Wafanyabiashara Kilimanjaro waonywa kuficha sukari, Wananchi kilio kizito bei ya sukari

Sukari ipo na sisi kama serikali ya mkoa tukimkamata mfanyabiashara yeyote ameficha sukari, tutachukua sukari yake, huwezi kuwaonea wananchi. Tutapita kwenye maduka kukagua wanaojipangia bei yao na kuwaumiza wananchi."- NURDIN BABU, Mkuu wa Mkoa wa Kilimanjaro

 

Wakazi wa Manispaa ya Moshi wanaendelea kupambanana changamoto ya bei ya sukari ambapo hadi sasa kilogramu imekuwa ikiuzwa kati ya shilingi 3,000 hadi 5,000.

Hatua hiyo imewafanya baadhi ya wakazi wa manispaa hiyo kutafuta njia mbadala ya namna ya kuipata sukari kwa ajili ya matumizi ya familia zao.

Wakizungumza na gazeti hilo wakazi hao wamesema bei ya sukari ipo juu hatua ambayo imekuwa ikiathiri familia zao ambazo zilizoea kuitumia sukari katika chai au uji kwa ajili ya watoto wanaosoma shule.

“kilo ya sukari ilikuwa inauzwa Sh 3,000 hadi 3,200, lakini kwa sasa unapokwenda unauziwa Sh 4,500 hadi 5,000, hivyo hakuna bein elekezi ambayo unaweza kuipata sukari,” alisema Gadson Sadick Mdee, mkazi wa Majengo, Moshi.

Aidha mkazi huyo aliwanyooshea kidole cha lawama wafanyabiashara wanaokiuka taratibu za serikali ambapo imeweka bei elekezi ya bidhaa hiyo.

“Changamoto ya sukari imekuwa ni kubwa kwa wakazi wa moshi, unakuta bei elekezi ya serikali ni tofauti na pale unapokwenda madukani kununua. Kama ulizoea kununua sukari kwa mteja wa duka ambaye umemzoea , unapokwenda kununua na kumkuta hana bidhaa hiyo, unapoenda sehemu nyingine unauziwa kwa bei ya kulanguliwa na si kwa bei ambayo tumekuwa tumeizoea,” aliongeza
Mdee.

Hata hivyo kuwafanya watoto wao waridhike na kifungua kinywa wamekuwa wakinunua muwa kisha kuukamua na kuongeza maji kidogo na majani yanachanganywa ili kutengeneza chai.

“Tumelazimika kutafuta njia mbadala kwa ajili ya kuwafanya watoto wetu waridhike waweze kwenda shuleni. Tumekuwa tukinunua muwa tunaukamua tunachanganya maji na majani ya chai kidogo unamdanganyia mtoto anakunywa anakwenda shuleni.

Saimon Msumari, mkazi wa Kata ya Mawenzi katika Manispaa ya Moshi alisema miwa hiyo wamekuwa wakiipata kutoka wilayani Mwanga, Hai na Moshi Vijijini  na imekuwa rahisi kuliko kununua sukari kilogram moja.

“Tumerudi kule kwenye miaka ya 70 hadi 80 tuliwahi kutumia miwa na kwa sasa miwa na yenyewe imepanda bei, tunaitumia tunaikamua ili mtoto asubuhi aweze kupata chai. Miwa kwa sasa hivi imepanda bei  kutoka Sh 1,000 hadi 1,500,” alisema Msumari   

Kwa upande wake Mkuu wa Mkoa wa Kilimanjaro Nurdin Babu aliwataka wafanyabiashara kuacha mara moja mchezo wa kuficha sukari na kisha kuipandisha kinyemela

“Sukari ipo na sisi kama serikali ya mkoa tukimkamata mfanyabiashara yeyote ameficha sukari, tutachukua sukari yake, huwezi kuwaonea wananchi. Tutapita kwenye maduka kukagua wanaojipangia bei yao na kuwaumiza wananchi. Wafanyabiashara msitake kugombana na serikali kwa sababu ya sukari,” alisema Babu.