Meno ya Tembo yawapandisha Mahakamani

Polisi Jamii wawili na dereva mmoja wakazi wa Mbezi Luis jijini Dar es Salaam, wamefikishwa katika Mahakama ya Hakimu Mkazi Kisutu kujibu tuhuma za uhujumu uchumi kwa kukutwa na meno ya tembo yenye thamani ya Sh. milioni 239.5.

Akisoma hati ya mashtaka wakili wa Serikali, Faraja Nguka  amewataja washtakiwa hao kuwa ni dereva mkazi wa Mbezi Luis, Kefas Mlenzi (30), Polisi Jamii, Juma Mtali (35) na  Polisi Jamii, Greyson Muhapa maarufu kama Masu (32) wote wakati wa Mbezi Luis.

Mbele ya Hakimu Mkazi, Ally Salum, wakili Nguka amedai Juni 28 mwaka huu huko Mbezi katika Wilaya ya Ubungo washtakiwa kwa pamoja walikamatwa wakiwa na vipande 30 vya meno ya tembo vyenye thamani USD 105,000 sawa na Sh 239,505,000 bila ya kuwa na Kibali kutoka kwa Mkurugenzi wa Wanyama pori.

Hata hivyo, washtakiwa hawakuruhusiwa kuongea chochote kwa sababu mahakama ya Hakimu Mkazi Kisutu haina mamlaka ya kuisikiliza kesi za uhujumu uchumi, isipokuwa mahakama Kuu au kwa kupata kibali kutoka kwa DPP.

Kesi imeahirishwa hadi Julai 23, 2018 kwa mijibu wa upande wa mashtaka upelelezi wa kesi hiyo bado haujakamilika.

Read More

Andres Manuel Lopez Obrador: Rais mpya wa Mexico, Trump ampongeza

Mgombea wa siasa za mrengo wa kushoto nchini Mexico, Andres Manuel Lopez Obrador amepata ushindi mkubwa baada ya kuchaguliwa kuwa rais kwa asilimia 53 ya kura, tume ya uchaguzi imearifu.

Rais wa Mexico Andres Manuel Lopez Obrador

Matokeo hayo ya awali yamezingatia idadi ya kura zilizokusanywa kutoka kwa wawakilishi kwenye vituo 7,800 vya kupigia kura. 

Rais wa taasisi ya kitaifa ya uchaguzi Lorenzo Cordova amethibitisha matokeo hayo.
Amesema, Lopez Obrador ameshinda kwa kati ya asilimia 53 na 53.8 ya kura zote, wakati mgombea wa chama cha kihafidhina wa sera za wastani, Ricardo Anaya akipata wingi wa kura wa hadi asilimia 22.8, na Jose Antonio Meade anayetokea chama cha rais anayeondoka madarakani Enrique Pena Nieto cha Institutional Revolutionary, PRI akiambulia hadi asilimia 16.3 tu ya kura zote.

Obrador akisalimiana na wafuasi wake wakati wa Kampeni za Uchaguzi uliomweka madarakani na kumuondoa Enrique Peña Nieto.

Rais wa Marekani, Donald Trump amempongeza Obrador kwa ushindi huo aliouita wa kishindo akisema, ana matarajio makubwa ya kushirikiana na kiongozi huyo.

Read More

Croatia yatinga robo fainali, Schmeichel atisha

Croatia imetinga robo fainali ya Michuano ya Kombe la Dunia dhidi ya Denmark katika mchezo uliochezwa Nizhny Novgorod nchini Russia kwa changamoto ya mikwaju ya penati 3-2.

Timu ya Taifa ya Croatia wakishangilia baada ya kuizabua Denmark kwa mikwaju ya penati 3-2, katika dimba la Nizhny Novgorod, Russia

Danijel Subasic alikuwa shujaa baada ya kuokoa mkwaju wa penalti uliopigwa na mchezaji wa Denmark Christian Eriksen.

Hata hivyo mlinda mlango wa Denmark Kasper Schmeichel atasalia katika mchezo huo kuwa mchezaji bora akiokoa mikwaju mitatu ya penati.

Bao la dakika ya kwanza la Mathias Jorgensen liliwapa uongozi Denmark na dakika tatu baadaye Mario Mandzukic aliisawazishia Croatia na matokeo hayo kusalia hadi dakika 120 za mchezo huo ulioamuliwa kwa mikwaju ya penati.

Matthias Jorgensen akishangilia bao la kwanza dhidi Croatia.

Mchezaji wa zamani wa Croatia Davor Suker akishangilia ushindi wa taifa lake dhidi ya Denmark.

Christian Eriksen akipambana vikali na Luka Modric

Read More

Mtoto wa miaka 8 kujiunga Chuo Kikuu Ubelgiji

Mtoto anayefahamika kwa jina la Laurent Simons (8) anatarajiwa kujiunga na masomo ya Chuo Kikuu nchini Ubelgiji baada ya kumaliza masomo ya sekondari kwa muda wa mwaka mmoja na nusu.

Laurent Simons

Simons ambaye wazazi wake ni kutoka nchini Uholanzi alipata diploma yake kwenye darasa la wanafunzi wenye miaka 18.

Kinachoelezwa na wazazi wake ni kwamba mtoto huyo wa kiume ana uwezo wa juu wa akili (IQ) na kwamba somo analolipenda sana ni hesabu kwasababu ni pana.

Kwa sasa yupo likizo ya miezi miwili kabla ya kujiunga na masomo ya shahada nchini humo.

Baba wa mtoto huyo alikaririwa na kituo cha redio cha RTBF nchini Ubelgiji akisema mtoto huyo alipata wakati mgumu akiwa mdogo wakati wa kucheza na wenzake na hakufurahishwa na vifaa vya kuchezea.

"Ikiwa ataamua kesho kuwa seremala, hilo halitakuwa tatizo kwetu kama atakuwa na furaha," alisema baba yake.

Laurent Simons akiwa na wazazi wake.

Read More