Mjane aliyetaka kunyang’anywa nyumba na wifi yake ashinda kesi mahakamani

 

Mahakama ya Wilaya ya Korogwe mkoani Tanga imemaliza mgogoro uliodumu kwa miaka mitatu wa nyumba ya marehemu Dickson Godfrey Singano iliyokuwa ikigombaniwa na ndugu wa pande mbili kwa mjane kushinda rufaa iliyokatwa na wifi wa mjane aliyetaka kumnyang’anya kinyume cha sheria.

Akitoa hukumu ya rufaa hiyo hivi karibuni Hakimu Mkazi wa Mahakama ya Wilaya Korogwe Mussa Ngalu alisema anarejea Rufaa ya Mirathi Na. 01 ya mwaka 2019 ambapo Beatrice Shogholo (mkata rufaa) na dada wa marehemu alifungua dhidi ya mjane Zaituni Salimu Kassimu (Mjibu rufaa) katika kesi hiyo Na. 40 ya mwaka 2017.

Ilielezwa mahakamani hapo kuwa mali iliyokuwa ikigombaniwa ni nyumba iliyojengwa kwa jitihada za pamoja za marehemu na mkewe, inayopatikana kata ya Masuguru wilayani Korogwe, ambayo mkata rufaa alijimilikisha kinyume cha sheria tangu mwaka 2017, marehemu alipofariki.

Katika kesi hiyo mkata rufaa alisimamiwa na Wakili Msomi Peter Wenceslaus huku mjibu rufaa akitetewa na Wakili msomi Mathias Nkingwa.

Mke marehemu alibarikiwa kupata mtoto mmoja, ajulikanaye kwa jina la Grace Dickson mwenye umri wa miaka minne.

Hakimu mkazi Ngalu alisema ushahidi wa pande zote mbili ulisikilizwa na Mahakama kumpa ushindi mjibu rufaa. Sambamba na ushindi huo, pia Mahakama iliamuru mkata rufaa kuhama mara moja katika nyumba hiyo ili kumpisha mke wa marehemu na mtoto wake kuendelea kuishi katika nyumba hiyo.

Aidha Hakimu Mkazi Ngalu alitoa wito kwa jamii kujifunza namna ya kuandaa wosia ili kuepusha migogoro inayoweza kujitokeza pindi mmojawapo anapoaga dunia.

“Kimsingi, unapoacha Wosia unajiweka kwenye nafasi nzuri ya kugawa mali zako utakavyo na hivyo kuepusha migogoro isiyo ya lazima inayoweza kupelekea kubaribu kabisa mahusiano ya wategemezi wako; pengine hata kuuana wao kwa wao. Jamani, huu ni ushauri wa bure. Tuandae Wosia. Ni kwa usalama wa wategemezi wetu. Ndugu zetu ni wema kwetu tukiwa hai tu, tukishatangulia tu mbele za haki wanageuka mbogo,” alisema Hakimu Mkazi Ngalu.

Awali katika shauri hilo lilioanza katika mahakama ya mwanzo kwa kupewa nguvu na Kifungu Na. 11 kilichorekebishwa mwaka 2019 pamoja na sheria Na. 10 ya mahakama za mwanzo (kuhusu usimamizi wa mali isiyohamishika) G.N Na. 49 ya mwaka 1971.

Ilidaiwa mahakama hapo kuwa kikao cha ukoo kilikaa ili kugawana mali za marehemu na kuamuriwa kuwa nyumba iliyopo katika eneo la Masuguru apewe mtoto wa marehemu.

Aidha ukoo ulifikia maamuzi kuwa mali za marehemu zikodishwe ili kumsaidia bibi wa marehemu, mke wa marehemu na mtoto wa marehemu.

Hatua hiyo ilimwinua mke wa marehemu ambaye hakukubali bibi wa mtoto afaidike na mali za marehemu wakati alishapewa eneo lake huko Kwamkole, Korogwe.

Katika mahakama ya mwanzo mjane wa marehemu alishinda shauri hilo ambapo mkata rufaa ambaye ni dada wa marehemu hakuridhika na uamuzi uliotolewa na mahakama hiyo hivyo kupeleka shauri lake katika mahakama ya wilaya Korogwe ambako mkata rufaa alishindwa na mjibu rufaa ambaye ni mjane wa marehemu alishinda.

Read More

Matukio 5 yaliyotikisa mkoa wa Kilimanjaro 2020

 

Miili ya marehemu wa tukio la Mwamposa muda mchache kabla ya kuagwa katika viwanja vya Mashujaa mjini Moshi

Kulingana na Wikipedia, Maisha ni muda ambao kiumbe hai anajaliwa kuishi. Ni hali tofauti kabisa na uzima wa milele, kwa kuwa uhai wake una mwanzo na mwisho.

Hasa mwisho unasababisha maswali: kama kila chenye mwanzo kina mwisho, ya nini kuwepo kwake? Kukosa lengo, kuwepo bure, kutokuwa na maana kunamfanya mtu ajisikie mnyonge, pengine akate tamaa ya kuishi, la sivyo ajitose kufurahia mazuri yanayopatikana maishani, lakini bila uwezo wa kuondoa moyoni ule utupu wa maana unaomtia huzuni ya dhati.

Ndiyo sababu maana ya maisha ni mojawapo kati ya masuala makuu ya binadamu duniani: hawezi kukwepa maswali ya kutoka moyoni mwake kuhusu thamani, madhumuni na umuhimu wa maisha yake.

Mwaka 2020 ulikuwa ni miongoni mwa muda ambao viumbe hai walipewa kuishi, lakini katika kuishi kwake kiumbe huyu alikutana na mengi.

Mengine  yalimfanya afurahie pia ahuzunike kwa namna moja au nyingine.

Katika makala haya tutaangazia mkoani Kilimanjaro ambako nako kulikuwa na mengi yaliyochomoza na kusalia kama kumbukumbu ya maisha kwa wakazi wa mkoa huo uliopo Kaskazini mwa Tanzania.

1.     VIFO VYA WATU KATIKA IBADA YA MWAMPOSA

Haikutarajiwa kutokea hivyo, Februari mwaka huu watu 20 walifariki dunia baada ya kukanyagwa na wenzao wakati wakitoka katika lango moja waliloelekezwa kupita ili kukanyaga mafuta ya upako katika Ibada ya Kanisa la Inuka Uangaze linalosimamiwa na Mtume Boniface Mwamposa.

Katika tukio hilo watu 16 walijeruhiwa. Tukio la kuagwa kwa miili ya marehemu hao ilifanyika katika viwanja vya Mashujaa mjini Moshi na kuhudhuriwa na wakazi wa mkoa huo. Rais John Pombe Magufuli alitoa salamu za rambirambi kwa wafiwa wote.

2.     MLIMA KILIMANJARO KUWAKA MOTO

Mlima Kilimanjaro ni mrefu kuliko yote barani Afrika na ukiwekwa katika tunu za ulimwengu ukiwa na urefu wa mita 5,895. Mnamo Oktoba mwaka huu mlima huo uliwaka moto na kudumu kwa siku saba hadi kuzimwa kwake. Miale ya moto ilikuwa ikionekana kutoka mji wa Moshi umbali wa makumi ya kilomita kutoka eneo la mlima kulikotokea tukio hilo. Hifadhi ya Taifa nchini (TANAPA) ilisema kuwaka kwa moto katika mlima huo hakutaathiri shughuli za utalii ambapo watalii zaidi ya 50,000 hukwea mlima huo kila mwaka. 

Zoezi la uzima wa moto likiendelea katika mlima Kilimanjaro

 3.     TAHADHARI YA COVID-19

Kilimanjaro ni mkoa ambao unapakana na Kenya na kumekuwa na mahusiano ya muda mrefu baina yake na watu waliopo Kenya na Tanzania hususani Kilimanjaro katika Wilaya ya Rombo.

Wakati janga la Corona lilipoanza na kutakiwa kila taifa lichukue tahadhari, kulikuwa na wimbi kubwa la raia wa Kenya waliotaka kujipenyeza kuingia Kilimanjaro kuepuka kusalia majumbani kwa kipindi kisichojulikana.

Hiyo ilitokana na kauli ya Rais wa Jamhuri ya Muungano wa Tanzania John Pombe Magufuli kutangaza kuwa Tanzania haina corona hivyo nchi yake haitakuwa na lockdown lakini tahadhari zaidi ziendelee kuchukuliwa.

Mkuu wa Mkoa wa Kilimanjaro Dkt. Anna Mghwira aliwataka wananchi wake kuwa walinzi wa kwanza katika hilo kutoruhusu mwingiliano huo. Hadi mwishoni mwa mwaka huu Tanzania ndiyo nchi pekee ulimwenguni inayoendelea na shughuli zake kama kawaida.

4.     UCHAGUZI ULIVYOWAACHA SOLEMBA WAPINZANI

Mbunge wa Moshi Mjini Priscus Tarimo wakati wa kampeni Oktoba 2020

Oktoba 28, 2020 ulifanyika uchaguzi wa Rais, Wabunge na madiwani ambapo mzizi wa upinzani nchini uling’olewa. Mkoa wa Kilimanjaro ndio kitovu cha siasa za upinzani tangu mwaka 1995 mfumo wa vyama vingi ulipoanzishwa.

Chama cha Demokrasia na Maendeleo (Chadema), NCCR-Mageuzi na vingine vilishindwa kufurukuta katika uchaguzi huo na kujikuta wakiambulia patupu kwenye uchaguzi huo.

Gumzo kubwa ilikuwa ni wilayani Hai ambako mwenyekiti wa Chadema Freeman Mbowe alishindwa na kijana mdogo wa Chama cha Mapinduzi (CCM), Saashisha Mafuwe. Mbowe aliambulia kura 27,684 huku Mafuwe akipata ushindi wa kishindo wa kura  89,786.

Kwa mara ya kwanza jimbo la Moshi lilirudi mikononi mwa CCM kwa kijana Priscus Tarimo kuwa kinara kwa kura 31,169 dhidi ya Raymond Mboya wa Chadema aliyepata kura 22,555. Licha ya wapinzani kupinga matokeo hayo lakini hakuna chochote kilichotokea.

5.     UZINDUZI WA UTOAJI WA VYETI VYA KUZALIWA WATOTO

Waziri wa Katiba na Sheria Mwigulu Nchemba alifanya uzinduzi huo. Zoezi hilo lililofanyika Agosti 2020 lilipokewa vizuri na wakazi wa mkoa huo.

 

Serikali ya Jamhuri ya Muungano wa Tanzania kupitia Wakala wa Usajili Ufilisi na Udhamini (RITA) ilikuja na Mpango Mkakati wa kuhakikisha kila mtoto anayezaliwa sasa na wale ambao tayari wamezaliwa chini ya umri wa miaka mitano wanapata Vyeti vya Kuzaliwa kwa mfumo mpya wa Wakala (RITA) kupeleka huduma hiyo ya utoaji vyeti katka ngazi ya Vituo vya Afya pamoja na ngazi ya Ofisi za Watendaji wa Kata.

Mkoani Kilimanjaro uzinduzi wake ulifanyika katika viwanja vya Mandela, Pasua mjini Moshi ambapo Waziri wa Katiba na Sheria Mwigulu Nchemba alifanya uzinduzi huo. Zoezi hilo lililofanyika Agosti 2020 lilipokewa vizuri na wakazi wa mkoa huo.

Read More

Simanzi yatawala maziko baba aliyeuawa na mwanaye Hai

 

Waombolezaji wakiwa katika simanzi wakati wa kuuaga mwili wa marehemu Welanzari Kimaro, tukio lililofanyika nyumbani kwa marehemu kitongoji cha Kiduruni, Masama Mura wilayani Hai mkoani Kilimanjaro Desemba 23, 2020.

Simanzi ilitawala katika kijiji cha Muroma kilichopo kata ya Masama wilayani Hai wakati wa maziko ya mkazi wa kitongoji cha Kiduruni Welanzari Kimaro (60) aliyeuawa kwa kukatwakatwa na panga na mtoto wake asubuhi ya Desemba 18, 2020 huku wito ukitolewa kwa jamii kuwatunza vijana katika maadili mema ili kuepukana na vitendo visivyo vya kiungwana kwenye familia zao.

Ibada ya maziko ilifanyika nyumbani kwa marehemu Desemba 23, 2020 majira ya saa 9:40 alasiri ikishuhudiwa waombolezaji takribani ya 400 na mwili wa marehemu kuhifadhiwa katika shamba la ukoo wake pembeni ya nyumba yake.

Wakizungumza kwa nyakati tofauti waombolezaji katika msiba huo walisema kutokea kwa tukio hilo kumewapa funzo kubwa katika suala la malezi ya vijana wao na jamii kwa ujumla.

“Inasikitisha na inatuhuzunisha, hatukutegemea hatuna budi kumshukuru Mungu kwa kila jambo, kwa kweli inauma, kuna kitu tumejifunza,” alisema muombolezaji aliyejitambulisha kwa jina la Hilda.

“Msiba huu umeshtua wengi, umesikitisha wengi, haukuwa umepangika, lakini maandiko matakatifu yanasema kuweni tayari muda unaofaa na usiofaa,” alikaririwa Kandata Kimaro ambaye ni Diwani wa Kata ya Masama Kati.

Kandata aliongeza, “matendo ya vijana wetu sio ya kufumbia macho, tunapaswa kulaumiana sisi wazazi hatujasimama kwenye nafasi zetu, vijana wetu wanatumia dawa za kulevya, familia zimekuwa chanzo ukiona mtoto wako ni mlevi, mvuta bangi toa taarifa kwa mwenyekiti wa kitongoji ili hatua za kisheria zichukuliwe.”

Hata hivyo Kandata alijitolea kumpata mahitaji ya shule mtoto mmoja wa marehemu ambaye mwaka ujao atakuwa darasa la saba ukiwa ni utaratibu wake wa kuwasaidia watoto watano kila mwaka kwenye kata yake katika masuala ya elimu. 

 

Kwa upande wake Mchungaji mstaafu wa Kanisa la Kiinjili la Kilutheri Tanzania (KKKT) John Njau aliwataka waombolezaji kutambua kuwa hakuna kifo kizuri au kifo kibaya bali kifo ni kifo tu.

“Hakuna kifo kizuri au kifo kibaya; Kifo ni kifo tu, kifo ni adui kinakutenga na wale uwapendao, baba yeye amekwenda hatuwezi kuongeza zaidi, ” alisema katika ibada ya maziko.

Mchungaji Mstaafu Njau ambaye alishirikiana na Mwinjilisti Onesmo Makere wa Usharika wa Muroma kuongoza ibada hiyo alisema, “Naomba sana, watu wasiongeze chuki katika hili, funga mdomo wako katika hili, alaaniwa huyu Shetani, kijana huko aliko akutane na Yesu, arudi amwombe msamaha mama yake na ninaamini mama yake atamsamehe.”

Mke wa marehemu Bi. Joyce Kimaro (aliyeketi kwenye wheelchair) alishiriki kuuaga mwili wa mumewe katika tukio lililofunikwa na simanzi.

Katika suala la kuwatunza vijana, Mchungaji Mstaafu Njau alikemea vitendo vya vijana kutumia dawa za kulevya  ikiwamo bangi huku jamii ikikaa kimya na kuitegemea serikali badala ya kuchukua hatua  kuanzia ngazi ya familia.

“Watu pelekeni taarifa kwa viongozi wa serikali za mitaa kama kuna kijana katika familia yako anayejihusisha  na dawa za kulevya. Hii ni karne ya laana? Hapana sio karne ya laana kwanini tusimwite Yesu katika maombi ili atusaidie kuwaponya vijana wetu?, alisisitiza Mchungaji Mstaafu Njau.

Mchungaji Mstaafu wa Kanisa la Kiinjili la Kilutheri Tanzania (KKKT) John Njau aliongoza mahubiri katika ibada ya maziko ya Welanzari Kimaro akisaidiwa na Mwinjilisti Onesmo Makere.

  

Awali mwili wa marehemu uliletwa katika nyumba yake kwa ajili ya kutoa heshima za mwisho majira ya saa tatu asubuhi baada ya Jeshi la Polisi mkoani Kilimanjaro kuruhusu kufanyika kwa maziko huku uchunguzi zaidi wa kifo cha mkazi huyo wa Kiduruni ukiendelea.

Hata hivyo ibada ya maziko ilichelewa kuanza kutokana na mke wa marehemu aliyejeruhiwa mguu siku ya tukio kulazwa katika hospitali ya Rufaa ya KCMC mjini Moshi ambapo madaktari walimruhusu kuhudhuria maziko baada ya kujiridhisha na hali yake kiafya.

Marehemu ameacha mjane na watoto watano (wa kike wawili na wa kiume watatu) na wajukuu wanne huku mtoto aliyefanya tukio hilo ni wa nne kati ya watano ambaye ametoweka kusikojulikana.

Alizaliwa Kirari wilayani Hai mnamo  Julai 1, 1960; alipata ubatizo Oktoba 6, 1960 katika usharika wa KKKT Lemulangaya, Muroma, alipata kipaimara mnamo mwaka 1973 alisoma elimu ya msingi katika Shule ya Msingi Mbosho kutoka mwaka 1968-1974 na mnamo mwaka 1975-1976 alisomea masomo ya ufundi katika Chuo cha Ufundi Muroma.

Welanzari aliachana na ukapera mnamo Mei 5, 1987 na kumwoa Joyce Swai ambaye ni mjane kwa sasa ambapo waliendelea kujikita katika shughuli za ujenzi, ufugaji na kilimo hadi mauti yalipomkuta wakati akiwa kwenye mipango ya kuandaa hafla ya kipaimara kwa ajili ya mjukuu wake iliyotarajiwa kufanyika Desemba 20, 2020.

 

Read More

Aibiwa kwa kupuliziwa dawa za usingizi kwenye kinywaji

 

Dawa ya usingizi aina ya Chloroform

Mhandisi wa visima anayefahamika kwa jina la Michael Mwingira (47), amejikuta katika wakati mgumu usiku wa kuamkia Desemba 24, 2020 baada ya kuibiwa kila kitu kwa kutiliwa dawa za usingizi wakati akijiandaa kusherekea Krismasi.

Hayo yalijiri ikiwa ni saa chache kabla ya mkesha wa Krismasi wakati mhandisi huyo alipowasili mjini Moshi, mkoani Kilimanjaro akitokea Tanga kwa ajili ya sherehe hizo za kila mwaka na kubainika kutiliwa dawa za usingizi baada ya kuwasili katika Hospitali ya Rufaa ya Mawenzi majira ya saa 8:30 mchana akiwa na uchovu mkubwa uliosababishwa na kemikali hizo.

Ripoti ya vipimo vya madaktari  wa kitengo cha dharura wa Hospitali hiyo ya Rufaa ilisema mhandisi huyo alitiliwa dawa za usingizi ikiwamo valium katika mojawapo ya vinywaji alivyokuwa akivitumia kabla ya tukio.

Aidha mhandisi huyo aliwekea dripu la maji kwa ajili ya kuongeza mzunguko wa damu ili kuondoa kemikali hizo za usingizi ambazo hapo awali ilidhaniwa kuwa huenda alitiliwa simu, tetesi ambazo kitengo hicho kiliziweka kando kutokana na ukweli kwamba ingekuwa sumu dalili zaidi zingejitokea kabla ikiwamo kuumwa tumbo.

“Tunamwekea dripu la maji ili kuondoa huo uchovu unaomfanya asijitambue, ingekuwa ni sumu za kupulizia na nyingine dalili zingeonekana lakini kwa hali aliyonayo alizowekewa ni za usingizi,” alisema daktari wa zamu ambaye hakutaka jina lake litajwe wakati muathirika wa tukio hilo akilazwa katika kitanda cha wagonjwa mahututi.

Awali mhandisi huyo aliwasili mjini Moshi na kuchukua chumba katika Nyumba ya Kulala Wageni ya People’s iliyopo Majengo mjini humo ambapo baada ya kupata chakula cha usiku alikwenda zake katika eneo la starehe linalofahamika kwa jina la Moshi Pazuri.

Akizungumza baada ya kupata fahamu na uchovu kupungua mhandisi huyo alisema wakati akipata kinywaji katika eneo hilo walikuja wanawake wawili ambao waliomba kampani yake katika kuendelea kunywa pombe.

Majira ya usiku aliamua kurudi zake alikochukua chumba na wakati akijiandaa kuondoa wanawake hao wawili waliomba lifti katika gari lake na walipofika huko People’s Guest House waliendelea kunywa pombe ambako wanawake hao inadaiwa walitumia mwanya huo kumwekea dawa za usingizi pasipo kujua.

Baada ya kuamka asubuhi ya Desemba 24, 2020 mhandisi huyo huku akiwa ahajitambua alijikuta hana kitu chochote zaidi ya nguo alizovaa, ndipo alipowataka wahudumu wa gesti ile kumsaidia simu ili afanye mawasiliano na ndugu, jamaa na marafiki kwa ajili ya msaada zaidi.

Mwingira aliongeza kuwa rafiki yake aliyepo mjini Moshi ndiye aliyetoa msaada mkubwa wa kumfikisha mikononi mwa Maafisa wa Jeshi la Polisi ambapo walikuja katika nyumba hiyo ya kulala wageni na kuwachukua wahudumu waliokuwepo zamu kwa ajili ya maelezo zaidi.

Pia mhandisi huyo katika mahojiano na maafisa wa polisi mkoani humo alimwelezea mwanamke mmoja kati ya wale wawili jinsi alivyo ili kurahisisha uchunguzi zaidi kufanyika na kuwakamata wahalifu wanaotumia mbinu hizo kinyume cha sheria na kuvitaja vitu vilivyoibiwa zikiwamo simu, kadi za benki, vitambulisho na begi la nguo.

Shuhuda mmoja aliliambia gazeti hili kuwa mwanamke aliyefanya unyama huo ni mzoefu wa siku nyingi ambaye hufanya shughuli za ukahaba mjini Moshi kwa miaka mingi alikuwa akionekana katika maeneo ya starehe ya Malindi mjini humo.

Jeshi la Polisi Mkoani Kilimanjaro limethibitisha kutokea kwa tukio hilo, huku likitoa raia katika kipindi hiki cha sikukuu watu mbalimbali kuchukua tahadhari kukaa na watu wasiowafahamu ili kuepusha madhara zaidi.

 

Read More