Diwani Abuu Shayo atimuliwa kikaoni Baraza la Madiwani Manispaa ya Moshi

 

MSTAHIKI Meya wa Halmashauri ya Manispaa ya Moshi Mhandisi Zubery Abdallah Kidumo, amelazimika kumtoa nje ya kikao cha Baraza la Madiwani, diwani wa kata ya Mjimpya Abuu Shayo, kwa kile kilichoelezwa ni kutaka kuvuruga kikao cha baraza hilo.

 

Kisa cha diwani Abuu kuondolewa kwenye kikao hicho cha Jumatano Julai 26, kimetokana na yeye kutaka hoja zake zilizojadiliwa kwenye vikao vya Kamati kujadiliwa kwenye kikao cha kawaida cha Baraza la madiwani kilichokuwa kinathibitisha mihutasari ya vikao vya kamati za madiwani na watendaji.

 

Akitolea ufafanuzi hatua hiyo Mwanasheria wa Halmashauri ya Manispaa ya Moshi Wakili Msomi  Sifaeli Koyanga, amesema uamuzi huo ulilenga kuondoa mvutano baada ya diwani Abuu Shayo kushindwa kutafsiri kanuni aliyotumia kutaka hoja yake kujadiliwa kwenye kikao hicho.

 

Kwa upande wake Meya wa Manispaa hiyo Mhandisi Zubery Abdallah Kidumo, amesema uamuzi wake umetokana na mjumbe huyo wa Baraza la madiwani kupingana na ufafanuzi wa kanuni uliotolewa na mwanasheria wa halmashauri ya manispaa hiyo.

 

Kuhusu mradi wa ujenzi wa ukuta kuzunguka majengo ya halmashauri hiyo, yaliyotolewa na diwani Abuu, meya ametolea ufafanuzi wa fedha zilizotengwa kwa ajili ya ujenzi huo.

 

Katika hoja zake diwani wa kata ya Mjimpya Abuu Shayo ambaye pia ni mjumbe wa kamati ya mipango miji amekuwa akihoji gharama za ujenzi wa ukuta katika eneo la ofisi za halmashauri utakaogharimu kiasi cha shilingi milioni 920, pamoja na mradi wa ujenzi wa shule ya msingi kwenye kata yake.