RON W. DAVIS: Alivyopigiwa simu kutoka Tanzania-4

Makala yaliyopita tuliangazia namna kocha Ron Davis alivyoamka asubuhi mjini Edmonton na ndoto ya maisha yake kubadilika pale alipokutana na mwanariadha wa kwanza aliyeipa medali ya kwanza Tanzania Filbert Bayi na baadaye kocha Sulus.

Tukio hilo lilitokea mwaka 1978 kwenye michuano ya Jumuiya ya Madola ilifanyika mjini Edmonton, Alberta nchini Canada ambako Tanzania ilishiriki. Ron Davis alikuwapo Edmonton kama kocha wa Nigeria ambayo ilikacha kushiriki baada ya kutoka All Africa Games jijini Algiers. Katika makala haya tutaendelea na safari ya Ron Davis kilichofuata baada ya kupokea miadi kutoka kwa Kocha Sulus.

Ron Davis anasema, “ Sulus alinipigia simu siku chache baadaye na kuniambia kuwa Waziri wa Utamaduni na Michezo Mheshimiwa Chadiel Mgonja anapenda kukutana na mimi.”

Wakati huo Ron Davis alikuwa bado kocha wa timu ya taifa ya Nigeria, na tukio hilo lilimfanya sasa aanze kuwa karibu kwani hakutegemea kuwa ingeweza kuwa muujiza mkubwa wa yeye ambao ulikuwa akiusubiri kwa miaka mingi.

Ron Davis alijiuliza maswali mengi kwamba je asubuhi ile katika viunga vya Edmonton nchini Canada akimsemesha Bayi wakati akifanya mazoezi yake kama utani tu ndio imekuwa kitu kamili.

Ilimstaajabisha sana raia huyo wa Marekani. Aidha tukio hilo la kupigiwa simu liliweza kudakwa na magazeti ya Canada wakati ule kwani walikuwa wakimfahamu vizuri Ron Davis kwani aliwahi miaka ya nyuma kuwapo huko Alberta kwa kama mkurugenzi wa michezo.

MAZUNGUMZO NA GAZETI LA CANADA

Kukutana na Waziri Mgonja ilikuwa habari kubwa sana kwa wanahabari nchini Canada na waliomba kukutana naye kwa ajili ya mahojiano. Lakini Ron Davis anakiri kwamba mahojiano yale yalitaka kumtokea puani kutokana na kwamba alikuwa bado na kibarua na taifa la Nigeria.

Wanahabari walitaka kujua kutoka kwake sababu za Nigeria hatohudhuria michezo hiyo ya Jumuiya ya Madola mjini Edmonton. Ron Davis anasema, “Mojawapo ya vitu nilivyosema ilikuwa ni kwamba maofisa wa Nigeria ndio walioamua kutoshiriki michuano hiyo.”

Kwa taarifa yako jibu hilo lilitosha kujaa kwenye kurasa za magazeti ya Canada siku iliyofuata na kusomwa na watu wengi nchini humo. Ron Davis anasema alishindwa kumjibu mwandishi wa habari katika muktadha wa kisiasa.

Kwa muktadha wa kisiasa jibu lingekuwa siku zote Nigeria iko mstari wa mbele katika mapambano dhidi ya vitendo vya ubaguzi wa rangi na kukosekana kwao ni sehemu ya msimamo wa viongozi kuhusu vitendo hivyo.

Baada ya tukio hilo alikutana na Abraham Ordia ambaye alikuwa Katibu Mkuu wa Kamati ya Olimpiki ya Nigeria na Rais wa Baraza Kuu la Michezo barani Afrika. Ordia alimwambia kuwa hajapendezwa na baadhi ya kauli alizozitoa kwenye vyombo vya habari na kumtaka asizungumze tena na vyombo vya habari akiwa nchini Canada labda kwa makubaliano maalum.

Ron Davis anasema aliomba radhi kutokana na makosa hayo ambayo yalimfanya hata yeye mwenyewe ajisikie vibaya. 

AKUTANA NA CHADIEL MGONJA

Hatimaye siku iliwadia pale alipokutana na Waziri Mgonja. Ron Davis anasema, “Nilifurahi sana kukutana na Mgonja na ilipendeza sana.”

Katika mahojiano yao Ron Davis alijisemea moyoni endapo atafanikiwa kuajiriwa na serikali ya Tanzania utakuwa uhusiano ambao hautavunjika kamwe. Mafanikio aliyoyapata akiwa na Nigeria ilikuwa pointi muhimu ambayo ilimpa nafasi ya kuwa kocha wa Tanzania.

Mgonja alionyesha wazi kuwa alikuwa na mipango mikubwa kwa ajili ya Tanzania pale alipomwambia kuwa anamtaka Ron Davis kwa ajili ya kuwa kocha wa timu ambayo itashiriki michuano ya Olimpiki mwaka 1980. 

Katika mkutano wake na Mgonja kulikuwapo na mjumbe wa ubalozi wa Tanzania. Kila kitu kilifikiwa kuhusu uhamisho wake na namna ya kufanya kazi Tanzania. Ron Davis alitoa taarifa zake hali hiyo ilimfanya ajione kuwa anatembea angani kutokana na furaha isiyo kifani na tabasamu lililojaa matumaini makubwa ya kufanya kazi Tanzania.

Akiwa Edmonton alimshuhudia na alijua kuwa Bayi angekimbia fainali za mita 1500. John Carlos na rafiki zake waliungana naye kuona namna Bayi atakapofika kwenye kinyang’anyiro.

Ron Davis alimuona Bayi akianza kwa nguvu lakini katika mita 100 za mwisho Mwingereza Dave Morcroft alimburuza na kutwaa medali ya dhahabu na kusalia kuwa na medali ya fedha. Kitendo hicho kilimuuma sana Ron Davis, Carlos na wenzake kwani hawakutarajia kama angepitwa.

Wakiwa katika hali uchungu wa uwanjani zilikuja taarifa nyingine kuwa mke wa John Carlos alikuwa amefariki dunia, sasa hapo ikawa habari nyingine chungu zaidi na suala la Bayi likafutika kwenye vichwa vyao.

Ron alirudi Nigeria na kuaga vizuri kisha safari ya Tanzania ikaanza baada ya kupewa taarifa kwamba amechaguliwa kuwa kocha mkuu wa Timu ya Taifa katika mbio za uwanja.

Alipotua Tanzania alishangazwa na umati wa wanahabari katika Uwanja wa Ndege wakimsubiri kwa shauku. Kilichomstaajabisha alikuwa hajawahi kuona hapo kabla. Ilikuwa ngumu kuamini kwani watu hawakuficha shauku na matarajio yao kwake katika medani ya riadha.

Makala haya yametayarishwa na Jabir Johnson ambaye alipata fursa ya kuzungumza na Ron Davis  katika masuala mbalimbali ya maisha yake na medani ya riadha alipotua nchini Tanzania. Kwa maoni ushauri barua pepe: jaizmela2010@gmail.com