Wakenya kuamua wa kumrithi Uhuru Kenyatta kesho

Kampeni za uchaguzi wa urais nchini Kenya zimemalizika rasmi mwishoni mwa juma, lakini taarifa za uongo zimeendelea kushuhudiwa mitandaoni.

Wapiga kampeni wa wagombea wakuu kwenye uchaguzi huo William Ruto na Raila Odinga wanatumia mitandao kusambaza taarifa za shutuma dhidi ya mahasimu wao kwamba wanashiriki kwenye visa vya udanganyifu.

Mashirika ya kiraia nchini Kenya yameonya kwamba taarifa hizo potofu zinahatarisha demokrasia na yameyataka majukwaa ya mitandao ya kijamii kuchukua hatua. 

Wakenya watapiga kura ya kumchagua Rais, wabunge na viongozi wengine kesho Jumanne Agosti 9.

Mshindi katika uchaguzi huo atamrithi Rais Uhuru Kenyatta anayemaliza muda wake.

Wachambuzi wanasema ushindani ni mkali kati ya wagombea wawili wakuu na kwamba kwa mara ya kwanza Kenya inaweza kuingia katika duru ya pili ya uchaguzi.