Tembo wazururaji kurudishwa hifadhini

Waziri wa Maliasili na Utalii Mohammed Mchengerwa amewahakikishia wananchi wa wilaya Same mkoani Kilimanjaro tembo wote wanaozurura nje ya hifadhi ya Wanyamapori Mkomazi wataanza kurudishwa tena hifadhini humo.

Akizungumza na wakazi wa kata ya Kalimawe  wilayani Same; Mchengerwa amesema zoezi hilo linakuja kutokana na idadi kubwa ya tembo kuongezeka katika hifadhi.

“Tembo wote tunawaondoa na kuwarudisha ndani ya hifadhi, tutahakikisha tunatatua kero zote zinazowahusu wananchi hasa wananchi wa Same, kama kulikuwa na tembo wanazurura hovyo hovyo nimekwishatoa maelekezo tembo wote warudi ndani ya hifadhi. Na ninaomba niwadhibitishie kama miongoni mwetu walikuwa wanakata tamaa huu ni wakati wa kujenga matumaini,” amesema Mchengerwa.

Aidha Mchengerwa amesema baada ya zoezi hilo kukamilika serikali itaanza kuwalipa fidia waathirika wa uvamizi wa tembo.

“Mbali na hilo kuna wananchi wanadai fidia mazao yao yameliwa, kuna wananchi wamepoteza maisha niwaambie serikali yenu inawapenda sana wananchi wa Same, inawapenda sana watanzania; Tanzania ndiyo nchi pekee Afrika ambayo tunalipa fedha za fidia, hauikuti Kenya, huikuti Uganda, huikuti sijui wapi; ni Tanzania pekee…fedha ninayo, fedha ipo na niwathibitishie wananchi wa Same tutajitahidi wiki ijayo walipwe fidia, tutajitahidi, “amesisitiza Waziri huyo wa Maliasili na Utalii.

Hata hivyo Mchengerwa amewataka wale waliopata nafasi ya kuitimikia nchi hii katika nafasi mbalimbali kufanya kazi kwa bidii.

“Yeyote aliyepata nafasi ya kufanya kazi afanye kazi kwa bidii; watanzania wanatutegemea na sisi tumepata nafasi hizi ni lazima tuwatumikie tufanye kazi hasa ili kila mmoja wenu awe na furaha na serikali,” amesema Mchengerwa.

Zoezi la kuwarudisha tembo katika hifadhi ya Mkomazi limeanza Julai 7 mwaka huu ambapo Hifadhi za Taifa Tanzania (TANAPA) kwa kushirikiana na taasisi nyingine za uhifadhi wa Wanyamapori zipo wilayani Same kuhakikisha tembo hao wanarudi hifadhini.