jina la Chande Rashid (20) amepandishwa kortini katika Mahakama ya Mwanzo Ilala jijini Dar es Salaam kwa kosa la wizi na kudhuru mwili.

Akisomewa mashtaka na karani Lucy Lutabazi mbele ya Hakimu Asha Mpunga ilidaiwa mshtakiwa alitenda kosa Agosti 8 mwaka huu saa 4 usiku kinyume na Kifungu cha Sheria Na. 241(16) cha kanuni ya adhabu maeneo ya Uhonda na Raha.

Ilidaiwa mshtakiwa ambaye kazi yake ni kubeba mizigo walipishana kauli na Mohamed Mfaume ndipo alipochukua wembe na kumchana pua.

Hakimu ameahirisha kesi hadi Septemba 7 mwaka huu itakapotajwa tena.

Katika shauri lingine Sharif Fadhil (19) mkazi wa Kigogo jijini Dar es Salaam ametupwa jela miezi minane kwa wizi sahani na kuharibu mali za Noel Aloyce.

Ilidaiwa Juni 16 mwaka huu katika mtaa wa Aggrey mshtakiwa alitenda kosa kinyume na Kifungu cha Sheria Na. 265(16) na 336(16) akitumia kisu.

Hakimu alimtaka mshtakiwa atupwe jela na akishatoka atapaswa kulipa  thamani ya mali ya mshtaki.

Read More

Kortini kwa ubakaji mtoto miaka 5

ILALA, DAR ES SALAAM

MKAZI wa Kitunda jijini Dar es Salaam Damian Leonard (18) amepandishwa kizimbani katika mahakama ya Wilaya ya Ilala kwa kosa la ubakaji.

Akisomewa makosa na Mwendesha Mashtaka Sylivia Mitanto mbele ya Hakimu Mkazi Wilberforce Luhwago ilidaiwa Mei 27 mwaka huu Kitunda Machimbo wilaya hapa mshtakiwa alimbaka mtoto wa miaka mitano.

Aidha ilidaiwa mahakamani hapo mshtakiwa alishtakiwa na Kifungu cha Sheria Na. 130 (1)(2)(e) na 131(1) cha kanuni ya adhabu CAP 16 R.E 2002.

Mshtakiwa alikosa wadhamini Hakimu aliahirisha kesi hadi Septemba 6 mwaka huu itakapotajwa teja.

Katika shauri lingine Mgeni Mohamed mwenye miaka 18 mkazi Bombom alipandishwa kortini katika mahakama hiyo  kwa kukutwa na kete 60 za dawa za kulevya aina ya bangi zenye gramu 27.73

Mwendesha Mashtaka Chesensi Gavyole alidai mbele ya Hakimu Mkazi Flora Haule mshtakiwa alitenda kosa hilo kinyume na Kifungu cha Sheria Na. 15(1)(a) na 15(2), Juni 24 mwaka huu maeneo ya Kiwalani CCM.

Kesi hiyo imeahirishwa hadi Septemba 6 mwaka huu itakapotajwa tena.

Read More

Kortini kwa kuchomoa Sh.200,000/-

NA MAGRETH MTAFI

MKAZI wa Magomeni Thadei Agostino(35) amefikishwa mahakama ya mwanzo Ilala kwa kukabiliwa na mashtaka ya kumchomolea Seif Mohamed kiasi cha shilingi 200,000.

Akisomewa mashtaka hayo mbele ya Hakimu mkazi ya mahakama  hiyo, Asha Mpunga ,Karani wa kesi hiyo Lucy Lutabazi alidai mshtakiwa alifanya kosa hilo Agosti 20 saa tatu usiku maeneo , Kariakoo Dar es Salaam.

Ilidaiwa mshtakiwa alifanya kosa hilo kwa makusudi huku akijua kuwa ni kosa kisheria, baada ya kusomewa mashtaka hayo, mshtakiwa alikana kosa hilo.

Hakimu mpunga alisema dhamana iko wazi kwa kufuata masharti, ambapo wadhamini watasaini shilingi 300,000, mshtakiwa alishindwa kukidhi masharti ya dhamana na alirudishwa rumande hadi Septemba Mosi mwaka huu kesi hiyo itakapotajwa tena.

Katika hatua nyingine washtakiwa Bernad stanley(18) na Chacha Chacha(34) walifikishwa katika mahakama hiyo kwa kosa la wizi wa fedha Sh. 60,000 mali ya Wiliam Mlenda.

Ilidaiwa washtakiwa hao walifanya kosa hilo Agosti 21 maeneo ya kariakoo Dar es Salaam.

Washtakiwa walikana kosa kosa hilo mshtakiwa namba moja Bernard Stanley alirudishwa rumande kwa kushindwa kukidhi masharti ya dhamana na Chacha ametoka kwa dhamana ambapo watarudi mahakamani hapo Semptemba mosi kesi hiyo itakapotajwa tena.         

Read More

Jela miaka 3 kwa Wizi

ILALA, DAR ES SALAAM

MKAZI wa Unguja Migombani Said Rashid Said (26) amehukumiwa kwenda jela miaka mitatu na mahakama ya Wilaya ya Ilala, Dar es Salaam baada ya kukutwa na hatia ya wizi  wa gari mali ya Mohamed Ibrahim Ismail.   

Mwendesha mashtaka mahakamani hapo Florida Wenceslaus alidai mshtakiwa alitenda kosa hilo kati ya Aprili 7 na 19 mwaka 2012 alikula njama na udanganyifu ili kujipatia gari aina ya Suzuki Escudo lenye usajili wa T 708 BZS lililokuwa likisafiriwa kutoka Zanzibar kwenda Kilimanjaro kupitia Dar es Salaam.

Wenceslaus alidai gari hilo awali lilikuwa Zanzibar chini ya mmiliki wa kwanza Maliki Said Ramadhani likiwa na usajili wa Z 326 DQ na kuuzwa kwa Mohamed kwa Sh. Milioni 14.

Wakili wa mshitakiwa Ludovick Nickson aliiomba mahakama kumpunguzia kifungo mshtakiwa kutokana na kukabiliwa na majukumu ya kifamilia kwani ana mke, watoto na wazazi wanaomtegemea na kusisitiza ingefaa apewe kifungo cha nje.

Awali Mwendesha Mashtaka aliiomba mahakama impe adhabu kali mshtakiwa kwani alidhamiria kufanya kosa hilo  na kwamba amemtia hasara mlalamikaji kutokana  na kesi hiyo kuchukua muda mrefu.

Hakimu Mkazi  Catherine Kiyoja alisema mahakama imejiridhisha pasipo shaka kuhusu ushahidi wa watu watano uliotolewa kuhusu mshtakiwa  kwamba alikwenda kinyume na Kifungu cha Sheria Na. 258, 265 cha Kanuni ya Adhabu CAP 16 R.E 2002.

Kiyoja aliongeza mshtakiwa anapaswa kutumikia jela miaka mitatu na gari T 708 BZS litatakiwa kukabidhiwa kwa mlalamikaji. 

Read More

Abaka mwanafunzi darasa la pili Bagamoyo

BAGAMOYO, PWANI

Binti aliyebakwa na mtuhumiwa Umbuje

MWANAJESHI wa Jeshi la Ulinzi la Wananchi Tanzania (JWTZ), Ramadhani Kimweri ‘Umbuje’ anatuhumiwa kumbaka mtoto wa miaka tisa wa darasa la pili katika Shule ya Msingi Mtambani wilayani Bagamoyo mkoani Pwani.

Uchunguzi umebaini mtuhumiwa alilitenda kosa hilo Julai 16 mwaka huu saa nane mchana nyumbani kwake mtaa wa Mingoi kata ya Mapinga wilayani hapa baada ya mtoto huyo kutumwa kuchukua ‘Ice Cream’ ndani.

Aidha baada ya mtuhumiwa kutenda kitendo hicho alimtishia mtoto huyo kwamba angemnyonga kama angetoa siri za kufanyiwa kitendo hicho cha kinyama.

Akizungumza mtoto huyo alisema, “Mimi hapa nilitoka shule baada ya kula chakula dada alinituma nichukue Ice Cream ndani ndipo alipokuja…alinichukua juu, akaniziba mdomo na kuniweka kwenye kochi akanibaka.”

Mtoto huyo aliongeza kuwa mtuhumiwa ambaye mtaani anajulikana kama Baba Mukhsin, 

“Hakuvua suruali, wala shati katoa tuu m****** wake, kisha nikavaa sketi yangu nikaondoka lakini damu kidogo ilinitoka,…nilikaa kama wiki hivi…aliyenigundua ni mwalimu wa afya na kutunza mazingira.”

Pia mtoto huyo alisisitiza licha ya mwalimu huyo kumgundua na kumtaka aseme kuhusu hali hiyo lakini hakusema akihofia vitisho vya mwanajeshi huyo na kwamba aliweka bayana baada ya askari polisi wa kike kumhoji.

Mwalimu aliyegundua hali ya binti huyo Kandida  Asenga alisema, “Tulimuona mtoto huyo akishindwa kabisa kukaa tukamuuliza akasema nina mchubuko, tukahisi ana tatizo jingine, ndipo tulipoamua kumchukua na kumpeleka katika Zahanati ya Mtambani ambako nesi akatupa majibu kwamba amebakwa…tukaenda polisi.”

Daktari wa Zahanati ya Mtambani wilayani hapa Baraka Mushi alithibitisha kumpokea mtoto huyo Julai 21 mwaka huu na kubaini kwamba alitendewa unyama huo.

Mama wa binti huyo aliyejitambulisha kwa jina la Zainabu Mtungwe (31) alisema, “Dada yake alinipigia simu, huyu mtoto nilimwacha na dada yake nilimkabidhi kwake kwani alikuwa anafanya kazi kwa mama Mukhsin kwa mazingira ya shule…kutokana na hali yangu haikuwa vizuri nikarudi Kusini (Mtwara), na nilitaka kumhamisha anifuate lakini wakanishauri nimwache hadi oktoba… nimekuja jana (Agosti 10 mwaka huu)….hayo uliyoyasikia ni hayohayo  …na upelelezi wa Polisi unaendelea.”

Mjomba wa binti huyo Hamis Abdallah Omari ‘Subiri’ mwenye miaka 55 aliyesafiri kutoka Mtwara hadi wilayani hapa alisema, “Natokea Chungutwa, Masasi mkoani Mtwara, kilichonileta ni taarifa ambayo dada yangu…kwamba binti yetu amebakwa na mwanajeshi Baba Mukhsin. Nilipofika nilienda kituo cha Polisi Mapinga lakini wakawa wananizungusha ikabidi niende kwa Mwalimu shuleni anakosoma nikapata kila kitu.”

Kwa upande wake Umbuje alisema, “Kwa sasa nafanya kazi kwenye Ofisi ya Makamu wa Rais…Jambo hilo sio la kweli hata Jeshi la Polisi liliniita jana (juzi),nami niliripoti… yaani halina ukweli wowote…hivi kweli mtu mzima na akili zake anaweza kufanya hivyo?”

Umbuje aliongeza, “Polisi wanaendelea na uchunguzi wao,…kwa kweli wananichafua…halina ukweli wowote…ndio mimi, ndio Baba Mukhsin.”

Aidha Kamanda wa Polisi Mkoa wa Pwani Boniventure Mushongi alisema, “Sina taarifa hizo kwa sasa nipo huku Mkata nikirudi nitazifuatilia taarifa hizo kutoka kwa wenzangu…”

Read More

Ang’atwa na bosi akidai Sh. 250,000/-

Ilala, Dar es Salaam

MFANYABIASHARA aliyefahamika kwa jina la Kalunde Waijuba mwenye miaka 42 mkazi wa Kisota, Kigamboni jijini Dar es Salaam amepandishwa kortini katika mahakama ya Hakimu Mkazi Ilala akituhumiwa kufanya shambulio la kudhuru mwili.

Akisoma mashtaka Karani Lucy Lutabazi alisema mtuhumiwa alitenda kosa hilo Agosti 10 mwaka huu saa 9:40 alasiri katika mtaa wa Mkunguni jijini hapa.

Ilidaiwa na mbele ya Hakimu Mkazi Asha Mpunga kuwa mtuhumiwa alitenda kosa hilo wakati mlalamikaji Bi. Upendo alipokwenda kudai Sh. 250,000/-.

“Mtuhumiwa alimvamia mlalamikaji na kumpiga ngumi kumi za kifua, alimpiga mgongoni, mdomo mateke ya tumboni kisha kumkanyaga, pia alimng’ata meno bega na kumsukumiza chini  huku akijua kufanya hivyo ni kukiuka  kifungu cha sheria Na. 241(16) cha kanuni ya adhabu,” alidai Mwendesha Mashtaka.

Aidha Hakimu Mkazi alimtaka mlalamikaji kupata dhamana ya Sh. 800,000/- kutoka kwa wadhamini wawili kisha aliahirisha kesi hadi Agosti 31 mwaka huu itakapotajwa tena.

Katika shauri lingine kijana aliyefahamika kwa jina la Said Omary mwenye miaka 19 mkazi wa Kibondeni mjini Zanzibar amepandishwa mahakamani kwa wizi wa waya wenye thamani ya Sh. 10,000.

Akisoma Mwendesha Mashtaka alisema Agosti 13 mwaka huu  saa 3:20 usiku maeneo Upanga  jijini hapa kwenye Ofisi za Stamico aliiba waya huo kinyume na kifungu cha sheria Na. 265 (16) cha kanuni ya adhabu.

Mtuhumiwa amekubali kosa amerudishwa rumande baada ya kukosa wadhamini mpaka Agosti 31 mwaka huu itakapotajwa tena.

Read More