Mjukuu wa Mangi Meli ataka masalia yaingizwe rasmi vivutio vya Utalii

Mjukuu wa Mangi Meli Mandara, Isaria Annael Meli akiielezea picha ya Mangi Meli mwenyewe enzi za uhai wake, ambaye aliishia kunyongwa, kupigwa risasi na kukatwa kichwa kwasababu alikataa kuwa kibaraka wa Wajerumani. Hivyo kila Machi 2, huwa sehemu ya kuadhimisha kuuawa kwa shujaa huyo wa Wachagga wa Old Moshi. (Picha na JAIZMELA)

 Mjukuu wa Mangi Meli Mandara, Isaria Meli ameiomba serikali ya Tanzania iingie rasmi katika mpango kazi wa kuyafanya Masalia ya Mangi Meli kuwa vivutio vya Utalii nchini ili kuepusha upotevu wa Kumbukumbu muhimu za kihistoria za kiongozi huyo wa kijadi.

Hayo yanajiri wakati ambapo Old Moshi inaadhimisha miaka 122 tangu kuuawa kikatili kwa Mangi Meli kwa kunyongwa kwenye mtu mbele ya umati wa watu kisha kupigwa risasi na wakoloni wa  Kijerumani huko Tsuduni, Old Moshi mkoani Kilimanjaro mnamo mwaka 1900

Akizungumza na vyombo vya habari Isaria Meli Mandara amesema wakati umefika kwa serikali kuingilia kati suala hilo na kuliweka kwenye mpango rasmi wa kuvifanya kuwa vivutio vya Utalii ili kuendelea kutunza Kumbukumbu ya Kihistoria ya Wachagga wa Old Moshi.

Mjukuu huyo wa Mangi Meli mwenye umri  wa miaka 92 amesema umri wake umekwenda anahitaji kuona masalia hayo yanakuwa na faida kwao na kwa watanzania.

Kwa upande wake mwanaharakati wa masuala ya historia Mnyaka Sururu Mboro mwenye umri wa miaka  76  anasema juhudi za pamoja kama nchi zitawaamsha wakoloni hao kurudisha Masalia ya Jamii mbalimbali za Tanzania ambazo masalia yao yapo nje ya nchi.

Mnyaka Sururu Mboro ambaye alianza harakati hizo tangu mwaka 1977 za kutaka masalia ya Mangi Meli kurudi nchini amesema Bado ana matumaini ya kurudi nchini na kufanyiwa maziko ya Mashujaa hao kila jamii kwa namna yao.

Mnamo Machi 2 kila mwaka Jamii ya Watu wa Old Moshi huadhimisha Kumbukumbu hiyo kwa madhumuni ya kuendelea kupambana masuala hayo kurudi katika Ardhi Yao ili historia yao iendelee kutunza na Kukumbukwa kizazi hata kizazi.

 

Mnamo Februari 29, 2024 Mzee Isaria Annael Meli alizungumza na Mwandishi wa Habari za Sanaa, Utamaduni na Michezo nchini Tanzania Jabir Johnson huko Tsuduni, Old Moshi Mashariki ambako Isaria alifunguka kuhusu utata unaojitokeza kuyafanya masalia na maeneo aliyowahi kukaa babu yake kuwa rasmi katika mfumo wa serikali ili yaendelee kutunzwa. (Picha Na. JAIZMELA)

Hii ni nyumba ya Mangi Meli aliyokuwa akiishi baada ya kuvunjwa ile ya sili ya kichagga enzi za utawala wa Kijerumani. Sasa yamebaki masalia ambayo hayatunzwi kutokana na mvutano baina ya pande kadhaa kuhusu urithi wa Mangi Meli.